भांगरभूंय | प्रतिनिधी
पणजी : जिल्लो पंचायत वेंचणुकेंत भाजप, मगोप युतीचे ४३ उमेदवार उबे आसात. भाजपान अंदूं ८० टक्के नवे उमेदवार दिल्यात. डबल इंजिन सरकाराचीं उदरगतीचीं कामां पळयल्यार सगल्या सुवातांचेर आमी भोवमतान जिखतले असो विस्वास भाजप प्रदेशाध्यक्ष दामू नायक हांणी उक्तायलो. शुक्रारा पणजे जाल्ले पत्रकार परिशदेंत ते उलयताले. ह्या वेळार मगोपचे अध्यक्ष दीपक ढवळीकार, सिद्धार्थ कुंकळकार, अनंत नायक हानी हेर हाजीर आशिल्ले.
दामू नायक हांणी, जिल्लो पंचायत वेंचणुकेंत भाजप ४० जाल्यार मगोप ३ सुवातांचेर वेंचणूक लढयता. हेर ७ सुवातांचेर आमी अपक्षांक तेंको दितले. राज्यांतले जनतेन फाटल्या कांय वर्सांनी प्रधानमंत्री नरेंद्र मोदी हांच्या नेतृत्वा खाला जाल्ल्या डबल इंजिन सरकाराची उदरगत पळयल्या. हाका लागून हे वेंचणुकेंत उदरगत होच खरो मुद्दो आसा. वेंचणुकेंत आमचे युतीचें बर्याच व्हड मतांनी जैत जातलें, अशी आमची खात्री आसा.
आमच्या उमेदवारांनी प्रचाराची पयली फेरी ह्यान पयलींच पुराय केल्या. उमेदवार घराघरांनी वचून पक्षान केल्लें काम लोकांक समजावन सांगतात. हाकाय व्हड प्रतिसाद मेळटा. राज्यांत भाजपाचे सगले वरिश्ठ फुडारी, पदाधिकारी, मंत्री, आमदार, खासदार, केंद्रीय मंत्री प्रचाराच्या कामांत गुंथल्यात. अंदूं आमकां उमेदवार वेंचतना कसलोच त्रास जावंक ना. ८० टक्के नवीं मुखामळां आसलीं तरी आदले चडशे वांगडा नव्या उमेदवारां खातीर काम करतात अशें दामू नायक हांणी सांगलें.
भाजपांत शिस्त आनी संघटनेक म्हत्व आसा. पक्षांत सगल्यांनी जापसालदारकेन वागपाक जाय. पक्षाच्या आड उलोवपी फुडार्यां कडल्यान स्पश्टीकरण मागयतले. कोणेंच पक्षाला गृहीत धरचें न्हय अशी शिटकावणी दामू नायक हांणी दिली.
विधानसभा वेंचणुकेंत युती आसतली
जिल्लो पंचायत वेंचणुकेंत विरोधी पक्ष सामके दुबळे आसात. वेंचणुकेंत भाजप, मगोप युतीक ४५ ते ५० टक्के मतां मेळटलीं. २०२७ चे विधानसभा वेंचणुकेंतूय आमची युती आसतली अशें मगोप अध्यक्ष दीपक ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
