भांगरभूंय | प्रतिनिधी
घटकराज्य दिसा निमतान आयएमबींत व्याख्यान
भांगरभूंय । खबरां मेज
पणजीः 18व्या शेंकड्यांत उत्तर हिंदुस्तानांत मराठा समाजाचें फुडारपण महादजी शिंदे हांणी केलें. गोंय आनी कोंकणांतले तांचे सांगाती आशिल्ले. गोंयांतल्या 12 तले 8 म्हाल शिवाजी म्हाराजांच्या राज्याचे भाग आशिल्ले. महादजी शिंदे हांच्या फाटल्यान जिवबादादा केरकार घट उबे रावूंक नाशिल्ले जाल्यार आयज भारताचो इतिहास वेंगळोच आसपाचो, अशें नामनेचे शिल्पकार तशेंच गोंय मध्ययुगीन इतिहास संशोधक सचीन मदगे हांणी सांगलें.
इंदिरा गांधी राष्ट्रीय कला केंद्र, हेरिटेज कनेक्ट ट्रस्ट आनी इन्स्टिट्यूट मिनेझीस ब्रागांझा (आयएमबी) हांच्या जोडपालवान आयएमबी सभाघरांत गोंयच्या घटक राज्य दिसा निमतान पक्षी बहादूर जिवबादादा केरकार हांचे जिणेचेर आयोजीत केल्ल्या व्याख्यानांत सचीन मदगे मुखेल सोयरे म्हूण उलयताले.
जिवबादादा हांचो जल्म 1740 त जाल्लो आसपाक जाय. बाटाबाटीच्या काळांत ते पेडण्यां गेले. उत्तर हिंदुस्थानांत हेवेदावे सोडोवपाचो वावर जिवबादादांनी कसो केलो हें स्पष्ट करतना तांणी सांगलें, 1795 त निजाम- मराठ्यांच्या खरड्याच्या झुजांत मराठे जिखले, ताचें स्रय जिवबादादांक वता. त्या झुजाचे आंगार कांटो हाडपी प्रसंग आसात. पितांबर शेणवी गुळगुळे, रामचंद्र सुखठणकार, जिवबादादा केरकार अश्या म्हान विरांचो आमकां विसर पडला, अशें मदगे हांणी सांगलें.
वरद सबनीस हांणी सांगलें, गोंयांत आनी भारतांत खूबशे पराक्रमी जावन गेले, तांची इतिहासांत नोंद ना. वास्को द गामा हांणी भारताचो सोद लायलो, हें कितलो तेंप आमी सांगतले? आमच्या अखंड इतिहासांत सगळ्यांत आदीं उठाव जालो तो गोंयांत आनी सगळ्यांत निमाणें मुक्त जालें ते गोंय. इंडोनेशिया, ब्राझीलची भास, संस्कृती नश्ट जाली, पूण इल्ल्याशा गोंयांत 450 वर्सांचे पुर्तुगेज राजवटींत गेलीत भास, संस्कृती तिगून उरल्या. आमी इतिहास विसरत चलिल्ल्यान संस्कृतीचें लुकसाण जाता, अशें सबनीस हांणी सांगलें.
दशरथ परब हांणी सांगलें, म्हान पुरुशांनी त्या काळार व्हड वावर करून दवरला. दादा वैद्य, भाऊ दाजी लाड, अ. का. प्रियोळकार हांच्या वावराची वळख म्हाविद्यालयां, विद्यापिठांतल्यान करून दिवपाक जाय.
इंदिरा राष्ट्रीय कला केंद्रा विशीं राजेंद्र देसाय हांणी म्हायती दिली. इतिहास, कला, संस्कृती, दायज ह्या संबंदांत हें केंद्र वावर करतलें, अशें राजेंद्र देसाय हांणी सांगलें. योगेश नागवेंकार हांणी सांगलें, संवसाराचें फुडारपण करपाची तांक आमचे कडेन आसा. गोंयचो इतिहास, संस्कृती राष्ट्रीय, आंतरराष्ट्रीय पांवड्याचेर व्हरपाचो आमचो यत्न आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
