भांगरभूंय | प्रतिनिधी
-भाशा संशोधन विभाग स्थापन करपाक मंत्रीमंडळाची मान्यताय
पणजी : उत्तर गोंय जिल्हो हॉस्पिटल तशेंच दक्षीण गोंय जिल्हो हॉस्पिटलांत फुडल्या दोन म्हयन्यांत आयसीयू विभाग सुरू जातलो. कंत्राटी पद्दतीन दोतोर तशेंच कर्मचाऱ्यांची भरती करपाक मंत्रीमंडळान मान्यताय दिल्या.
मंत्रालयांत आयज मंत्रीमंडळाची बसका जाली. मंत्रीमंडळ बसके उपरांत पत्रकार परिशदेंत मुख्यमंत्री डॉ. प्रमोद सावंत हांणी मंत्रीमंडळाच्या निर्णयांची म्हायती दिली. राजभास संचालनालयांत भाशा संशोधन विभाग सुरू करपाक मंत्रीमंडळान मान्यताय दिल्या. तशेंच सौर विजेचेर चलपी शेतकारां खातीर उदकाच्या पंपांक अनुदान दिवपी कुसुम येवजणेक मान्यताय दिली. पर्वरी फ्लायओव्हर उबारपा खातीर येरादारी वेवस्थेत बदल जातलो. येरादारी बदलाच्या आराखड्याक मंत्रीमंडळान मान्यताय दिली.
जुवारी, शापोरा आनी मांडवी न्हंयेंत परंपरीक पद्दतीन रेंव काडपा खातीर परवानो दिवपाची प्रक्रिया एका म्हयन्यान सुरू जातली. भायल्या राज्यांतल्यान रेंवेचे ट्रक येवपाक सुरवात जाल्या, अशें मुख्यमंत्री डॉ. प्रमोद सावंत हांणी सांगलें.
बेकायदाे जमीन बळकावप प्रकरणांत न्यायमूर्ती जाधव हांणी दिल्लो अहवाल सरकारान स्विकारला. अहवालांतल्या सुचोवण्यांची कार्यवाही जातली. हडप केल्ली सरकारी आनी धनी नाशिल्ल्यो जमनी सरकार ताब्यांत घेतले.
अयोध्येत 22 जानेवारी दिसा रामाच्या मुर्तीची प्रतिश्ठापना जातली. हे दिसा सरकारी कर्मचाऱ्यांक सुटी जाहीर जाल्या. शाळा आनी विद्यालयांक लेगीत हे दिसा सुटी आसतली. राममूर्ती प्रतिश्ठापना सुवाळो सगळ्यांक पळोवप शक्य जातलें, हो हाचे फाटलो हेत आसा.
गोंय वैजकी म्हाविद्यालय हॉस्पिटलांत दिव्यांग केंद्र सुरू जालां. ह्या केंद्रा वरवीं सगळ्या दिव्यांगांक मुफत उपकरणां मेळटली. आयज ह्या केंद्राचें उक्तावण जालें. सिकेरी जाल्ल्या चार वर्सांच्या भुरग्याच्या खून प्रकरणांत पुलिसांनी आरोपीक अटक केल्या. तपास योग्य दिकेन सुरू आसा. उत्तर गोंय पुलीस अधिक्षक आनी पुराय पुलीस पंगड तपास करता. पुलीस प्रकरणाच्या मुळा मेरेन पावतले, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
