भांगरभूंय | प्रतिनिधी
झेंडावंदन करचें काय ड्युटेर वचपाचें ?
भांगरभूंय । प्रतिनिधी
पणजी : गोंयांत 20 डिसेंबराक जावपी जिल्हो पंचायत वेंचणुकेचे फाटभुंयेर एक शिक्षक आशिल्ले शाळेंतल्या शिक्षकांची व्हड कोंयडी जाल्या. गोंयांतल्यो जिल्हो पंचायत वेंचणूक 20 डिसेंबराक जाल्यार आदल्या दिसा 19 डिसेंबराक गोंय मुक्ती दीस आनी त्याच दिसा वेंचणूक प्रक्रियेंत वांटो घेतिल्ल्या कर्मचाऱ्यांनी संबंदीत मतदान केंद्रांचेर वचप सक्तीचें आसा. मागीर एक शिक्षकी शाळेच्या शिक्षकांनी शाळेंत झेंडावंदन करचें काय वेंचणूक ड्युटेक वच्चें ह्या द्विधा मनस्थितींत शिक्षक सांपडल्यात.
गोंयांतल्या कांय सरकारी मुळाव्या शाळांनी फक्त एक वा दोनूच शिक्षक सेवा दितात. अशे स्थितींत 19 डिसेंबराक सकाळीं मुक्तीदिसाचे कार्यावळीची जापसालदारकी तांचेर आसतना राज्य वेंचणूक आयोगान दिल्ले ड्युटेर हाजीर रावप सक्तीचें केलां. ते खातीर शाळांनी मुक्तीदिसाचे कार्यावळीची जापसालदारकी कोण घेतलो, हो प्रस्न उपस्थीत जाला.
शिक्षक वर्गां मदीं हे विशीं खर नाराजी पातळ्ळ्या. दरेके वेंचणुकेक शिक्षकांक पिळून खावपाची पद्दत जाल्या. आदीं शिकोवपाचें काम, मागीर विवीध सर्व्हे, एनईपीचे वर्ग आनी आतां गोंय मुक्तीदिसा वेंचणूक ड्युटेर वचपाक आमकां आडखळीचें जालां, अशी भावना शिक्षकांनी उक्तायल्या.
जर शाळेंत झेंडा वंदनाक हाजीर रावले ना जाल्यार गोंय मुक्तीदिसाची कार्यावळ कोण सांबाळटलो, असोय प्रस्न कांय शिक्षकांनी उपस्थीत केला. दुसरे वटेन वेंचणूक ड्युटेर उसरां पावले जाल्यार कायदेशीर कारवायेचो धोको निर्माण जातलो. हे खातीर शिक्षकांक दोनूय वटांनी चेपण आसा.
‘झेंडावंदन खात्याचे कर्मचारी करपाक शकतात’
ज्या एक शिक्षकी सरकारी शाळेच्या शिक्षकाक वेंचणुकेच्या कामाक घातला, ताणें ह्या संबंदांत संबंदीत सहाय्यक जिल्हो शिक्षक निरिक्षकाक (एडीआय) हे विशीं कळोवचें. ताका लागून 19 डिसेंबराक संबंदीत शाळेंत झेंडावंदना खातीर हेर शिक्षक वा संबंदीत खात्याच्या कर्मचाऱ्या कडल्यान झेंडावंदन करून घेवपाक मेळटा, अशें राज्य शिक्षक संघाचे उपाध्यक्ष सीताराम नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
