भांगरभूंय | प्रतिनिधी
भांगरभूंय । प्रतिनिधी
म्हापशेंः उत्तर गोंय जिल्होधिकाऱ्यान मान्सूनाचे फांटभुंयेर रस्ते खणपाक जरी बंदी घातल्या तरी म्हापशें पालिकेच्या 9 नंबराच्या प्रभागांत पालिका कंत्राटदारान जिल्होधिकाऱ्याच्या आदेशाचें उल्लंघन करून गटाराचें बांदकाम सुरू केलां. फाटल्या फेब्रुवारी म्हयन्यांत सुरू केल्लें हें काम पुराय करपाक कंत्राटदारान कळाव लायलो. मिलाग्रीस सायबिणीच्या फेस्ताक लागून हें काम बंद केलें. फेस्ता उपरांत तें कंत्राटदारान सुरू करपाक जाय आशिल्लें. मात ताणे तें केलें ना आनी आतां पावस पडपाक सुरवात जातगीर काम सुरू केलां.
आंगड हांका अलंकार थिएटर वाठारांत कळंगुटकार हॉस्पिटला कडेन हें गटाराचें काम सुरू केल्ल्यान खणल्ल्या कामाचो प्रवाश्यांक त्रास जावपाक लागला. गटारा खातीर खणल्ली माती रस्त्याचे कुशीक दवोरल्या. येरादारीची सूचोवणी दिवपी तकटे व थंय बॅरीकेड घातले नात. जिल्होधिकाऱ्याच्या आदेशाचें उल्लंघन करून म्हापशें पालिका मंडळान हें काम सुरू करपाक कशें दिलें अशे लोक सध्या विचारपाक लागल्यात. प्रभाग 9ची नगरसेविका केल ब्रागांझान लेगीत कंत्राटदारान जे तरेन काम चलयलां तें विशी नाराजी उक्तायल्या.
गटारा खातीर खणपाचें काम करपाक पालिका मंडळान परवानगी दिली ना. अशें कसलेंच काम करपाक आमी दिनात. कंत्राटदाराक गटारांतलो चिखोल काडपाक आमी सांगल्लें. ह्या प्रकारांत लक्ष घालपाची सूचोवणी पालिका इंजिनियराक केल्या अशें नगराध्यक्ष प्रिया मिशाळान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
