भांगरभूंय | प्रतिनिधी
दृश्टी मरिना कडल्यान फाटल्या सप्तकाचो नियाळ
पणजीः गोंयच्या दर्यादेग वाठारांनी फाटल्या सप्तकांत दृश्टीच्या जिवरक्षकांनी एका बायलेक आत्महत्या करतना आडावन तिका वाटायली. तशेंच एका बायला पर्यटकाची पिडणूक जातना हस्तक्षेप करून परिस्थिती नियंत्रणात हाडली. तशेंच दर्यांत बुडपी एका मनशाचो जीव वाटायलो आनी चार जखमी जाल्ल्या पर्यटकांक मुळावे उपचार दिले अशी म्हायती दृश्टी मरिन्स लायफ सेव्हर्स हांणी दिली.
फाटल्या एका सप्तका भितर मोरजे दर्यादेगेर बंगळुरूचो 40 वर्सा पिरयोचे पर्यटक ल्हारा वांगडा खेळटना खोल उदकांत गेलो. ड्युटीचेर आशिल्ल्या जिवरक्षकांनी धांव घेवन ताका दर्यांतल्यान भायर काडलो.
बागा दर्यादेगेर एका मध्य प्रदेशांतल्या पर्यटकान एका विदेशी बायल पर्यटकाचो तिचे परवानगी बगर फोटू काडिल्ल्याचें बीच मार्शलाचे नदरेक आयलें. तांणी ताका आडावन हे विशीं पुलिसांक कळीत करून ताका पुलिसांचे सुवादीन केलो.
मजगतीं, बागा दर्यादेगेरच बीच मार्शलाक एका शॅका कुशीक शेणिल्लो गुगल पिक्सल मोबायल सांपडलो. तांणी तो प्रामाणीक रितीन पुलिसांचे हाजेरींत धनया कडेन परतून दिलो. जाल्यार गस्ती मजगतीं जिवरक्षकांक एक आयफोन सांपडलो आनी तांणी तो पुलीस कर्मचाऱ्या कडेन सुपूर्द केलो. तसोच पर्यटकांचो शेणिल्लो मोबायल सोदून परतून केलो.
कळंगूट दर्यादेगेर मध्य प्रदेशातल्या 28 वर्सा पिरायेचो पर्यटक दर्यादेगेर भोंवतना ताचो पांय रेंवेंत आशिल्ले कंवचेर पडिल्ल्यान ताच्या पांयाक गंभीर जखम जाली. जिवरक्षकांनी वेळ व्हगडायनासतना ताका मुळावे उपचार दिले.
कांदोळे दर्यादेगेर राजस्थानगची 18 वर्सा पिरायेची बायल पर्यटक आपल्या इश्टा वांगडा दर्यादेगेर भोंवतना तिका परत परत ओंकारी येवन तिका स्वास घेवपाक त्रास जातालो. सुवातेर आशिल्ल्या जिवरक्षकांनी बेगोबेग मजत करून तिका मुळाव्या उपचारा सयत अॉक्सिजनाची सुविधा दिली. उपरांत एम्बुलन्सींत घालून तिका म्हापशे जिल्हो हॉस्पिटलांत दाखल केली.
कोलवें दर्यादेगेर, दर्या पर्यटकां खातीर बंद करपाच्या वेळार बिहारची 25 वर्सा पिरायेची बायल केस्तांवां जाले उपरांत जेट-स्की लागसार रडटना दिसून आयली. ह्या वेळार ती जीव दिवंक आयिल्ल्याचे तिणें उक्तें केल्ल्यान स्थिती गंभीर जाली. जिवरक्षकांनी बेगोबेग पुलिसांक कळीत केलें. मजगतीं, ही बायल अचकीत गायब जाली. उपरांत सोद मोहीम राबोवन ती कुशीक आशिल्ल्या जार्दीनांत सांपडली. उपरांत पुलिसांनी तिका फुडले चवकशी खातीर पुलिस स्टेशनार व्हॅली.
कोलव्यां एका वेगळे घडणुकेंत पर्यटकांचो शेणिल्लो मोबायल सोदून सगली पडटाळणी करून धनयाक परतून केलो. जाल्यार गस्त घालतना बीच मार्शलाक सुणो चाबलो. ताका बेगोबेग भलायकी केंद्रांत व्हॅलो.
बाणावले दर्यादेगेर कर्नाटकाचो एक स वर्साचो भुरगो शेणिल्लो नदरेक आयलो. जिवरक्षकांनी रोखडेंच ताच्या पालकांचो सोद घेवपाक सुरवात केली. गरजेचे पडटाळणी केले उपरांत भुरग्याक ताच्या पालका कडेन परतून केलो.
तशेंच बाणवाले बिहारचो एक 25 वर्सा पिरायेचो पर्यटक दर्यांत पेंवतना ताच्या दोनूय धोंपरांक जखम जाली. जिवरक्षकांनी ताका उदकांतलो भायर काडून ताका मुळावे उपचार दिले.
पाळोळ्यां दर्यादेगेर अरुणाचल प्रदेशाचो 14 वर्सा पिरायेचो भुरगो खडपा वेल्यान निसरून पडलो आनी उजव्या हाताक गंभीर जखम जाली. जिवरक्षकांनी ताका मुळावे उपचार दितकच वैजकी तपासणी करपाचो सल्लो दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
