जिल्हो पंचायत वेंचणूक : गोंय आनी गोंयकार आसतले ?

भांगरभूंय | प्रतिनिधी

सगळे राजकी पक्ष अप्रत्यक्षपणान धांवपळ करूंक आसतलेच पूण गोंयकार खंय आसतलो हो व्हड प्रस्न आसा? गोंयकारपण खंय आसतलें हो संलग्न प्रस्न आसा.

जिल्हा पंचायत वेंचणुकेचें वारें व्हांवूंक लागलें. उमेदवार आपणा खातीर बाशिंगां तयार करूंक लागले. शिंयान रंग घेवंक सुरू केला आनी आवुळट्या आंगांत दनपारची गर्मी कितली थाकाय दिता तें पळेवंक तापमानाचें संतुलन दुडवांचेर येवन आडखळ्ळां. कांय परंपरीक जाल्यार कांय नवीं मुखामळां रिंगणांत परत एक पावटीं दिश्टी पडपाचीं आसात. राखीव जागे आसात थंय उमेदवार उडूंक लागल्यात. ह्या उमेदवार आपल्या समाजाक न्याय दितले काय? चडश्या उमेदवारांनी आपल्या समाजाक ‘टेकन फॉर ग्रांटेड’ धरिल्लो आसा. फकत मतां पुरतें राजकारण. कोलो कांय वेळार न्हिदिल्ल्याचें धोंग घेता, हाचो अर्थ ताका कांयच पडून वचूंक ना अशें न्हय, आपले न्हिदेंत ताचे कान क्रियाशील आसतात, हाची उमेदवारांनी खबरदारी घेवंची.
राजकी पक्षांचो खेळ
कसलीय वेंचणूक जाहीर जाली म्हणटच राजकी पक्ष सक्रीय जातात. गोंयांत मुखेलपणान वावुरतात भारतीय जनता पक्ष, काँग्रेस, आम आदमी पक्ष, रेवुल्युशनरी गोवन्स, महाराश्ट्रवादी गोमंतक पक्ष आनी गोवा फॉरवर्ड. हे पक्ष केन्ना कोणा बराबर रावतले हाची शास्वती ना. सध्याक भारतीय जनता पक्ष सत्तेर आसा. 13 वर्सां जालीं तोच सत्ता चलयता. ताचे आदीं काँग्रेस सत्तेर आशिल्लो. कोण खंयच्या पक्षांतल्यान फुटले आनी खंयच्या पक्षांत गेले हो इतिहास, पूण नवीं- नवीं सरकारां घडलीं आनी गरज नासतना आमकां मुख्यमंत्री मेळ्ळे. तांच्या नांवार बिल्लो उरलो, गोंयकारांक कितें मेळ्ळें? तरी गोंयकारूय वेंचणुकां वेळार सक्रीय.
जिल्हा पंचायत
गोंय येदेंशें राज्य. पंचायती राज पद्दत गोंयांत आशिल्ली. भारतभर जिल्हा पंचायत आसा म्हूण गोंयांतूय ती पद्दत भितर हाडली. गोंयांत 40 आमदार आनी 50 जिल्हा पंचायत वांगडी. हें गणीत कितेंशें दिसता. महाराश्ट्रांत सुमार 13 करोड लोकसंख्येक 288 आमदार आनी 34 जिल्हा परिशदांक 1951 जिल्हा वांगडी आसात. एक वांगड्याक सुमार देड लाख मतदार पडटात. आमच्या गोंयांत एका आमदारा खातीर 35 ते 40 हजार मतदार जाल्यार जिल्हा पंचायत वांगड्याक 20- 25 हजार मतदार. आमदार कितलें काम करता आनी जिल्हा पंचायत वांगडी कितलें काम करता तें आमी पळेतात आनी तांकां कितलो वाव आसा तेंय आमकां खबर आसा. तरी आमचे राजकी कार्यकर्ते वेंचणूक लडोवंक खर्शेतात आनी लाखांनी रुपया मोडून वेंचणुकेंत भाग घेतात. शाब्बास गोंयकारा.
ध्येय कितें?
वेंचणुकेक बसतल्या खंयच्याय उमेदवाराक विचारल्यार तो समाज सेवा म्हणटा आनी म्हणटलो. जिखून येतकच ताका समाज सेवा म्हणल्यार कितें तें कळटा? राजकारण हीच आमची समाज सेवा जाल्या. सरकाराची एक येवजण चालीक लावपा खातीर दोन पावलां मारलीं आनी ते येवजणेचो लाभ दिवंक लोकाक घरा कडेन आपयले, असलीच काय आमची समाज सेवा? गरीब लोक कसलेच सरकारी येवजणेचो हक्क्दार नात, अशें धरून चलप म्हणल्यारूच काय समाज सेवा? ताका कळना, सरकारी येवजण गरीब आनी गरजेवंत लोकांक आसता आनी ती मेळोवन घेवंक तांचे कडेन जायना, तरी आमचे वेंचून दिल्ले मनीस ती येवजण ताचे मेरेन पावोवंक सोदिनांत कित्याक तांच्यो अडचणी चड आसतात, हीच आमची समाज सेवा? गरिबाल्या घरा मेरेन वा तांचे वस्ती मेरेन रस्ते वचनात, तांकां उदकाची सुविधा आसना, तांचे मेरेन वैजकी सेवा पावना, कित्याक ते कोणाक मेजा पोंदल्यान कांयच दिवंक शकनात, तांचें कसलेंच काम जायना, हीच काय समाज सेवा?
बिगर गोंयकार वेंचणुकेंत
जुवारीनगर सारक्या वाठारांत बिगर गोंयकारांनी वेंचणुकेंत रस दाखयला. हें चुकीचें? आमचे गोंयकार ऑस्टेलियेक राजकारणांत आसात, अमेरीकेंत राजकारणांत आसात, इंग्लंडाक राजकारणांत आसात, हें चुकीचें? फुडाराक लंडनांत पुराय राजकारण गोंयकारांनी काबीज केलें जाल्यार अजाप म्हणूंक जावंचें ना. आतां गोंयांत जंय बिगरगोंयकारांचें भोवमत आसा थंय गोंयकार कितें करतलो? सगळ्या गोंयकारांनी एकठांय येवन तांचे विरुद्ध लडो दिवंचो पडटलो, एकठांय जावंक शकतात गोंयकार? दुबाव आसा. जाल्यार ते विंचून आयले म्हण जाल्यार अजाप कसलें? हे आदीं गोंयांत बिगरगोंयकार सरपंच जाल्ले आमी पळेवंक नात? आतां जिल्हा पंचायत वांगडी…
शिटूक जा गोंयकारा
गोंयांत कोळशाचो मोटो प्रस्न निर्माण जाला. ह्या प्रकरणांत सरकाराचेर बरेंच चेपण आयिल्लें आसा. रेल्वेचें डबल ट्रॅकींग करपा फाटलो हेतू कोळसो वाडोवप असो सरकाराचेर आरोप आसा. ताका जाप दिवन सरकार म्हणटा कोळसो आनीक वाडोवपाची कसलीच येवजण ना. फाटल्या आयतारा मडगांवांत हे विशीं व्हडली सभा जाली आनी कोळशा विरुद्ध लोकजागृताय जाली. हो मुद्दो साश्टींत तरी मुखेलपणान गाजतलो. साश्टींतले उमेदवार जे जिल्हा वेंचणूक लडोवंक सोदतात, ते तयार आसात ह्या प्रस्नाची जाप सोदून काडूंक वा ताचेर फावो तो तोडगो काडूंक? सभांनी बोवाळ मारलो म्हण जावंचें ना, खरें कितें आनी फट कितें हें सांगपी उमेदवार आमकां जाय. ही शिटकावणी.
राजकी पक्षांची सत्वपरिक्षा
2027 वर्सा विधानसभा वेंचणूक येवपाची आसा. जिल्हा पंचायत वेंचणूक म्हणल्यार ते वेंचणुकेची सेमी फायनल अशें समीकरण जाता, आनी खरी गजाल ती. हेच वांगडी आपापल्या पक्षा खातीर ते वेंचणुकेक वावुरतले आनी आमकां नवे आमदार फावो जातले. भारतीय जनता पक्षाच्या हातांत सत्ता आसा, देखून मतांचें गुड्डुलासांव करपाचे निश्चितूच तांचेर आरोप जातले. काँग्रेस हो मुखेल विरोधी पक्ष पूण ताकाच शह दिवंचे खातीर हेर पक्ष वावुरतात. म्हणजे विरोधी पक्षां मदें एकवट ना, जाचो फायदो सदांच सत्ताधारी पक्षाक जाता. आमी नवे उमेदवार वेंचून हाडटले वा त्याच (जांचेर कांय वेळार आमी भ्रश्टाचाराचो आरोप करतात) तांकांच निवडून हाडटले? मतदारांक आपणा वटेन करपाची ही राजकी पक्षांची सत्वपरिक्षा आसा.
सोंपयतना…
गोंयच्या 50 मतदारसंघाच्या फाटले वेंचणुकेंत निवडून आयिल्ल्या जिल्हा वांगड्यांचो कार्यकाळ 7 जानेवारी 2026 दिसा सोंपता. आतां 13 डिसेंबराक वेंचणूक जाहीर जाल्या. उमेद्वारांनी तयारी सुरू केल्या तांतूंत बायलांनी पेंगट बांदलां. कांय जाग्यांचेर नवे चेह्रे दिसपाची शक्यताय आसा. राखीव जागे बरेच रंगपाचे आसात. सगळे राजकी पक्ष अप्रत्यक्षपणान धांवपळ करूंक आसतलेच पूण गोंयकार खंय आसतलो हो व्हड प्रस्न आसा? गोंयकारपण खंय आसतलें हो संलग्न प्रस्न आसा. डिसेंबराची 13 तारीख उदेवंचे आदीं ह्या प्रस्नाच्यो जापो मेळ्ळ्यो जाल्यार आमकां तकटे घेवन रस्त्यार देंवचें पडचेंना. ह्या दिसांनी आमचो होच विचार गंभिरतायेन जावंदी.

विन्सी क्वाद्रुश
9822587498