भांगरभूंय | प्रतिनिधी
कोंकणी राखणदार मंचान केली कारवाय करपाची मागणी
पणजी : गोंय शीक्षक पात्रताय चांचणेंत (जीटीईटी) कोंकणी विशयाच्या एका बाबत प्रस्नावेल्यान नवो वाद निर्माण जाला. प्रस्ना खातीर जी कथा दिल्या ताची भाशा, व्याकरण भयानक आसा. तशेंच ही काणी बायलांची बदनामी करपी, अनैतिक गजालींक उर्बा दिवपी आशिल्ल्याचें कोंकणी राखणदार मंचाचे अध्यक्ष प्रकाश द. नायक हांणी म्हणलां. ही प्रस्नपत्रिका काडप्याचेर खर कारवाय करची अशी मागणी तांणी केल्या.
मजगतीं, प्रस्नपत्रिका तपासून कारवाय करपाचो विचार जातलो, अशें शालान्त मंडळाचे अध्यक्ष भगीरथ शेट्ये हांणी सांगलें.
मुख्यमंत्री, शिक्षण सचीवान दखल घेवन प्रस्नपत्रिका काडटल्याची चवकशी करची अशी मागणीय कोंकणी राखणदार मंचान केल्या.
गोंय शिक्षक पात्रताय चांचणी (जीटीईटी) ९ आनी १० डिसेंबराक जाली. गोंय शालान्त मंडळा वतीन परिक्षेचें आयोजन जाता. राज्यांतल्या ४ हजारांचेर उमेदवारांनी ही परिक्षा दिली. आरटीई कायदो लागू जाले उपरांत भरती जाल्ल्या शिक्षकां सयत शिक्षक पदां खातीर अर्ज करतल्यांक ही परिक्षा पास जावप बंधनकारक आसा. पयली ते आठवी मेरेनच्या शिक्षकां खातीर जीटीईटी सक्तीची आसा.
बुधवारा १० डिसेंबराक कोंकणीचो पेपर जालो. एक कथा दिवन ताच्या आदाराचेर प्रस्न पेपरांत विचारिल्लें. विशाल पारकार नांवाच्या मनशा कडेन लग्न जाल्यार लिनाक तीन वर्सां भुरगें नासलें. सुपुल्ल्या जिवाक खेळोवपाची लिनाची उमळशीक वाडत वताली. मात भुरगें जावपाची कसलींच चिन्नां दिसनासलीं देखून लिनाक खूब दुख्ख जातालें. ताणें भुरगें जावचे खातीर देवाक आंगवणय घातिल्ली, मात सगलें व्यर्थ. ……… एक दीस लिनालो घोव आॅफिसांत वतकच ताच्या घोवाचो इश्ट घरांत आयलो….. ताचे कडेन प्रणय करून भुरगें जावपाचें सपन पुराय करप, अशें येवजून लिनान दाराक खिळी घाली….. अशें कथानक ते कथेंत आसा. ताका मागीर त्या इश्टा पसून तिका भुरगें जाता. घोव धांवडावन घालता, लीना मागीर बाळंत जातकच आत्महत्या करता. भुरग्याक सांबाळ अशी चीट घोवाक बरोवन दवरता.
ही कथा प्रस्नपत्रिकेंत दिवप म्हणल्यार अनैतिक संबंदांत उर्बा दिवप. लग्न जावन ७-८ वर्सां भुरगें नाशिल्ले बायलेन म्हाका ही प्रश्नपत्रिका धाडली. हातूंतली कोंकणी भाशा, उतरां चुकीचीं आसात. मजकूर अश्लील आसा, अशें प्रकाश नायक हांणी म्हणलां. प्रस्नपत्रिका काडटल्याची चवकशी करून कारवाय करपाची तांची मागणी आसा. हेर कांय शिक्षकांनी लेगीत कथेक हरकत घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
