भांगरभूंय | प्रतिनिधी
दुयेंत मनशाक हाॅस्पिटलांत व्हेलो काय ताचे लागीचें एके वेगळेच मानसिकतायेंत आसतात. तातूंत तांची काय चूक नासता, ह्या वेळार दोतोरान वा नर्सीन शापोतां सांगलीं वा उपचार करपाक उशीर केलो, जाल्यार दुयेंतीच्या घरच्यांक तिडक येताच. मागीर ते वाद घालतात वा लोकप्रतिनिधींक फोन करतात. हाॅस्पिटलांत काम करप्यांच्योय कांय फावटी अडचणी आसतात. पूण तरीय दोगांयनीय स्वताचेर नियंत्रण दवरप सगल्यांचेच भलायकेक बरें. अर्थांत हें सांगपाक सोंपें, पूण आमी मनीस म्हणटकच हातांतल्यान कळटां, नकळटां चुको घडटातूच. तेन्ना तिडकी सरशीं कसलीय कृती करतना प्रत्येकान स्वताचेर नियंत्रण दवरपाचो यत्न करपाक जाय. पयर जीएमसींत जें जालें, तें सगल्यां मुखार जावपाक जायनाशिल्लें. तेंय बी ज्युनियर दोतोर, दुयेंती मुखार उबे आसतना. दोतोराक केबिनांत व्हरून नेमकें कितें जालें तें समजून घेवन मागीर कृती करपाची. दोतोराक ताची बाजू मांडपाची संद दिवपाची. पूण व्हिडियो पळयतकच, भाटकार मुंडकाराक तापयता (अर्थांत तेंय चुकीचें) तशेंशें चित्र सगल्यांच्या दोळ्यां मुखार उबें रावलां आसतलें. हालीं मास्तरांक पसून विद्यार्थ्यांक तापोवपाक, मारपाक मेळना.
भलायकी मंत्र्यान मुलाखत, सोशल मिडिया वरवीं तोंडी आनी लेखी माफी मागल्या. पूण, रातीं उसरां मेरेन दोतोरांनी काम बंद आंदोलन फाटीं घेवंक नाशिल्लें. दोतोरांच्यो संघटणा म्हणटात, भलायकी मंत्र्यान घडणूक घडली थंय येवन दोतोराची जाहीर माफी मागची. जीएमसींत व्हीआयपी हस्तक्षेप, फोन काॅल्स बंद जावंचे, हाॅस्पिटलांतल्या खंयच्याच विभागांत व्हिडियो काडपाक परवानगी आसची न्हय!! ह्या मागण्यांचेर विचार जातलो अशें आस्वासन मुख्यमंत्री डाॅ. प्रमोद सावंत हांणी दिलां. भलायकी मंत्र्यान मिडिया सामकार आनी ‘एक्सा’चेर माफी मागल्या, तेन्ना संप फाटीं घेवचो, अशेंय म्हणलां. हाचे मुखार जीएमसींत असल्यो घडणुको घडच्यो नात, हाची जतनाय घेतले, अशेंय तांणी सांगलां.
जीएमसींची कार्यपद्दत (सिस्टम) सुदारपाची गरज आसा. भलायकी खात्याक प्रशासनांतले उणाव सोदचे पडटले. तेवटेन, सादो पांय मुरगळ्ळो वा फाटींत वाय भरलो जाल्यार हाॅस्पिटलांनी वचपी लोकांचोय आंकडो वाडला. तांकां आडावपाचो अधिकार कोणाक ना, पूण बारीकसारीक गजालीं खातीर हाॅस्पिटलाचे हुंबरे झरयले काय चड दुयेंत आशिल्ल्यांक ताटकळत रावचें पडटा. चडशे जीएमसींत बरें म्हणटात (जीएमसींत फावोर वा वळखी बगर कामां जायनात, अशें थोडे म्हणटात, तर कांय विभाग एकदम ‘बेस्ट’ आसात, अशेंय सांगपी आसात.) आनी थंय वतात, हाचो स्पश्ट अर्थ, गांवांतल्या मुळाव्या भलायकी केंद्रांनी सारको उपचार जायना वा थंय म्हत्वाचीं वैजकी उपकरणां नात. जीएमसींतल्या कांय विभागांनी उपचारा खातीर आदले दीस वा फांतोडेर लायनीक उबें रावचें पडटा खंय. ही गजाल खरी जाल्यार सरकारी यंत्रणेक हाचे फाटलीं कारणां सोदचीं पडटलीं. त्या विभागांतल्या दोतोरांचो आंकडो वाडोवचो पडटलो. आयज कसल्याय कामा खातीर लोकप्रतिनिधीचो वशिलो वा वळख लागता. जीएमसींतूय लोकप्रतिनिधींचे वशिले घेवन कांय दुयेंती येतात वा आमदारांचो फोन सरळ दोतोराक वता. मागीर ह्या दुयेंतींक प्राधान्य मेळटा. वखदां भायल्यान हाडचीं पडटात. कांय वेळार खाटीय मेळनात. तातूंत सगले कडेन म्हारगाय, भ्रश्टाचार, वशिलेबाजी….! सामान्य मनीस विटिल्लो आसता. भितरले भितर तो खदखदता आनी मागीर पाशियेंस काबार जावन बाॅम्ब कसो फुट्टा.
थळाव्या हाॅस्पिटलांंनी विवीध उपचार मेळत जाल्यार सगलेच दुयेंती जीएमसीची वारी करचे नात. कांय मुळाव्या भलायकी केंद्रांनी रातच्या आठा उपरांत लायटी पालयतात. दुयेंतींक ‘कॅरी फाॅरवर्ड’ करून व्हडल्या हाॅस्पिटलांनी धाडटात….नागरिकांक आनीक बरेंच कितें खबर आसतलें.
ईदाची सुटी आशिल्ल्यान ओपीडी बंद आशिल्ली. म्हणटकच जीएमसीचो बी 12 इंजेसांवाचो डोस घेवपाक दुयेंतीक कॅज्युअल्टी वाॅर्डांत हाडली. तेन्ना दोतोर आनी दुयेंतीच्या सोयऱ्या मदीं कितें तरी जालां आसतलें. मागीर ताणें भलायकी मंत्र्याक मॅसेज केली आनी फुडलें सगलें घडलें. नर्सीक इंजेक्शन दिवपाक सांगिल्लें जाल्यार प्रकरण थंयच सोंपपाचें. भलायकी मंत्र्याच्या काळांत जीएमसी आनी हेर हाॅस्पिटलांचो कारभार बरोच सुदारला, हें मान्य करपाक जाय. पूण तरीय राज्यभरांतल्या हाॅस्पिटलांनी कितें उणाव आसा, कितें सुविधा जाय ताचो नियाळ सरकार आनी दोतोरांच्या संघटणांनी घेवपाक जाय. नागरिकांनीय पंचायत, पालिकेक हे विशीं कळोवपाक जाय. हाॅस्पिटलांनी कागाळ पेटी आसता, थंयूय कागाळी, सुचोवण्यो करुं येतात. हाॅस्पिटलांच्या सेवा, सुविधांचें आॅडिटूय जावप गरजेचें.
हेर सरकारी कार्यालयां परस सरकारी हाॅस्पिटलांतल्या कारभाराची पद्दत, कर्मचारी, अधिकाऱ्यांची मानसिकताय वेगळी आसूंक जाय, हाचें भान हाॅस्पिटलांनी काम करप्यांनी दवरलें जाल्यार खूब प्रस्न सुटावे जातले. हाॅस्पिटलांतलें काम ही पगारा खातीर केल्ली नोकरी आसली तरी ती सेवा. म्हणटकच ती तेच तरेन करपाक जाय. दुयेंती, ताच्या घरच्यां कडेन गोड उलयल्यार अर्दो तणाव, हुस्कोच न्हय, तर दुयेंस पसून पळून वता. रोखडीच तिडक मस्तकाक पावता तसल्या व्यक्तींनी ह्या मळा पसून चार हात पयस राविल्लें बरें. आवड आशिल्ल्यांनीच वैजकी मळाचेर येवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
