भांगरभूंय | प्रतिनिधी
प्रलंबीत 4.5 कोटी प्रशासकीय निधी मेळयलो
मडगांव : धा वर्सां परस चड काळ पालिकेंत काम करपी दिसावड्याच्या कामगारांक नोकरेंत कायम करपाचो निर्णय सरकारान घेतला. तेच प्रमाण सात ते धा वर्सां परस चड काळ जिल्लो पंचायतींत कंत्राटी पद्दतीन काम करपी लोकांकूय कायम करपाची मागणी सरकारा कडेन करतले अशी म्हायती अध्यक्ष अनिता थोरात हांणी दिली.
दक्षीण गोंय जिल्लो पंचायतीची बसका अध्यक्ष अनिता थोरात हांचे अध्यक्षते खाला जाली. दक्षीण गोंय जिल्लो पंचायतीचो प्रशासकीय निधी आनी पंदराव्या अर्थ आयोगाचो निधी प्रलंबीत आसा अशें थोरात हांणी सांगलें. फॉलोअप करुन 4.5 कोटी रुपयांचो प्रशासकी निधी मेळयलो. हातूंतल्यान उरिल्लीं बिलां फारीक करून गरजेचें सामान आनी कार्यालयाचें नूतनीकरण करतले. ह्या प्रशासकीय निधींतल्यान जिल्लो पंचायत कार्यालयांत कंत्राटदारांचे बिल भरप, कार्यालयांत नवे संगणक विकतें घेवप आदीं वेगवेगळी कामां करतले अशें थोरात हांणी सांगलें.
तिसरो जिल्लो करपाचो निर्णय राज्य सरकारान घेतला. ताचेर हे बसकेंत चर्चा जाली. वांगड्यांनी वेगवेगळी मतां मांडली. ती सरकारा मेरेन पावयतले आनी बेगीन नवो जिल्लो तयार करचो अशी मागणी करतले. एसटी समाजा खातीर राजकी आरक्षणाचो प्रस्न सुटावो जालो. रस्ताद सुण्यांचो विशय चर्चेक आयिल्लो. हे खातीर सुण्यांक लस दिवची आनी हेर उपाय करचे अशी मागणी जातली. तशेंच जिल्लो पंचायत वांगड्याच्या निधींतल्यान फॉगिंग आनी तण कापप करपाक जाय अशेंय ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
