भांगरभूंय | प्रतिनिधी
सरकार खूबशे म्हत्वपूर्ण निर्णय घेत आसा. तातूंत मुखेलपणान जीएसटी उणी केल्ल्यान खूबश्या लाेकांक लाव जातलो हातूंत दुबाव ना. पूण जीएसटी सरकारानूच लायिल्ली आनी आतां ती उणी केली म्हणल्यार कितें? सगल्यांत पयलीं जीएसटीच्या माध्यमांतल्यान सरकाराची तिजोरी भरून गेली ही गजाल बरी आसा आनी आतां जीएसटी उणी केली म्हणल्यार म्हारगाय उणी जाली वा सर्वसामान्यांचें जगप आतां बरें भशेन जातलें अशें म्हणूंक येवचें ना. कारण जीएसटीचो सगलो पयसो लोकांच्या बोल्सांतल्यान वता. देशांतल्या 140 कोटी लोकांक खरेंच थाकाय दिवपाची आसत वा तांची जगपाची जीण बरी करपाची आसत जाल्यार सगल्यांत पयलीं केंद्र सरकारान आनी राज्य सरकारांनी म्हारगाय उणी करप सामकी गरजेची आसा. कारण देशांत म्हागायेचो भस्मासूर दिसानदीस वाडत आसा. हाचेर तोंडाक पानां पुसपाचें काम थोडोसो पगार, डीए (म्हारगाय भत्तो) ह्या माध्यमांतल्यान वाडोवन सरकारी कर्मचाऱ्यां कडल्यान सरकार आपली फाट थोपटून घेता. हाचो आयतो फायदो राजकी फुडाऱ्यांच्या पगारांनी आनी पेन्शनांनी जाता. पूण वेपारी वर्ग आनी भांडवलशाय वर्ग म्हारगाय वाडोवन सरकाराची सदांच दिशाभूल करीत आसता, आनी हाचो लाव कर्मचाऱ्यांक जायनासतना वेपाऱ्यांक व्हड प्रमाणांत जायत आसता. हाचें प्रायश्चीत देशांतले सर्वसामान्य, गरीब, शेतकार, दीसवड्या वेले कामगार हांकां म्हारगायेच्या रुपांत सदांच भोगचे पडटात आनी हाची झळ भलायकी, शिक्षण आनी जिणे गरजेच्या वस्तूंचेर पडून हाचें प्रायश्चीत पुराय कुटुंबाक वेगळ्या वेगळ्या रुपांनी भोगचें पडटा.
देशांतल्या कर्मचाऱ्यांच्या म्हारगाय भत्त्यांत जर एक टक्क्यान वाड जाल्ली आसली तरी ताचो वेपारी वर्ग व्हड प्रमाणांत फायदो घेवन पुराय भारतांत सगल्या वस्तूंचेर 20 टक्क्यांनी वाड करतात. हाचें प्रायश्चीत शेतकारां सयत सर्वसामान्यांक भोगचें पडटा. कारण सरकारी कर्मचाऱ्यांची डीए वाड लेगीत ना चे बराबरीन आसता. पूण शेतकारांक आनी सर्वसामान्यांक हाचो कांयच लाव जायना हेंवूय तितलेंच खरें. ताका लागून सरकारान म्हारगाय उणी करपा खातीर चडांत चड भर दिवंक जाय. एक तर देशांतले 95 टक्के सद्याच्या आनी आदल्या राजकी फुडाऱ्यांनी देशाचे घट्टण करून कोट्यांनी रुपयांची व्हड प्रमाणांत मालमत्ता सांठोवन दवरिल्ल्यान देशांत म्हारगाय, शेतकारांच्यो आत्महत्या, बेरोजगारी आनी शिक्षणीक समस्या अश्यो खूबश्यो समस्या व्हड प्रमाणांत वाडत आसात.
जाल्यार दुसरे वटेन देशांतली सुमार भायर म्हारगाय वाडिल्ल्यान हाचें प्रायश्चीत देशाची 140 कोटी लोकांक भोगचें पडटा. ताका लागून जीएसटीत उणाव करून खूब व्हडली कामगिरी केली अशें म्हणूंक येवचें ना, आनी जीएसटी बचत महोत्सव लेगीत म्हणूंक येवचो ना. देशांतले राजकी फुडारी जो मेरेन सर्वसामान्यां प्रमाण वागचे नात आनी रावचे नात तो मेरेन देशाची मुळावी उदरगत जावप कठीण आसा. ताका लागून सरकारान सगल्यांत पलयीं सद्याच्या आनी आदल्या राजकी फुडाऱ्यांक आळाबंद हाडूंक जाय. तांचे संपत्तीचेर आळाबंद हाडूंक जाय. तेन्नाच देश सुजलाम सुफलाम जातलो. तेन्नाच खरो बचत महोत्सव म्हणूंक येतलो आनी लोक लेगीत ताका मना पसून येवकार दितले. कांय कडेन सुदारणा जावपाची लेगीत गरज आसा. कारण सरकारान सगल्यांत पलयीं जीएसटी दर वाडयले आनी आतां उणें केले हाका लागून गरीब आनी सर्वसामान्यांक हाचो फायदो कितें? हाचोय राजकी फुडार्यांनी आनी सरकारान गंभीरतायेन विचार करपाची गरज आसा.
सरकारान जीएसटी दर जर संतुलीत दवरिल्लो जाल्यार आयज म्हारगाय नियंत्रणांत दवरूंक येतली आशिल्ली. ताका लागून आतां जीएसटीत उणाव करून म्हारगाय उणी जातली अशें म्हाका दिसना. आतां जीएसटी महोत्सव आनी हाचे पयलीं जीएसटी वसूल केली ताका कसलो महोत्सव म्हणप! असोय प्रस्न सामान्य लोकां मुखार उपस्थीत जाता. ताका लागून हो महोत्सव नासून पयली चड वसूल करप आनी उपरांत तो उणो करून स्वताची फाट थोपटून घेवप अशेंच म्हणचें पडटलें. प्रधानमंत्री म्हणटात, हांव स्वदेशी खरेदी करतां, हांव स्वदेशी विकतां ही भावना दरेका भारतीयाच्या मनांत रुजूंक जाय. तरूच विकासाक गती मेळटली. राज्य सरकारांनी आत्मनिर्भर भारत आनी स्वदेशी मोहिमेक फाटबळ दिवचें. ह्या प्रधानमंत्र्यांच्या उलोवपाक मना पसून येवकार आनी अशेंच जावंक जाय. देशांत स्वदेशीचो नारो हो 1947 सावनूच आशिल्लो. पूण भांडवलशाय वर्गान, उच्च दर्जीय लोकांनी आनी राजकी फुडाऱ्यांनी हांणीच पयलीं स्वदेशीचो नारो सोडून दिला आनी म्हारग विदेशी वस्तू खरेदी करपाक सुरवात केल्या आनी हाचेरूच चडांत चड भर दिला हाका कितें म्हणप! आतां आमी 21 व्या शेंकड्यांत वावुरतात. स्वदेशीचो वापर आमी जेन्ना म्हणटात तेन्ना हाची सुरवात देशांतल्या सद्याच्या आनी आदल्या पुराय राजकी फुडाऱ्या पसूनच जावंक जाय. कारण देशांतले दरेक सत्ताधारी, विरोधी पक्षाचे राजकी फुडारी 140 कोटी लोकांक आपल्या उलोवपांनी गिन्यान दीत आसतात. देशांतल्या दरेक राजकी फुडाऱ्यान दर म्हयन्याक जाहीर करूंक जाय की हांवें आनी म्हज्या कुटुंबांतल्या वांगड्यांनी ह्या ह्या विदेशी वस्तूंचो त्याग केला आनी स्वदेशी वस्तूंचो वापर करपाक सुरवात केल्या. आनी हेंवूय सांगपाक विसरचें न्हय की हाचे मुखार खंयच्याच विदेशी वस्तूंचो वापर करचे नात. तेन्नाच स्वदेशी खरेदी विक्रेक म्हत्व येतलें आनी खऱ्या अर्थान देशाची आत्मनिर्भर भारत जावपाचे दिकेन वाटचाल जातली. हाका लागून देशांतल्या स्वदेशी वस्तूंक चालना मेळपाक मजत जातली.
आयज देशांतल्या शेतकारांच्यो समस्या, शेतकारांच्यो आत्महत्या, बेरोजगारी, म्हारगाय, म्हारग शिक्षण, भलायकी सुविधांच्यो समस्या हाका जापसालदार देशांतले 95 टक्के राजकी फुडारीच आसात. आयज देशांतल्या 140 कोटी लोकांक कसली गरज आसा जाल्यार ती फक्त भलायकी आनी शिक्षण सुविधांची. सरकाराक भलायकीच्या दृश्टीकोनांतल्यान वा शिक्षणाच्या दृश्टीकोनांतल्यान कसल्योच नव्यो येवजण्यो हाडपाची गरज ना. सरकारान जर भलायकी सुविधा आनी शिक्षण सुविधा फुकट केल्यो जाल्यार देशांतले 140 कोटी लोक सरकाराचे आनी राजकी फुडाऱ्यांचे उपकारी उरतले. पूण तशें जायना. कारण देशांत सगल्यांत चड खाजगी हॉस्पिटलां आनी शिक्षणीक संस्था ह्यो राजकी फुडाऱ्यांच्यो वा भांडवलशाय लोकांच्यो आसात. जय हिंद.
रमेश लांजेवार,
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
