जिल्हो उजो सुरक्षा कृती आराखडो तयार करचो; गोवा कॅनाची सुचोवणी

भांगरभूंय | प्रतिनिधी

पणजीः राष्ट्रीय उजो पालोवपी सेवा दिसा निमतान राज्यांत वाडत वचपी उज्याचे घडणुकेचेर नियंत्रण दवरपा खातीर जिल्हो उजो सुरक्षा कृती आराखाडो 2025-26 तयार करचो, आनी हे खातीर थळावी पंचायत तशेंच पालिका आनी नागरी समाज संघटणांक आस्पावन घेवचें अशी मागणी गोवा कॅन हे आपवावुरपी संस्थेन केल्या.

गोवा कॅनान हे विशींचे एक निवदेन उजो पालोवपी दळाचे संचालक नितीन रायकार हांकां भेटयलें. निवेदनांत तांणी म्हणलां की, पुराय गोंयभर उजो लागपाचे घडणुकेंत वाड जाल्या आनी फाटल्या सप्तकांत मडगांवां एक इमारत तशेंच म्हापश्यां एका सुपर मार्केटांत उजो लागपाच्यो हालीच्यो घडणुको उजो पालोवपी दळा खातीर धोक्याची घांट जावन आसा.

उज्याच्या घडणुकांक लागून कुटुंबाक फक्त अर्थीक लुकसाण जावंक ना जाल्यार तांचे मनस्थितीचेरूय परिणाम जाला. जतनाय घेतल्यार ह्यो घडणुको आडावपाक मेळटात. पूण आमकां घडणुकेचो अणभव घेतिल्ले व्यक्ती आनी कुटुंबां कडल्यान मेळिल्ल्या प्रतिसादा प्रमाण घर, कचेरी वा आस्थापनांक लागिल्लो उजो, देखून उजो पालोवपी दळान 2025-26 वर्सा खातीर जिल्हो उजो सुरक्षा कृती आराखडो तयार करून हाचे अंमलबजावणी खातीर भागधारकांक आस्पावन घेवचें अशी मागणी गोवा कॅना केल्या.

हे खातीर संबंदीत जिल्होधिकाऱ्याच्या फुडारपणा खाला समन्वय समितीत स्थापन करची आनी दर स म्हयन्यांत जिल्हो उजो सुरक्षा बसका आपोवची. जिल्हो, पंचायत, नगरपालिका, पंचायत, जीसीसीआय, टीटीएजी, जीएसआयए, गोंय उद्देग उदरगत म्हामंडळ, बस धनी संघटणा, गॅस सिलिंडर आनी पेट्रोलियम डिलर संंघटणा, वेपारी संघटणा, बँक, राबितो सोसायटी, कंज्युमर फोरम, आपमजत गट हांका समितीचे वांगडी करचे, अशी सुचोवणी गोवा कॅनान केल्या.

जिल्हो पांवड्यार कृती आराखडो आनी समन्वय समितीच्या कार्याचे येस पारखीले उपरांत उजो पालोवपी दळ म्हाल पांवड्यार समन्वय समितीचेर विचार करपाक शकता आनी वर्स 2026-27 वर्सा खातीर उपजिल्हाेधिकारी वा उपविभागीय दंडाधिकारी हे समितीचे फुडारपण करपाक शकतात, असोय सल्लो गोवा कॅनान दिला.