भांगरभूंय | प्रतिनिधी
मुख्यमंत्र्यांचो उलो; जीएसटी ही प्रधानमंत्र्यांची नवरात्रांची भेट
भांगरभूंय । प्रतिनिधी
पणजी : प्रधानमंत्री नरेंद्र मोदी हांणी कोट्यांनी भारतीयांच्या फायद्या खातीर जीएसटींत बदल केल्यात. ते वरवीं वेवसाया सयत जगपाचें सोंपेपण आयलां. जीएसटी 2.0 आयच्यान सगल्याक लागू जाला. जीएसटीचे चार स्लॅब उणे करून 5 आनी 18 टक्के अशे दोनूच दवरल्यात. गोंयांतले उद्देजक, वेपाऱ्यांनी हाचो फायदो गिरायकांक करून दिवचो, असो उलो मुख्यमंत्री डॉ. प्रमोद सावंत हांणी मारला. सोमारा मंत्रीमंडळ बसके उपरांत प्रसारमाध्यमां कडेन तांणी संवाद सादलो.
मुख्यमंत्र्यान सांगलें, आयजसावन शारदीय नवरात्रां सुरू जातात. फुडले णव दीस गोंयांतल्या विवीध देवळांनी नवरात्रां उमेदीन मनयतात. जीएसटी 2.0 ही प्रधानमंत्री मोदी हांणी सगल्या भारतीयांक दिल्ली नवरात्रांची भेट आसा. हे खातीर आमी तांचें तशेंच अर्थ मंत्री निर्मला सीतारामन हांचे उपकार मानतात. नव्या जीएसटी बदलाचो फायदो सरकारा परस गोंयकारांक जातलो.
मजगतीं, राज्य कर आयुक्त कार्यालयान नवे जीएसटी संबंदांत परिपत्रक काडलां. उद्देग आनी वेपार मळान उणो केल्ल्या जीएसटीचो फायदो लोकांक करून दिवपाचें मुख्यमंत्र्यान उलो मारला. गिरायकांक नव्या जीएसटीचो फायदो जाता हाची खात्री करचे खातीर खात्याच्या कर्मचार्यांक रिटेल दुकानांक भेट दिवपाचे आदेश दिल्यात. नवो दर लागू करिनात जाल्यार कायदेशीर कारवाय करतले. नव्या जीएसटी विशीं कांय कार्यालयां कडेन संपर्क सादपाचो उलो राज्य कर आयुक्त एस एस गील हांणी मारला.
‘गोंयांत गुंडागिरी सोंसून घेवचे ना’
रामा काणकोणकार हल्लो प्रकरणांत मुख्यमंत्र्यान सांगलें, ह्या प्रकरणांत पुलीस खोलायेन तपास करतात. आतां मेरेन 23 जाणांक ताब्यांत घेतल्यात. कांय जाणांक प्रतिबंधात्मक पद्दतीन धरल्यात. सगल्या गुन्यांवकारांक खर ख्यास्त जातली हाची खात्री आसा. गोंयांत गुंडागिरी सोंसून घेवचे नात. गोंय पुलिसांचें गुन्यांवांचो तपास लावपाचें प्रमाण बरें आसा, अशें डॉ. सावंत हांणी सांगलें.
ओंकाराक सुरक्षीत सुवातेर व्हरतले
गोंय, महाराष्ट्र, कर्नाटकाच्या रान खात्यांच्या समन्वयान ओंकार हतयार सुरक्षीत सुवातेर व्हरपाचे यत्न चालू आसात. हे विशीं गोंयचे रानां मंत्री कर्नाटक सरकारा वांगडा उलोवणी करता. ओंकारान गोंयांतल्या शेतकारांक केल्ले लुकसाणीची भरपाय दितले, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
