भांगरभूंय | प्रतिनिधी
गोविंद गावडेः काणकोणां संगीत संमेलनाचें उक्तावण
भांगरभूंय । प्रतिनिधी
काणकोणः संगितांतले सा रे ग म प ध नी हे सात सूर मनशाचे जिणेंत उदरगत करतात. दुयेंस पयस दवरपाची जादू संगितांत आसा. संगिताक लागून जिवाक तरतरी मेळटा. ते खातीर रियाज म्हत्वाचो. रियाज केल्यारूच प्राविण्य मेळटा, अशें कला आनी संस्कृती मंत्री गोविंद गावडे हांणी सांगलें.
काणकोण कलाकार संघान पं. गोविंदराव अग्नी आनी गानतपस्विनी अंजनीबाई लोलयेंकार हांच्या उगडासा निमतान आयोजीत केल्ल्या 17 व्या संगीत संमेलनाचें उक्तावण केले उपरांत मंत्री गावडे उलयताले. काणकोणच्या रवीन्द्र भवनांत ही कार्यावळ जाली. ह्या वेळार माचयेर राज्यसभा खासदार सदानंद शेट तानावडे, संमेलनाची अध्यक्ष मनुजा नायक गांवकार, सचीव हरिश्चंद्र खोलकार, भांडारी सतीश देसाय, कमलाकार म्हाळशी हाजीर आशिल्ले.
तानावडे हांणी संगलें, काणकोण ही कलाकारांची खण. तेचवरी ह्या म्हालान गोंय मुक्तीलड्यांत म्हत्वाचें योगदान दिलां. शिक्षण मळार योगदान दितनाच गोंयच्या प्रशासनांत कर्तव्यदक्ष अशे अधिकारी दिल्यात. काणकोण कलाकार संघाच्या आयज मेरेनच्या वावराचो भोवमान करतना युवा शक्ती कडेन ही जापसालदारकी दिवपाक जाय.
मानेस्तां हस्तुकीं दिवली पेटोवन संगीत संमेलनाचें उक्तावण केलें. ते उपरांत पं. गोविंदराव अग्नी आनी अंजनीबाई लोलयेंकार हांच्या फोटवांक फुलां ओंपलीं तशेंच स्मरणकीचें प्रकाशन केलें. ह्या वेळार संघाचे संस्थापक वांगडी अजीत पैंगीणकार, शिक्षणीक मळार पुरस्कार फावो जाल्ले विजय च्यारी, प्रतिमा प्रभुदेसाय, चंद्रलेखा मेस्त्री तशेंच कलाकार शशिकांत म्हाळशी, गजानन पागी हांचो शाल ,श्रीफळ, मानपत्र आनी यादस्तीक चिन्न दिवन सत्कार केलो. तशेंच स्वस्तिक व्यंकटराय नायक, संपदा प्रभुदेसाय, बरखा नायक, अभिषेक म्हाळशी आनी सुयश कामत वयर सरपी कलाकारांचो तानावडे हांचे हस्तुकीं भोवमान केलो. मानेस्तांक माया नायक, मनुजा नायक गांवकार, नारायण देसाय, आशा नगर्सेकार, सुभाष कोमरपंत, सुरज कोमरपंत, पुजा नायक, गणाधीश नगर्सेकार, सतीश देसाय, नेत्रा नायक हांणी फुलांतुरे भेटयले. मानसी वाळवे आनी अनिल फळदेसाय हांणी सुत्रसंचालन केलें गणेश वंदनेन कार्यावळीची सुरवात जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
