भांगरभूंय | प्रतिनिधी
22 डिसेंबराक निकाल, आचार संहिता लागू
1 ते 9 डिसेंबर मेरेन अर्ज भरपाक मेळटले
उमेदवारांक 5 लाख मेरेन खर्च करपाची मेकळीक
भांगरभूंय । प्रतिनिधी
पणजी : जिल्हो पंचायत (झॅडपी) वेंचणुकेचें वेळापत्रक शेनवारा जाहीर जालें. 20 डिसेंबराक गोंयांतल्या 50 झॅडपी मतदारसंघां खातीर वेंचणूक जातली. 1 ते 9 डिसेंबर मेरेन अर्ज भरपाक मेळटले. 11 डिसेंबराक अर्ज फाटीं घेवपाची तारीख आसतली आनी त्याच दिसा दनपारां उमेदवारांची वळेरी जाहीर करतले. 22 डिसेंबराक निकाल जाहीर जातलो. वेंचणुकेची आचारसंहिता पंचायत वाठारांनी लागू जाल्या, अशें राज्य वेंचणूक आयुक्त मिनीन डिसोझा हांणी सांगलें.
राज्य वेंचणूक आयोग आल्तीन पणजे आपयिल्ले पत्रकार परिशदेंत राज्य वेंचणूक आयुक्त मिनीन डिसोझा हांणी वेंचणुकेचें वेळापत्रक जाहीर केलें.
1 डिसेंबर ते 9 डिसेंबर 2025 ह्या दिसांनी सकाळीं 10 ते दनपारां 1 वरा मजगतीं वेंचणुके खातीर अर्ज भरपाक मेळटले. अर्ज भरपाचो काळ सात दिसां खातीर आसतलो. 3 डिसेंबराक भौशीक सुटी आनी 7 डिसेंबराक आयतार आशिल्ल्यान ह्या दिसांनी अर्ज भरपाक मेळचे नात, अशें डिसोझा हांणी सांगलें.
10 डिसेंबराक सकाळीं 10 ते दनपारां 3 वरां मजगतीं उमेदवारांची चाचपणी जातली. 11 डिसेंबराक सकाळीं 10 ते दनपारां 2 वरां मजगतीं उमेदवारांक आपले अर्ज फाटीं घेवपाक मेळटले. त्याच दिसा दनपारां 2 वरां उपरांत रिंगणांत आशिल्ल्या उमेदवारांची वळेरी जाहीर करतले. 20 डिसेंबराक सकाळीं 8 ते सांजेच्या 5 वरां मजगतीं झॅडपी वेंचणूक जातली आनी 22 डिसेंबराक सकाळीं 8 वरांचेर निकाल जाहीर जातलो, अशी म्हायती डिसोझा हांणी दिली.
वेंचणुकेची आचार संहिता 29 नोव्हेंबरा सावन सगल्या उत्तर गोंय आनी दक्षीण गोंय जिल्हो पंचायतींनी लागू जाल्या. पूण पालिका वाठार आनी पणजी महानगर पालिकेच्या वाठारांत येवपी वाठारांनी आचारसंहिता लागू जावची ना, अशें डिसोझा हांणी म्हणलें.
आचार संहितेची अंमलबजावणी खरसाणीन जाता काय ना हाचेर नदर दवरपा खातीर आयोगान घोळटे पंगड आनी थीर पाळत पंगड तैनात केल्यात. वेंचणुकेची प्रक्रिया सुरळीत आनी शांतिकायेन जावची हे खातीर पुलीस खात्यान अतिरिक्त पुलीस फौज तैनात केल्या. उमेदवारांक चडांत चड 5 लाख मेरेन खर्च करपाची मेकळीक आसा. बॅलट पद्दतीन मतदान जातलें, अशी म्हायती डिसोझा हांणी दिली.
उत्तर गोंयचे आनी दक्षीण गोंयच्या दरेकी 25 मतदारसंघांत झॅडपी वेंचणूक जातली. पक्ष पांवड्यार झॅडपी वेंचणुको जातल्यो, पूण अपक्ष उमेदवारांक वेंचणूक लडोवपाक मेकळीक आसा. वेंचणूक प्रक्रियेचेर नदर दवरपा खातीर एकंदरीत 15 सामान्य निरिक्षकांची नियुक्ती केल्या. जाल्यार उमेदवारां कडल्यान जावपी खर्चाचेर नदर दवरपा खातीर 15 खर्च निरिक्षक राज्य वेंचणूक आयोगान नियुक्त केल्यात, अशें डिसोझा हांणी सांगलें.
सध्या चालू आशिल्ले एसआयआर प्रक्रियेक लागून हे प्रक्रिये खातीर वेंचिल्लो जिल्हो वेंचणूक अधिकारी आनी सहाय्यक वेंचणूक अधिकाऱ्यांक झॅडपी वेंचणुकेचे प्रक्रियेंत तांचो आस्पाव करूंक ना. एसआयआर प्रक्रिया सुरळीत जावची हे खातीर झॅडपी वेंचणुके खातीर वेगळ्या अधिकाऱ्यांची निवड केल्या. एसआयआर प्रक्रियेक लागून झॅडपी वेंचणुकेचे प्रक्रियेक आडमेळी येवंक ना, अशें डिसोझा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
