जिल्हो वेंचणुकेंत विधानसभेचें राजकारण

भांगरभूंय | प्रतिनिधी

जिल्हो वेंचणुकेंतले वाडिल्ले मतदार विधानसभा वेंचणुके वेळार दिसचे नात. मतदार याद्यो सुदारतना तांणी कूस मारिल्लीय दिसतली.

मतदार याद्यो सुदारपाचो खर वावर व्हड नेटान देशांतल्या कांय राज्यांनी सुरू आसा. मुखेल करून विधानसभा वेंचणुको लागीं पाविल्ल्या राज्यांतल्यो मतदार याद्यो सुदारप थळांतरीत मतदार, तांचें मतदान, राबित्याच्या सुवातांचेर उजवाड घालतल्यो. फुडारांतले जनगणनेक उपेगी थारतल्यो अशें वयलेचाराक दिसता.
मतदार याद्यो बारीकसाणेन तपासपाचो वावर हाचे आदीं 2004 वर्सा जाल्लो. 21 वर्सांत मतदारांचें व्हड प्रमाणात थळांतर जालां हें सत. 20 वर्सांत जाल्ले बदल, उदरगत पळयल्यार एक प्रस्न उप्रासता. 2004 उपरांत पांच, धा वर्सांनी मतदार याद्यो किद्याक सुदारल्यो ना? कोण जापसालदार त्या घाळपणाक? मतदार याद्यो बारीकसाणेन सुदारपाचो, नियाळ घेवपाचो खासा वावर करपी भारताच्या मुखेल वेंचणूक आयोगाक तें सोदून काडचें पडटलें. देशांतल्या आकांतवाद्यांचे तळ मतदार याद्यो तपासतना मेळटले. राखणे मंत्रालयांतले, गृह खात्याचे केंद्रीय पांवड्या वयले कर्मचारी, अधिकारी बेगीन सेवेंतल्यान भायर सरून वेपार, वेवसाय करतात तेंय नदरेक येतलें. गोंया वरीं ल्हान राज्यांत राखणे मंत्रालयान सवकासायेन पांच- स तालुक्यांनी सुवातो कश्यो घेतल्यात? गोंयांत राबितो करपी गोंया भायले पुलीस अधिकारी कितले आसात? गोंय राखणे दळाचें, आयएएस, आयपीएस अधिकाऱ्यांक रिटायरमेंटा उपरांतचें राज्य व्हय? राखणे दळाच्या पयलींच्या सुवातांचें व्हड प्रमाणांत सुदारप करतना सरकाराची, थळाव्या अधिकारिणीची मान्यता घेतात? थळांतरीत व्हड प्रमाणांत गोंयांत येवपाक राखणे खातें, गृह खातें अधिकारी उर्बा दितात? मतदार याद्यो तपासतना तें गुपीत कळटलें. सरकाराक तेप्रमाण फुडाराचें प्लॅनींग करुंक मेळटलें. जिल्हो वेंचणूक मतदार याद्यो सुदारताना जाली तरी सुदारिल्ल्यो याद्यो ते वेंचणुकेंत उपेगाक हाडचे ना. जिल्हो वेंचणुकेंतले वाडिल्ले मतदार विधानसभा वेंचणुके वेळार दिसचे नात. मतदार याद्यो सुदारतना तांणी कूस मारिल्लीय दिसतली. दोन राज्यांनी रावन वेवसाय करपी, गोंयांतले भुंयेर हात पांय पातळायत कायदो मोडून घरां बांदपी, धर्मीक वीख पातळावपीय तातूंत आसतले. जिल्हो पंचायत वेंचणुकेंत तांकां कुशीक दवरप तशें सोंपें न्हय. तातूंतले कांय वेंचूनय येतले, माथ्यारय बसपाचो यत्न करतले. तांकां आडावप कठीणच. तेखातीर बोगस मतदान जावचें न्हय हेखातीर वेंचणूक आयोगान सादूर रावचें.
जिल्हो वेंचणूक म्हणल्यार विधानसभा वेंचणुकेची सेमी फायनल अशें समजून सगले राजकी पक्ष वावराक लागल्यात. विधानसभा वेंचणुके वरी युतीची भास, पक्षांतरां, निरिक्षक जिल्हो वेंचणूक केंद्रीय पांवड्या वेल्या राजकी पक्षांक म्हत्वाची. काँग्रेस पक्षाचे बराबरीन विधानसभा वेंचणुकेंत 2022 वर्सा आशिल्ल्या आम आदमी पार्टीन जिल्हो वेंचणूक गंभीरतायेन घेतल्या. सत्तेंतली थिराय उदरगतीचो आदार थारता, एका तेंपार काँग्रेसीक सत्तेचो लाव जालो. गोंयांत जिल्हो वेंचणूक जातना शेजारच्या कर्नाटकांतली अस्थिरताय प्रदेश काँग्रेसीक एकवटीत दवरतली? विखुरतली? ती जाप जिल्हो वेंचणुकेंत मेळटली. रिव्होल्युशनरी गोवन्स पार्टी राज्य पांवड्यार ज्या नेटान पावलां मारता तें पळयल्यार युतीचो व्हड लाव मेळोवपाक राजकारण आरजीपीचे फुडारी खेळटले. जें गोवा फाॅरवर्डाक इतलीं वर्सां शक्य जालें ना तें अंदूंची जिल्हो वेंचणूक आरजीपी करून दाखोवंक शकता व्हय? जाप जिल्हो वेंचणुकेंत मेळटली.
युतीच्या राजकारणांतल्यान मगोच्या भुजांचो (शिंवाचो न्हय) घेत मुखार सरिल्ली भाजपा मगो, काँग्रेसीक फुडारांत आनीक बागोवंक लायतली अशें चिन्न दिसूंक लागलां. भाजपा पासत 2027 विधानसभा वेंचणुकेंत 27 चें राजकारण खेळूंक जिल्हो वेंचणूक वाट दाखयतली. जिल्हो पांवड्यार वेंचणूक जातना जाल्लीं पक्षांतरां विधानसभा वेंचणुके वेळार उरफाटीं, परत घरा येवपाक वाट मेकळी करतलीं? भाजपान ते विशीं निर्णय बेगीन घेवप फुडारांत लाव दितलो.
सरकारांत आशिल्ल्या महाराष्ट्रवादी गोमंतक पक्षाची अस्मिताय, सासाय फक्त नांवांत आसा? पक्ष व्हड कित्याक जायना तें जिल्हो वेंचणुकेंतल्यान कळचें ना. मगो म्हणून रावप? आदलींच तत्वां दवरप? हे थारावपाक जिल्हो वेंचणूक मगो पक्षाक चिंतूंक लायतली. मगोचे विखुरिल्ले फुडारी हेर राजकी पक्षांतल्यान राजकारणांत आपले उत्तराधिकारी हाडपा पासत वावुरपाक लागल्यात. तालुको, जिल्हो, पंचायतीचें नेतृत्व विधानसभे मेरेन वचपाक उपेगी. हाचो अर्थ जिल्हो वेंचणूक विधानसभेची खरेपणी सेमी फायनल व्हय?
जिल्हो वेंचणुकेंत वेंचून येवपी चार- पांच उमेदवार विधानसभा वेंचणुकेंतल्यान आयज मेरेन दिसल्यात. दोन तीन विधानसभेर पावपाक जैतीवंत जाल्यात. आरक्षणांतल्यान फुडारांत तो आंकडो वाडटलो, पुराय दिका बदलूंक येता तेखातीर भाजपान नवे उमेदवार वेंचणुकेंत देंवयल्यात. भाजपाच्या कांय आमदारांचे वाडपी पिरायेन सरकाराक जांच केले. 2027 त 27 खातीर वेगळे प्रयोग करपाची धिटाय जिल्हो वेंचणुकेंतल्यान भाजपान दाखयल्या. तातूंतल्यान पक्षांतरां जाल्यांत, तेंच विधानसभा वेंचणुकेंत जावंक शकता. तेखातीर केंद्रीय पांवड्यार पंचायत कायदो सुदारपा पासत यत्न जावचे. एक राष्ट्र एक वेंचणूक देशांत हाडटना राज्य वेंचणूक आयोगाकय बळगें दिवपाचे यत्न जावपाची गरज आसा. वेंचणूक आयोगाक वेंचणुको लागीं येतात तेन्ना मेळपी मनीसबळ आधुनिकतायेंतल्यान सुदारलां, मतदान यंत्रां मतदारांच्या दारांत पावतली ताची गवाय जिल्हो वेंचणूक दितली.
विधानसभा वेंचणुकेंत उप्रासतात तेच विशय जिल्हो पांवड्यार वेंचणुकेंत आसतले तेन्ना तांकां जापो दिवपी राजकी पक्षा लागीं कितलें आसा? युती जावचीच म्हणून फाटले विधानसभा वेंचणुकें वेळार यत्न करपी आयजय तेच वाटेन वतात. आम आदमी पार्टी वेगळेंच राजकारण खेळटा जें बिहारांत खेळ्ळे तेंच. कोणाक लावाचें तें राजकारण? कोण जिखतलो? मतदार शिटूक जाल्यात, मतदारां कडेन एकदांच वेंचणुके तेंपार येवपी उमेदवारांक वेंचून दिवचे परस वाड्या वयलो लागींचो उमेदवार जिखून हाडपीय आसतले.
येरादारी, पर्यटन, कोयर वेवस्थापना भायर जिल्हो वांगड्यांक जिल्ह्यांतल्या मतदारसंघात उदरगत करपाक मेळपी निधी थोडो आसा. अधिकारांतल्यान निधीची व्हड प्रमाणांत तजवीक करप, केंद्र सरकारा कडल्यान जिल्हो पंचायतींक पयसो हाडप हें उतर दिवपी वांगडी उंचेले शिक्षण घेतिल्ले आसचे. जिल्ह्यांतल्यो येवजण्यो थेट केंद्रीय मंत्रालया मुखार मांडपाक जिल्हो अध्यक्ष मेळपाक जाय. आरक्षणांतल्यान मतदारसंघ बदलपी उमेदवार जिल्हो वेंचणुकेंत आसात. तांकां आपल्या मतदारसंघा भायर पुराय तालुको, विधानसभा मतदारसंघाची जाणविकाय आसल्यार वेंचून येवप शक्य जातलें.
जिल्हो वेंचणुकें पासत प्रभागांची रचणूक जातना मतदार हेवटेन तेवटेन गेल्ले मेळटले. कांय मतदार मतदारसंघच न्हय जिल्होय सोडपी आसात. मतदार याद्यो सुदारतात तेन्ना मतदारांनी जागे रावल्यार, तांकां आमदारांनी जागयल्यार मतदार यादी नितळ जातली.

सुहासिनी प्रभुगांवकार
9881099260