भांगरभूंय | प्रतिनिधी
पणजी : जिल्लो पंचायत वांगड्यांक नवी जापसालदारी दिल्या. हे विशीं बेगीनूच घोशणा करतले. नवे जापसालदारकेक लागून पंचायत वांगड्यांक समाजीक मळार व्हड भुमिका करची पडटली अशेंे पंचायत मंत्री मॉविन गुदिन्हो हांणी सांगलें. बिरेस्तारा जीपार्ड वतीन नव्या जिल्लो पंचायत वांगड्यां खातीर आयोजीत केल्ल्या प्रशिक्षण शिबिराच्या उक्तावणा वेळार ते उलयताले. ह्या वेळार संचालक महादेव आरोंदेकार, जीपार्ड संचालक शेट्ये आनी हेर अधिकारी हाजीर आशिल्ले.
जीपार्ड वतीन दिवपी प्रशिक्षण पंचायत वांगड्यांक उपेगी थारतलें. हाका लागून तांकां आपली जापसालदारी आनी कर्तव्यांची जाण जातली. सामान्य जनता, अधिकारी आनी सरकार हांचे मजगतचें माध्यम कशें करचें हेंय तांकां समजतलें. वांगड्यांनी आपले आनी विरोधी मतदार असो भेदभाव सोडून सगल्यां खातीर काम करप गरजेचें. मतभेद कुशीक दवरल्यार उदरगतीचीं कामां आनीक सुरळीत जातलीं. नव्या वांगड्यांक पुरायेन तेंको दिवपाक सरकार तयार आसा, अशें तांणी मुखार म्हणलें.
केंद्र आनी राज्य सरकार, वित्त आयोगा वतीन जिल्लो पंचायती खातीर निधी दिता. मात कांय फावटीं केंद्रीय येवजण्यांचो निधी खर्च जायना हें मुखार आयलां. हाका लागून पंचायत वांगड्यांनी स्वता जावन फुडाकार घेवचो. तांणी लोकोपयोगी प्रकल्प राबोवन हो निधी खर्च करचो. गरज पडल्यार सरकार आनीकूय निधी दिवपाकूय तयार आसा. तशेंच विवीध तरेच्या सीएसआरांतल्यानय निधी एकठांय करचो. देशांतल्या हेर जिल्लो परिशदांक भेट दिवन हांगचे उपेगी प्रकल्प गोंयांत राबोवचे, अशें मंत्री गुदिन्हो हांणी म्हणलें.
कोयराचें वेवस्थापन योग्य जाय
मंत्री गुदिन्हो हांणी, गोंय हें एक पर्यटन राज्य आशिल्ल्यान नितळसाणेचेर भर दिवप गरजेचें. खुबश्या सुवातांचेर आयजूय कोयर वेवस्थापन योग्य पद्धतीन जायना. रस्त्यार कोयर उडयतात. जिल्लो पंचायत वांगड्यांनी आपलो मतदारसंघ नितळ दवरप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
