भांगरभूंय | प्रतिनिधी
पणजी : जिल्हो पंचायत वेंचणुके खातीर आचारसंहिता तशेंच वेळापत्रकाची अधिसुचोवणी आयज 29 नोव्हेंबराक जारी जातली. राज्य वेंचणूक आयुक्त मिनिनो डिसोझा हे आयज सकाळीं 10 वरांचेर पत्रकार परिशद घेवन सविस्तर कार्यावळ जाहीर करतले. जिल्हो पंचायत वेंचणूक 20 डिसेंबराक घेवपाचो आदेश पंचायत सचिवांनी जारी केला. जिल्हो पंचायत वेंचणुकेचे आचारसंहिते विशीं आयज निर्णय जातलो, अशें राज्य वेंचणूक आयुक्त मिनिनो डिसोझा हांणी सांगलें. जिल्हो पंचायत वेंचणूक 13 डिसेंबराक जावपाची आसली. कांय इत्सुकांनी आरक्षणाक आव्हान दिले उपरांत वेंचणूक फुडें धुकलपाचो निर्णय सरकारान घेतलो. आरक्षणाक आव्हान दिवपी याचिका उच्च न्यायालयान भायर मारले उपरांत आतां राज्य वेंचणूक आयोग आचारसंहिता जारी करतलो. जिल्हो पंचायत वेंचणुके खातीर राजकी पक्षांनी उमेदवार निवड प्रक्रिया सुरू केल्या. आम आदमी पक्षान कांय उमेदवार जाहीर केल्यात. काँग्रेस, गोवा फॉरवर्ड आनी आरजी मदीं युतीची चर्चा सुरू आसा. भारतीय जनता पक्षान लेगीत उमेदवार निश्चीत केल्यात. उमेदवारांची घोशणा मात करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
