जिनो, पणजी जिमखाना मदीं आघाडी घेवपाची चुरस

भांगरभूंय | प्रतिनिधी

सांगें क्रिकेट अकादमीच्या मैदानाचेर चालू आशिल्ले पणजी जिमखाना आनी जिनो क्रिकेट क्लब हांचे मदीं चालू आशिल्ले जीपीएल तीन दिसांची मॅच बादाबाद उरपाचे स्थितींत पावल्या. आयज निमाण्या दिसा पयल्या डावांत आघाडी कोण घेतलो हाचे कडेन सगल्यांचें लक्ष आसतलें.

जिनो स्पोर्ट्स क्लबाच्या पयल्या डावाच्या 342 धांवड्यांक पणजी जिमखानान दुसऱ्या दिसाचे अखेरे मेरेन 5 बाद 213 धांवड्यांनी जाप दिली. जिमखानाक पयल्या डावांत आघाडी घेवपा खातीर आनीक 130 धांवड्यांची गरज आसा तशेंच ताच्यो पांच विकेटी बाकी आसात.

जिनो क्लबान 6 बाद 277 धांवड्यां वयल्यान खेळपाक सुरवात केल्या उपरांत आपल्या पयल्या डावांत आनीक 65 धांवड्यो जोडल्यो. ताच्या योगेश कवठणकारान नाबाद 128 धांवड्यांची खेळी केली. ताणें 271 बॉलांनी 18 चवके मारले. ताणें आनी शिवेंद्र भुजबळान सवे विकेटी खातीर 75 धांवड्यांची भागिदारी केली. पणजी जिमखाना वतीन ऋत्विक नायकान 4 आनी शुभम देसायान तीन विकेटी घेतल्यो.

ते उपरांत बाबत सुरवाती उपरांत पणजी जिमखानाचो डाव सांबाळ्ळो तो स्नेहल कवठणकारान नाबाद 110 धांवड्यांची खेळी केली. ताणें 153 बॉलांनी 15 चवके मारले. कवठणकार आनी शुभम देसाय (नाबाद 50) हांणी सवे विकेटी खातीर 141 धांवड्यांची भागिदारी केली. जिनो खातीर आर्यन आनी अमित यादव हांणी दरेकी 2 विकेटी घेतल्यो.

थोडे भितर धांवतकटोः जिनो स्पोर्ट्स क्लब, पयलो डाव ( 6 बाद 277 धांवड्यां वयल्यान) 111.4 ओव्हरींनी सगले बाद 342 धांवड्यो (योगेश कवठणकार नाबाद 128, शिवेंद्र भुजबळ 37, अमिय यादव 0, ओमप्रकाश चौहान 2, देवदत्त चोडणकार 15, आर्यन नार्वेंकार 4 धांवड्यो, ऋत्विक नायक 4-74, शुभम देसाय 3-80, प्रथमेश डोंगरे, तुनीश सावकार आनी हेरंब परब दरेकी एक विकेट). मानस पणजी जिमखाना, पयलो डाव, 63 ओव्हरींनी 5 बाद 213 धांवड्यो (राहुल मेहता 22, आर्यन खुटकार 14, अझान थोटा 0, स्नेहल कवठणकार नाबाद 110, तुनीश सावकार 7, राजशेखर हरिकांत 0, शुभम देसाय नाबाद 50 धांवड्यो, समीत आर्यन मिश्रा 2-62, अमित यादव 2-29, ओम प्रकाश चौहान 1-74).