भांगरभूंय | प्रतिनिधी
आयज- कालची जिणेशैली पळयल्यार जाण्टे, कुटुंबांतले वांगडी हांच्या संवादा पसून पयस- पयस रावप सुरू जालां. एकमेकां वांगडां मोगान, एकवटान रावपाची गजाल सोंपिल्ले सारकी दिसता. तुमकांय अशेंच दिसता आसतलें. कारण अश्यो गजाली सांगिल्ल्यो, पळयिल्ल्यो दोळ्यां मुखार उफेवंपाक लागतात. जर तुमची सून एकत्र कुटुंबांतल्यान आयिल्ली आसत तर तिका आपल्या भुरग्याचे आजी- आज्यान केल्ल्या लाडाचें व्हडलेशें कांय दिसचें ना. पूण तशें नासत आनी सून जर आधुनिक विचारांची आसत जाल्यार तिका आजी- आज्यान केल्ले लाड आवडचे नात. ती वेगळें बिराड करूया म्हूण आपल्या घोवाचे फाटीक लागतली. पूण, ती नोकरी करपी नासत जाल्यारुच. नोकरी करपी सुनेक आजी- आज्यान नातरांच्या केल्ल्या लाडां कडेन आडनदर करची पडटा. कारण नोकरेक लागून घरा भायर आशिल्ल्यान भुरग्यां कडेन मायेन लक्ष दिवपी दुसरे कोण नासतात.
दुसऱ्या 40 वर्सांच्या काळांत तुमची जोडीदार घडये तुमकां सोडून गेल्ली आसल्यार तुमी एकटे पडिल्ले आसतात. उपरांत मात तुमच्या जिवितांतले रंग ल्हवू ल्हवू निवळपाक लागतात. आतां येता जिणेंतलो उरिल्ली वांटो म्हणजे पिराय 75 वर्सां पसून फुडले पिराये मेरेनचो काळ. कोणूय चुकूनच शंबरी हुपता. जर तुमी अनियमीत आसत, खावपा- पिवपाचेर तुमचो ताबो नासत जाल्यार दुयेंसां येतात आनी तुमी घरांतल्या कोणाकूच नाकाशे जातले. कारण तुमकां जाय, नाका तें पळोवपाक तत्पर आशिल्ल्या तुमच्या जोडीदाराक घडये मरण आयिल्लें आसता. अशा वेळार दीस व्हडले दिसतात आनी रातीं सोंपून सोपनात. ताका लागून तुमी अगतीक जावंक नात, तरुच अजाप.
पिराय 80 वर्सां हुपून मुखार वतना तुमच्या जिवाक अदींमदीं बरें नासूं येता. आपूण कितें मेळयलें आनी कितें वगडायलें हाचो नियाळ घेवपाचो हो काळ. तुमी बरेंच जोडिल्लें आसतलें, पूण बरेंच वगडायिल्लेंय आसतलें. करपाच्यो रावन गेल्यो अश्यो कितल्योशोच गजाली आसतल्यो आनी तांची याद येवन तुमी हळहळटले. हाचें कारण म्हणल्यार आयचें काम फाल्यांचेर धुकलू नाकात. फाल्याचें काम आयज करात आनी आयचें काम आतांच करात. ह्या सुभाशिताक पाळो दिवंक ना म्हूण आतां पश्चाताप करपांत अर्थ ना. उरिल्ले- सुरिल्ले दीस दुयेंत जावन हातरुणांत पडनासतना तुमी त्रासां बगर वच्चे आनी हेरांक कश्ट पडचे न्हय, अशी तळमळ तुमी बाळगिली जाल्यार तातूंत चुकीचें कितें? आनी मागीर असोच एक दीस उजवाडटलो आनी तुमी पृथ्वी वयलो मुक्काम हालोवन चित्रगुप्ताच्या दरबारांत हाजिरी लायतले, हांगा जीं कितें बरीं, वायट कामां तुमी केल्लीं आसत ताची जाप दिवपाक.
– गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
