भांगरभूंय | प्रतिनिधी
पणजीः लोखण धातुंच्या खणींतल्यान पयशे काडपाचें सपन दाखोवन कोटी रुपयांची तोपी घालपी ‘जिवा मायन्स अँड मिनरल्स लिमिटेड’ कंपनी आड ईडीन कारवाय केल्या. गोंयच्या अर्थीक गुन्यांव फांट्यान सुरू केल्ली चवकशी हातांत घेवन ईडीच्या पणजी विभागीय कार्यालयान ह्या प्रकरणांत सुमार 2 कोटी 29 लाख रुपयांची तीन स्थावर मालमत्ता तात्पुरती जप्त केल्या. मनी लाँड्रिंग प्रतिबंधक कायद्या (PMLA) खाला ही कारवाय केल्या. हातूंत दुबावितांनी चीनी कंपनीची 13.42 कोटी रुपयांची फटवणूक केल्ल्याचें उक्तें जालां.
2010 वर्सा ‘जिवा मायन्स’ च्या धनयांनी चिनच्या ‘मेसर्स लाओ टिंग दादी मोबायल कंपोनंट्स’ नांवाच्या कंपनीक खाण कामांत भागीदारी करपाचें हांयस दाखयलें. आपलें कडेन खणींचे मालकी हक्क आसात आनी व्हड प्रमाणांत लोखण धातुक निर्यात करूं येता अशें तांणी कंपनीक सांगलें. हाचेर विस्वास दवरुन कंपनीन सुमार 2.95 दशलक्ष डॉलर (सुमार 13.42 कोटी रुपया) ‘जिवा’ कडेन दिले.
पूण पयशे हातांत येतकूच खणकाम आनी निर्यात कांयच जाले ना. दुबावितांनी हे सगळे पयशे स्वताचे सुविधे खातीर आनी मालमत्ता खरेदी करपा खातीर पद्दतशीरपणान वळयले अशें ईडी तपासांतल्यान मुखार आयलां. ‘बँक ट्रेल’ च्या विश्लेशणा वरवीं ह्या पयशांचे लेयरिंग आनी डायव्हर्जन उक्ताडार आयलां. ह्या पयशांनी दुबावितांनी मुंबय आनी सिंधुदुर्गांत आपल्या नांवान जमनी विकत्यो घेतल्यो.
ईडीन जप्त केल्ल्या मालमत्तेंत सिंधुदुर्ग जिल्ह्यांतल्या सावंतवाडींतल्या गालेल वाठारांतल्या दोन जमनींचें भूखंड आनी मुंबयच्या अंधेरी (अस्तंत) वाठारांतल्या एका आलीशान निवासी फ्लॅटाचो आस्पाव आसा. गोंय अर्थीक गुन्यांव फांट्यान हाचे पयलीं फटवणुकीचो गुन्यांव नोंद करून आरोपपत्र दाखल केल्लें, ताचेर आदारुन आतां ईडीन तात्पुरती मालमत्ता जप्त करपाची कारवाय केल्या. सध्या ह्या प्रकरणाची फुडली चवकशी चलता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
