भांगरभूंय | प्रतिनिधी
आयज अर्ज दाखल करपाचो निमाणो दीस
पणजी: जिल्हो पंचायत वेंचणुकेचे अर्ज दाखल करपाची प्रक्रिया 1 डिसेंबरा सावन सुरू जाली आनी सोमारा 8 डिसेंबर मेरेन उत्तर आनी दक्षीण गोंयच्या 50 मतदारसंघांतल्यान आतां मेरेन वट्ट 208 उमेदवारांनी अर्ज दाखल केल्यात. उत्तर गोंयांतल्यान 113 जाल्यार दक्षीण गोंयांतल्यान 95 अर्ज दाखल केल्यात. काल (सोमारा) उत्तर आनी दक्षीण गोंयांतल्यान मेळून 132 उमेदवारांनी अर्ज भरले.
उत्तरेंतल्यान 72 आनी दक्षीणेंतल्यान 60 अर्ज दाखल केल्यात. हातूंत भाजपाच्या उमेदवारांनी उत्तरेंतल्यान 23 जाल्यार दक्षीणेंतल्यान 16 उमेदवारांनी अर्ज दाखल केले.
तशेंच काँग्रेसी वतीन उत्तरेंतल्यान 12 जाल्यार दक्षिणेंतल्यान 10 अर्ज भरले. आम आदमी पार्टी (आप) न उत्तरेंतल्यान 21 आनी दक्षीणेंतल्यान 16 अर्ज दाखल केले. गोवा फॉरवर्डाचे उत्तरेंतल्यान 5 आनी दक्षीणेंतल्यान 2 अर्ज दाखल केले. मगो पक्षाच्या 2 उमेदवारांनी दक्षीणेंतल्यान दर्ज दाखल केल्यात.
जाल्यार रेव्होलयुसनयरी गोवन्स पार्टीच्या एकाच उमेदवारान उत्तरेंतल्यान अर्ज दाखल केला. तशेंच स्वतंत्र उमेदवारांनी उत्तरेंतल्यान 10 आनी दक्षीणेंतल्यान 14 अर्ज दाखल केल्यात. कांय कडेन पक्षा वतीन डमी म्हूण उमेदवारी अर्ज दाखल केल्यात.
1 डिसेंबर ते 9 डिसेंबर मेरेन अर्ज दाखल करतले. 10 डिसेंबराक अर्जांची छाननी जातली. 11 डिसेंबराक दनपारां दोन वरां मेरेन अर्ज फाटीं घेवपाची मुजत आसा. उपरांत उमेदवारांची निमाणी वळेरी जाहीर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
