जीएसटी सुदारणा थारतली फायद्याची

भांगरभूंय | प्रतिनिधी

मुख्यमंत्र्यान उक्तायलो विस्वास

5 आनी 18 टक्के जीएसटीचो निर्णय

शेतां, पर्यटन, खण वाठाराक उर्बा

भांगरभूंय । प्रतिनिधी

पणजी : आतां 12 टक्के आनी 28 टक्के स्लॅबाच्या जाग्यार 5 टक्के आनी 18 टक्के जीएसटी लागू करपाच्या निर्णयाचो गोंयाक खुबूच फायदो जातलो. शेती, पर्यटना सयत खण वाठाराक जीएसटी सुदारणा उर्बा दिवपी थारतली, अशें मुख्यमंत्री डॉ. प्रमोद सावंत हांणी म्हणलां. जीएसटी लागू जाल्या उपरांत गोंयांतल्या शुल्कदारांचो आंकडो 112 टक्के जाल्यार शुल्काचे येणावळींत 74 टक्क्यांनी वाड जाल्या, अशी म्हायती तांणी दिली.

केंद्रीय अर्थमंत्री निर्मला सीतारामन हांच्या फुडारपणा खाला जीएसटी मंडळाची 56 वी बसका नवी दिल्लींत जाली. हे बसकेक हाजेरी लायले उपरांत मुख्यमंत्री डॉ. प्रमोद सावंत गोंयांत पावले. पत्रकार परिशद घेवन तांणी बसकेंतल्या निर्णयांची म्हायती दिली.

एक देश, एक शुल्क ह्या तत्वाचेर 1 जुलय 2017 सावन जीएसटीची कार्यवाही देशांत सुरू जाली. जीएसटीक आठ वर्सां पुराय जाल्या. देशांतले 85 टक्के वेवसायीक, उद्देजक जीएसटी कार्यवाहीचेर खोशी आसात. देश पावंड्याचेर विचार केलो जाल्यार शुल्क फारीक करतल्यांचो आंकडो 2017 त 66.5 लाख आशिल्लो तो 2025 त 1.51 कोटीचेर पावलो. 2024- 25 त जीएसटी येणावळ 22.08 कोटींचेर पावल्या, अशें मुख्यमंत्र्यांनी सांगलें.

गोंयांत जीएसटी पयलीं 2017 त शुल्क फारीक करपी लोकांचो आंकडो 22,197 आशिल्लो. तो 2025 त 47,232 चेर पावला. ही वाड 112 टक्के आसा. जीएसटीक लागून शुल्क फारीक करतल्यांचो आंकडो 25,035 इतलो वाडला. तशेंच 2017- 18 त शुल्काची येणावळ 1463.74 कोटी आशिल्ली. 2025 त ही येणावळ 4424.9 कोटींचेर पावल्या. ही वाड 74 टक्के आसा, अशें मुख्यमंत्री डॉ. सावंत हांणी सांगलें.

गोंयचे अर्थवेवस्थेक मेळटली उर्बा : मुख्यमंत्री

22 सप्टेंबर सावन गरजेच्या वस्तूंचेर 5 टक्के आनी 18 टक्के हे दोनूच स्लॅब लागू जातले. हाचो वेवसायीक, उद्देजक हांचे सयत सामान्य मनशाक लाव जातलो. जीएसटीची नोंदणी प्रक्रिया 3 दिसांत पुराय जातली. तशेंच जीएसटी परतावो 7 दिसांत मेळटलो. शिक्षण, भलायकी सेवा हांचे वयलो जीएसटी 0 ते 5 टक्क्यां मेरेन आसा. जीएसटी उणो जाल्ल्यान विक्री वाडटली आनी येणावळींत वाड जातली. देशा सयत गोंयचे अर्थवेवस्थेक उर्बा मेळटली, अशें मुख्यमंत्री डॉ. प्रमोद सावंत हांणी सांगलें.