भांगरभूंय | प्रतिनिधी
आयच्या ह्या धांवपळीच्या जगांत मनशाचें जिवीत भोवूच घुस्पागोंदळाचें जालां. आयज आमचे मदल्या जायत्या जाणांक रातीं कडेन न्हिदेच्यो गुळयो घेवच्यो पडटात, आनी दिसा वयलीं मनोबल वाडोवपाक उर्बांची गरज लागता. मनशान आपल्याच संबंदान चिंतप ही गजाल सगलो खेळ इबडायता. फक्त स्वता भोंवतणच्याच चिंतनांनी रमप ही गजाल मनशाची शक्त, उमेद आनी सर्जनशीलताय आटयता. हाका लागून चुको घडटात. कामां बाबत जातात आनी पदरांत अपेसां येतात.
भगवत गीता तुका यज्ञाचे वृत्तीन काम कर म्हूण सांगता. यज्ञ म्हळ्यार उंचेलो हावेस हातासपा खातीर त्यागमय भावनेन केल्लें कर्म. आमचें हें पुराय विश्व ह्या यज्ञमय वृत्तीन चलिल्लें दिश्टी पडटा. सूर्य आमकां मोलादीक असो उजवाड आनी हुनेत दिता. फुलां परमळ दितात. सुकणीं-सवणीं गायतात. मोर नाचतात आनी न्हंयो आमकां जिवीत दितात. एक मनीसजात सोडून सैमांतलो खंयचोच दुसरो घटक सुवार्थी हेतान काम करिनात. मजा म्हणल्यार फक्त हीच जात उतळताप आनी अस्वस्थताय भोगता! गितेंत भगवान श्रीकृष्ण भर दिवन सांगता की तुका येस, सूख आनी आध्यात्मीक उदरगत संपादन करूंक जाय जाल्यार निसुवार्थी वृत्तीन काम कर म्हूण. सुवार्थ फक्त दुख्खां दिता.
जण एकलो मनीस खासा आपणा खातीर एक खाशेलो गूण घेवन जल्माक येता. ती ताची प्रतिभा आसता. तुजी प्रतिभा कितें? तुजो उपजत गूण सोदून काड. ही गजाल परिवर्तन घडोवपाची आसा. Game – Changer आसा. जर सचीन तेंडुलकर सीए जाल्लो वा नडलान धंदो घाल्लो जाल्यार संवसार दोग पकदस्त खेळगडे व्हडगडायतलो आसलो. तुज्या आवडीचो एक बळिश्ट असो हावेस नदरे मुखार दवर. उपरांत अथक यत्न करून धिटायेन आनी चिकाटेन तुजी मोख साध्य करपाक दीस-रात वावूर. तुका आवडपी फिल्मांक, खाणा-जेवणां आनी इश्टा वांगडो भोंवड्यो हाचो त्याग कर. तुजीं सगलीं कर्तुबां तुज्या ध्येया वशीन एकवटीत कर. येस सोंपेपणीन गावना हें मतींत दवर. नामनेचो बास्केटबॉल जैतिवंत कोबे ब्रायंट सद्दां फांतोडेर चाराक उठून तालीम करतालो. क्रिकेटर, पेलवान आनी संगीतकार हे आपणालीं सपनां फळादीक जावपा खातीर सुमारा भायर कश्ट घेतात. तुमी आसात व्हय तयार अशी मेहनत करपाक?
तुजे बुद्दीक सारकी धार काड. बुद्द तर्क करता, अनुमानां काडटा आनी जिणेंतल्या आडमेळ्यांतल्यान मार्ग काडटा. जेन्ना बुद्द तुज्या कर्तुबांक तुज्या हावेसा वशीन वळयता तेन्ना जादा शक्त निर्माण जाता. तुज्या हावेसाचेर निश्ठा दवर. ताची उपासना कर. ताचेर मोग कर, आनी ताचे खातीर एक सारको वावरत राव. तुजें काम एक चित्तान कर आनी तें करता आसतना आदल्या अपेसांक लागून वा मुखा वयल्या विवंचनांक लागून खासाक निरशेवंक दिवं नाका.
हाचो परिणाम मागीर अजापिणो जातलो. कोणूच एकलो-एकसुरो व्हडविकाय जोडूंक शकना. एखादें जैत प्राप्त करपाक सांघीक वावर team work भोवूच म्हत्वाचो आसता हें मतींत धर. उंचेलो हावेस सादपा खातीर तुज्या सहकाऱ्यांक उर्बा दी. तांचे कडेन मोगान आनी आपलेपणान वाग. तांकां पटोवन दी की व्हड उद्दिश्ठ गांठपा खातीर कामार उमेदीन येवंक जाय म्हूण. फक्त पगारा खातीर न्हय म्हूण. वांगडच्यां कडेन मेकळेपणान उलय. तांच्या बऱ्या वावरांची तुस्त तोखणाय कर. ते तुका निश्चीत साथ दितले आनी उद्दिश्ठ प्राप्ती खातीर वावुरतले. हाका लागून सकारात्मक प्रभाव बळिश्ट जातलो.
आयज समाज जैत जोडप म्हळ्यार पयशे करप अशें समजता. तशें जाल्यार जैत हें फक्त भौतीक गिरेस्तकाये पुरतेंच सिमीत आसा व्हय? गीता सांगता की, खरेलें जैत हें संपत्ती पयल्यानचें आसा. तें सूख आनी सवस्तकायेचें आसा. तूं तुज्या मानसीक सूख-समाधाना खातीर आनी आध्यात्मीक उदरगती खातीर वावर. मागीर संपत आपसूक तुजे फाटल्यान चलून येतली.
तुजे कडेन जी असीम आनी अव्यक्त ताकद आसा ती भायर काडपाक तूं तयार आसा व्हय? आयजूच कामाक लाग. तुजी नदर जी घेवपाचेर आसा ती दिवपाचेर दवर. तुजी आवड सोदून काड. भोवूच मेहनत कर आनी हेरांक सांगाताक घेवन वावराक लाग. स्वताक सोदपाचे हे भोंवडेन वेंगाय. तुजें स्वताचें जिवीत बदलपाचे आनी हेरांकूय ते नदरेन स्फूर्त दिवपाचें बळगें तुजे भितर आसा. सर फुडें.
मूळ लेखिका: जया रोव
प्रदीप लवंदे
9923292022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
