जिल्हो वेंचणूक विधानसभेची दिका

भांगरभूंय | प्रतिनिधी

लागीं पाविल्ले विधानसभा वेंचणुकेंत 33 टक्क्यांनी अस्तुरी विधानसभेंत दिसतली हेखातीर वावुरप ही सगल्या राजकी पक्षांची लागणूक.

जिल्हो पंचायत वेंचणुकेंत जिखिल्ल्या उमेदवारांचो व्हड आदार विधानसभा वेंचणुकेंत जाता. पंचायत, नगरपालिकांचे मतदार विधानसभा मतदारसंघांत आस्पावतात. जिल्हो पंचायत वेंचणुकेतलें जैत मंत्री, आमदारांक म्हत्वाचें आसलें तरी पंचायत वांगडी, नगरसेवकांकय म्हत्व आसा. बदलपी गोंयच्या राजकारणाचें चीत्र जिल्हो पंचायत वेंचणुकेंतल्या मतदानान दाखयलां. चडशे नवे वांगडी जिल्हो पंचायतीर वेंचून आयल्यात. भाजपा, काँग्रेस ह्या दोन मुखेल राष्ट्रीय पक्षाच्या मुळाव्या कार्यकर्त्यांक तांच्या तळागाळांतल्या वावरान जैत मेळ्ळां. थळांतराचो प्रस्न मतदारांनी पयस दवरून भुंयपुतांक, धुवांक वेंचून दिवप हें फुडारांतल्या राजकारणाची दिका. जे आमदार मतदारां मेरेन कार्यावळी, येवजणी, आडमेळ्यां वगतार पावतात ते नवे उमेदवारय वेंचून हाडूंक शकतात हें वेंचणुकेन दाखोवन दिलां. विधानसभा वेंचणुकेआदीं जाली म्हणून जिल्हो वेंचणूक विधानसभेची सेमी फायनल व्हय? विधानसभा वेंचणूक 2026/2027 तल्यान तें कळटलें.
सत्तेंत आशिल्ल्या भाजपा युती सरकारा आड वातावरण तापोवनय भाजपा म. गो. च्या जिल्हो पांवड्या वेल्या उमेदवारांक मेळिल्लें जैत मोलादीक आसा. सत्तेत आशिल्ले राजकारणी पिरायेन ज्येश्ठताये कडेन वतना नवी पिळगी राजकारणांत वांटो घेता, जिखूनय येता. गोंयच्या बदलपी राजकारणाचें हें रुप देशाक नवी दिका दिवंक शकता. गौरी कामत, रघुवीर कुंकळकार, सिद्धेश नायक, सत्तरी, दिवचलेंतल्यान वेंचून आयिल्ले भाजपाचे मुळावे कार्यकर्ते. विधानसभा, नगरपालिका, म्हापालिका वेंचणुकेच्या मेजार बसून, प्रचारांत वांटो घेवन ते व्हड जाल्यात. थळांतरांतल्यान चिंबल जिल्हो मतदारसंघांतल्यान गौरी कामत जिखून आयलां. कुमारजुंवें, सांता क्रुझ, सांत आंद्रें, पणजी, ताळगांव विधानसभा मतदारसंघां खातीर ताचें जैत उपेगी. गौरी शिरोडकार युवक काँग्रेसीत आदीं आशिल्लें, भाजपांतलें ताचें जैत फोंडें विधानसभा पोट वेंचणुकेक बळगें दिवपी. मंत्री सुभाष शिरोडकार हांचें उत्तराधिकारी जिल्हो पांवड्या वेल्यान घडटा ताचे फाटल्यान ताचें कर्तृब उंचेलें शिक्षणय आसा. राजकारण्याची नवी पिळगी दिवपी ही जिल्हो पंचायत वेंचणूक नव्या वर्सांत जिल्ह्यांक अधिकार मेळोवपाक वावुरतली. तेखातीर शेजारच्या राज्यांतल्या जिल्ह्यांचो अभ्यास करून सरकाराक भेटयल्यार सरकाराचो वावर सोंपो जातलो. जिल्ह्यांक फक्त सहकारी तत्वाचेर शेतकामाचे न्हय, स्वयंपूर्णा, नितळसाण, अतीक्रमणां विशीं समाजीक बदल घडोवन हाडपाक अधिकार मेळचे. पर्यटनाची मुळां खाजनांत, दोंगुल्लेर, दर्यांत पावतात तेन्ना तांचेर नदर दवरप, कारवाये पासत मजत करप जिल्हो वांगडी करूंक शकतात.
नवे उमेदवार सोदून तांच्या वावराची म्हायती घेवन, फुडाराचें राजकी नेतृत्व घडोवप तांकां वेंचून हाडप हें आव्हान. जिल्हो वेंचणुकेंतल्यान निश्ठावंत कार्यकर्त्यांचे नवे पंगड मुखार आयल्यात, थंयच जैत मेळटा. आमदार, पक्षाचे पदाधिकारी जेन्ना पिरायेचे ज्येश्ठतायेंत वतात तेन्ना नव्यांक वांगडा घेवन वेंचणूक जिखप ही खरी विधानसभेची सेमी फायनल.
गोंय मुक्तीच्यो काणयो आयकतना भितरल्या भायल्या राजकारणा इतलीच जाल्ली उदरगत मतदारांक दिसता. गोंयचो सैम आयजय राज्याचें दायज जावन आसा, शिक्षणांतल्यान संस्कृतायेंत बदल जाल्यात. बऱ्या वांगडा वायटय आयलां, उजो घालपीय आसात. त्या उज्यांत हुल्पल्ले मतदार नासतले पूण हुल्पल्ल्यांची भलायकी, खाण जेवण, राबितो मनीसपणांतल्यान करचें पडटा. सरकार तेखातीर उणे पडलें ना, गुन्यांवकारांक खर ख्यास्त जावपाक जाय. मतदारांची ती अपेक्षा आसा, कोण ती पुराय करुंक शकता आयज? सत्तेंत आशिल्लें सरकार. सरकाराक मेळिल्ली थिराय मतदारांनी पळयली हें जिल्हो जैतांतल्यान दिसलें. मतांच्या हिशोबांत पयश्यांकय म्हत्व येवंक लागलां. पयसो वेंचणुके वेळारच न्हय नागरिकां मेरेन येवजण्यांतल्यान सरकार पावयता.
चार आमदारां वेल्यान वीस आमदारां मेरेन पावपी, काँग्रेसींतल्यान आयिल्ल्यांक आपले संस्कृतायेंत व्हरपी प्रदेश भाजप, मगो बरोबर युती करतलो. गोंयांक स्वयंपूर्ण जावंक शकता, ते दिकेन सरकार वता ही उर्बा जिल्हो वेंचणुकेन दिल्या. गोंयच्या फुडाराचे नदरेन राजकी बदल घडोवपाची तांक आशिल्लें, उंचेले शिक्षण घेतिल्लें, राजभास कोंकणीक म्हत्व दिवपी नेतृत्वाक मतदार आपणायतात. मगो वांगडा युतीन वतना भाजपाक मगो कितलो धांवक शकता तें कळ्ळां. जिल्हो वेंचणुकेन विधानसभा वेंचणुकेचीच न्हय गोंयच्या बदलपी राजकारणाची दिका दाखोवन दिल्या.
प्रादेशीक पक्षा मुखार आशिल्लीं आडमेळीं एकलो पयस करुंक शकना. सगले एकठांय आयले तरी गोंयचे उदरगतीची म्हायती आरोप करतना चुकी दाखयत दिल्यार प्रादेशीक पक्ष तिगतले. गौरी कामत, रघुवीर कुंकळकार दक्षीणेंतलो सिप्रू राजकारण्यां वांगडा दोन दसकां वयर वावुरपी. तांकां वेंचून दिवन राजकी कार्यकर्त्यांक म्हत्व आसा हें जिल्हो वेंचणुकेन दाखोवन दिलां.
कविता कांदोळकार ह्यो बऱ्यो वेवसायीक, पुनम सामंत अणभवान ज्येश्ठ, राधिका पालयेंकार, तारा हडफडकार 33 टक्के अस्तुरी राखीवतेन गोंय विधानसभेंत वचूंक शकता अशी स्त्रीशक्ती. लागीं पाविल्ले विधानसभा वेंचणुकेंत 33 टक्क्यांनी अस्तुरी विधानसभेंत दिसतली हेखातीर वावुरप ही सगल्या राजकी पक्षांची लागणूक. गोंय सदांच इतिहास घडयता. 33 टक्क्यांनी स्त्रीशक्ती 2026, 2027 विधानसभेर धाडपाक आमचें राज्य फाटीं पडचें ना हें जिल्हो वेंचणुकेतलें जैत दाखयता.
देशांतल्या पयल्या अस्तुरी मुखेलमंत्र्यांतली एक आदल्यो मुख्यमंत्री शशिकला काकोडकार गोंयान दिल्यो. आयजय ताईक गोंय विसरिल्लें ना. जिल्हो वेंचणुकेंतल्या जैतान मतदारांक राष्ट्रीय राजकारण कळटा, मतदार जागो आसा तो सुस्तेल्लो, न्हिदिल्लो ना हें दाखोवन दिलां. बर्च बाय लेनाक लागिल्लो उजो, मुखेल करून सांजवेळा शारांनी जावपी येरादारीची कोंयडी, वाडपी अपघात, मतदार वळेरी फेररचणूक हे विशय वेंचणुके वेळार तापले. आडमेळीं पयसावपाक सरकार यत्न करता हें मतदार पळयतात, ते जागे आसात हें जिल्हो वेंचणुकेंतलें जैत दाखयता.
उदरगती कडेन वचपी गोंय देशांतय झगझगपाक शकता, बदनामी करपी आसतलेच. अशा वेळार जिल्हो वेंचणूक कितें सांगता? मतदार सादूर आसा, तो कोणाचेर विस्वास दवरना, मतदारां कडेन जोडून घेतिल्ल्यांक, थळाव्यांक तो मतदान करता हो रकाद दिवपी जिल्हो वेंचणुकेन दिलो. वेंचणुकेंत जैत, अपेस हें आसतलेंच, जैतवंतांक मतदारांक, मतदारसंघाक कितें जाय तें कळ्ळां आसतलें. तें दिवपाक जिल्ह्यांक अधिकार मेळोवप, एकवट राखप गरजेचें आसा. सवस्तकाय इबाडटल्यां आड आवाज उठोवपाचो वावर जिल्हो वेंचणुकेंतले जैतीवंत करतले अशी आस्त बाळगुया.
फाटल्या दोन दसकांनी गोंयचें राजकारण बरेंच बदल्लां, समाजीक सुरक्षा तशेंच नव्यो येवजण्यो लोकां मेरेन पावल्यात. उदरगतय जाल्या, लुकसाण जालां, लाव मेळ्ळा, मतदार लाव लुकसाणेचो हिशोब करता हो रकाद जिल्हो वेंचणुकेन दिला. विधानसभा वेंचणुकेची दिका कशी आसतली तें दाखोवन दिवपी जिल्हो मतदारांनी सदांच जागे रावचें.

सुहासिनी प्रभुगांवकार
9881099260