जीएमसींतल्या दुयेंतींक मेळटलो आता मिलेटयुक्त आहार
भांगरभूंय | प्रतिनिधी
भलायकी मंत्र्यांचे हस्तुकी ‘आरोग्यम’चें उक्तावण
पणजी, प्रतिनिधी : नासणें, ज्वारी, बाजरी, मको अशा जीवनसत्वांनी भरिल्लें जेवण आतां गोंय वैजकी म्हाविद्यालयांतल्या (जीएमसी) दुयेंतींक मेळटलें. मिलेटयुक्त (भरड धान्य) जेवणाचें ताट दिवपी ‘आरोग्यम’ ह्या उपक्रमाची आयज सुरवात जाली. जीएमसी आनी सोडेक्सो हांच्या जोड पालवान ह्या उपक्रमाची कार्यवाही जातली.
‘आरोग्यम’ उपक्रमाखाला जेवणाच्या वळेंरीत 25 प्रकाराच्या भरड धान्यान तयार केल्ल्या पदार्थांचो आस्पाव आसतलो. अंदुचे 2023 वर्स संवसारीक मिलेट वर्स म्हणून मनयतात. संवसारीक मिलेट वर्साच्यो गोंयांतूय कार्यावळी जाल्यात. संवसारीक मिलेट (भरड शेती) वर्सा निमतान हो उपक्रम सुरू जाला. मिलेटयुक्त जेवण दिवपी जीएमसी हें पयलें हॉस्पिटल, अशें भलयाकी मंत्री विश्वजीत राणे हांणी म्हणलें.
उपक्रमाच्या उक्तावण कार्यावळीक राणे हांचे सयत डीन डॉ. शिवानंद बांदेकार, वैजकी अधीक्षक डॉ. राजेश पाटील, सोडेक्साचे संचालक शरद आनी विद्यार्थी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
