भांगरभूंय | प्रतिनिधी
वेंचणुकेचे वेळापत्रक जाहीर, आचारसंहीता आयच्यान लागू
भांगरभूंय । प्रतिनिधी
पणजीः जिल्हो पंचायत (झे़डपी) वेंचणुकेचे वेळापत्रक शेनवारा जाहीर जालें. 20 डिसेंबराक गोंयांतल्या 50 झेडपी मतदारसंघा खातीर वेंचणूक जातली. 1 ते 9 डिसेंबर मेरेन अर्ज भरपाक मेळटलें. 10 डिसेंबराक अर्जाची छाननी जातली. 11 डिसेंबराक अर्ज फाटीं घेवपाची तारीख आसतली आनी त्याच दिसा दनपारां उमेदवारांची यादी जाहीर करतले. 20 डिसेंबराक मतदान जातलें आनी 22 डिसेंबराक निकाल जाहीर जातलो. वेंचणुकेची आचारसंहीता आयच्यान पंचायत क्षेत्रांनी लागू जाल्या, अशें राज्य वेंचणूक आयुक्त मिनीन डिसोझा हांणी सांगलें.
राज्य वेंचणूक आयोग आल्तिन पणजे जाल्ले पत्रकार परिशदेत राज्य वेंचणूक आयुक्त मिनीन डिसोझा हांणी वेंचणुकेचे वेळापत्रक जाहीर केले.
1 ते 9 डिसेंबर सकाळीं 10 ते दनपारां 1 वरां मजगतीं वेंचणूके खातीर अर्ज भरपाक मेळटले. हो अर्ज भरपाचो काळ सात दिसां खातीर आसतलो. 3 डिसेंबर ही भौशिक सुट्टी आनी 7 डिसेंबर आयतार आशिल्ले कारणान ह्या दिसा अर्ज भरपाक मेळचें ना,अशें डिसोझा हांणी सांगलें.
10 डिसेंबराक सकाळीं 10 ते दनपारां 3 वरां मजगतीं उमेदवारांची चांचपणी जातली.ढ 11 डिसेंबर सकाळीं 10 ते दनपारां 2 वरां मजगतीं उमेदवारांक आपले अर्ज फाटीं घेवपाक मेळटले. त्याच दिसा दनपारां 2 वरां उपरांत रिंगणात आशिल्ले उमेदवारांची यादी जाहीर करतले. 20 डिसेंबराक सकाळीं 8 ते सांजे 5 वरां मजगतीं झेडपी वेंचणूक जातली आनी 22 डिसेंबराक सकाळीं 8 वरांचेर निकाल जाहीर जातलो, अशीं म्हायती डिसोझा हांणी दिली.
वेंचणुकेची आचार संहीता आयच्यान सगळ्या उत्तर गोंय आनी दक्षीण गोंय जिल्लो पंचायतींनी लागू जाल्या. पूण पालिका क्षेत्र आनी पणजी महानगर पालिकेच्या क्षेत्रात येवपी वाठारांनी आचारसंहीता लागू जावची ना, अशें डिसोझा हांणी म्हणलें.
आचार संहीतेची अंमलबजावणी खरसाणेन जाता काय ना हाचेर नदर दवरपा खातीर आयोगान घुंवते पंगड आनी स्थिर पाळत पंगड तैनात केलां. वेंचणुकेची प्रक्रिया सुरळीत आनी शांतीकायेन जावची हे खातीर पुलीस खात्यान अतिरिक्त पुलीस फौज तैनात केला. उमेदवारांक चडांत चड 5 लाख मेरेन खर्च करपाची मेकळीक आसा. बॅलट पध्दतीन मतदान जातलें, अशी म्हायती डिसोझा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
