भांगरभूंय | प्रतिनिधी
भाजप : राहुलाक लागून न्हय, पुराय विचार करून 18 टक्क्यांचो निर्णय
भांगरभूंय । प्रतिनिधी
पणजी : जीएसटी 18 टक्क्यां मेरेन करपाचो निर्णय लोकांच्या हिता खातीर आनी पुराय विचार करून मंडळान घेतला. राहुल गांधी हांचे मागणेक लागून घेवंक ना. सरकारान बरे निर्णय घेतले काय ताचें स्रय घेवपाक काँग्रेस पक्ष फुडें आसता, अशें प्रदेश भाजप अध्यक्ष दामू नायक हांणी सांगलें.
पणजे भाजप कार्यालयांत तांणी पत्रकार परिशद घेतली. ह्या वेळार आदले आमदार सिद्धार्थ कुंकळ्येकार आनी सर्वानंद भगत हाजीर आशिल्ले.
जीएसटींत सुदारणा करपा सयत प्रक्रिया सुटसुटीत करपाचें उतर पक्षान जाहीरनाम्यांत दिल्लें. जाहीरनाम्यांत दिल्या आस्वासनाची सरकारान पूर्तताय केल्या. जाहीरनाम्यांत दिल्ल्या आस्वासनाक पाळो दिलो ना जाल्यारूय काँग्रेस पक्ष टिका करता. पाळो दिलो जाल्यार पयलीच मागणी केल्ली, अशें सांगता. एक देश, एक शुल्क ह्या तत्वाचेर जीएसटीची मूळ कल्पना आदले प्रधानमंत्री अटलबिहारी वाजपेयी हांणी 2000 वर्सा मांडिल्ली. प्रधानमंत्री नरेंद्र मोदी हांणी 2017 त ताची कार्यवाही केली. मदल्या काळांत देशांत काँग्रेसीची राजवट आशिल्ली. ह्या वेळार तांणी जीएसटी संकल्पने कडेन पुराय आडनदर केली, अशें प्रदेश भाजप अध्यक्ष दामू नायक हांणी म्हणलां.
जीएसटीक 8 वर्सां जातकच गरजेच्या वस्तूंचेर 5 टक्के आनी 18 टक्के अशें दोन स्लॅब दवरून जीएसटी मंडळान सामान्य लोकांक थाकाय दिल्या. विमो, जेवणाच्यो वस्तू, वखदां, शेतीचीं अवजारां हांचो जीएसटी उणो जाल्ल्यान गरीब मनशाक थाकाय मेळ्या. जीएसटी उणो जाल्ल्यान विक्री वाडटली आनी येणावळ लेगीत वाडटली. पर्यटना सयत गोंयच्या सगळ्या वाठारांक जीएसटी सुदारणांचो लाव जातलो, अशें तांणी सांगलें. कोमुनिदाद, सरकारी तशेंच आपले जमनींतलीं अनधिकृत घरां अधिकृत करपा खातीर गोंय सरकारान नवे कायदे केल्यात. जीएसटीक लागून घर सवाय जातलें. गोंय सरकाराचे म्हजें घर येवजणेक उर्बा मेळटली, अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
