भांगरभूंय | प्रतिनिधी
भांगरभूंय । प्रतिनिधी
पोरणे गोंयः एक वर्स आनी दोन म्हयन्या उपरांत जीएमसी वाठारांतल्या विस्थापीत गाडेवाल्यांक निमाणे दुकानां मेळ्ळी. पयल्या टप्प्यांत 20 लाबार्थ्यांक मुख्यमंत्री डॉ प्रमोद सावंत हाचे हस्तुकीं बांदकाम मंत्री नीलेश काब्राल, आमदार रूदोल्फ फर्नांडीस आनी उत्तर गोंय जिल्होधिकारी मामू हागे हाचे हाजेरेंत वितरण पत्रां भेटयलीं.
विस्थापीत गाडेवाल्यांची पुनर्वसणूक करपाच्या उतराक सरकारा पाळो दिला. जीएमसी वाठारांत येरादारी आडखळ करपी गाडे सरकारी यंत्रणेन मोडिल्ले. ह्या गाडेवाल्यांची पुनर्वसणूक करपा खातीर सरकारान 3 कोटी परस चड खर्च करून तांकां आतां नवी दुकानां बांदून दिल्यांत. तांचे कडल्यान म्हयन्याक 1 हजार रुपयांचें भाडें घेतले. दुसऱ्या टप्प्यांत बाकीच्या गाडेवाल्यांक दुकाना दितले अशें मुख्यमंत्री डॉ सावंत हांणी गाडे वितरण पत्रां दिवपा खातीर आयोजीत केल्ले कार्यावळींत उलयतना सांगलें. गाडेवाल्यांनी आतां रस्त्यार बसून माल विक्री करची न्हय. जिल्होधिकाऱ्यांची तांचेर नदर आसतली. अॅम्ब्युलन्सीक आडखळ जाता अशें दिसल्यार कारवाय करतले अशें तांणी ह्या गाडेवाल्यांक सांगलां.
ज्या गाडेवाल्यांक दुकानां मेळ्ळ्यांत तांकां ती दुसऱ्यांक भाड्यान दिवपाक मेळचीं नात. गाडेवाल्यांक वा तांच्या लागींच्या सोयऱ्यांक तीं चलोवपाक मेळटलीं. दुसऱ्यांक ती भाड्यान दिल्यांत अशें दिसून आयल्यार दुकाना सील करपाची शिटकावणी बांदकाम मंत्री नीलेश काब्राल हांणी दिल्या. दुकानांनी आशिल्ल्या व्हेन्टिलेशनाचो प्रश्न सुटावो करपा खातीर उपाय येजवण करतले अशें तांणी सांगलें. ही दुकानां मुख्यमंत्री रोजगार येवजणे खाला दिल्यांत अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
