भांगरभूंय | प्रतिनिधी
आयज 23 एप्रील. संवसारीक पुस्तक दीस. ते निमतान….
आयज 23 एप्रील. जागतीक पुस्तक दीस. खरे म्हणल्यार अमुकच दीस पुस्तकाचो, अशे आमी म्हणू शकना. कित्याक तर सगळेच दीस हे पुस्तकाचे. पुस्तक म्हणलें काय वाचन आयलें. वाचपीच नासत तर त्या पुस्तकांक अर्थ ना. गोंयांत बरे वाचपी आसात. हो दीस व्हड लेखक विलियम शेक्सपियर हांचो स्मृती दीस. शेक्सपियराचो जल्मदीस आनी भायर पडपाचो 23 एप्रील हो एकूच दीस. तो फुडें इंग्लीश भाशा दीस म्हूण संयुक्त राष्ट्रांनी थारायलो. आमच्या देशांत जायते लेखक जावन गेले. देखीक कुसुमाग्रज, गडकरी, फडके हे मराठींत तर कोंकणीत रवींद्र केळेकार, दामोदर मावजो सारखे लेखक. शेक्सपियर हे इंग्लीश म्हणटकच तांचें साहित्य संवसारभर पावलें. कोंकणी साहित्य तशेंच पावपाक जाय, जाल्यार ताचो अणकार जावंक जाय.
पुस्तकांचो सांगात आमकां आसत जाल्यार बरो. जशी आधाराची गरज आसता तशी भितरल्या आत्म्याक लेगीत आधार जाय पडटा. ते खातीरूच वाचन जाय. तें केले उपरांत आत्म्या कडे जावपी संवाद आमकां खुशाल करतात, प्रेरणा दितात. वाचनान तुमची विचारसरणी बदलपाची ताकत आसता. पुस्तक हो तुमचो खरो इश्ट. भायर एक भितर दुसरेंच, अशें पुस्तक केन्ना करीना. जेन्ना तुमी अणकारीत पुस्तक वाचतात तेन्ना एका पुस्तकांतलो संवसारुच ताचे वांगडा व्हरता. व्हड वावर करपाक ह्या पुस्तकांनीच प्रेरणा दिली. शिवाजी महाराजांक तांचे आवयन ल्हान आसतना रामायण, महाभारतांतल्यो काण्यो सांगल्यो. हिंदवी स्वराज्य स्थापन करपी महाराजांक ही प्रेरणा आवयच्या काणयांनी मेळ्ळी. जिजाबायन पुस्तकांच वाचूंक नाशिल्लीं जाल्यार? रामायण जावं महाभारत वाचतना हातूंतली पात्रां कशी जीण जगली, ताचो प्रभाव पडटा. जे कोण उलयतात तशे वागतात ते आमकां चड लागीं आसतात.
अमेरिकेचे अध्यक्ष अब्राहम लिंकन हांकां वाचपाची आवड. तांणी एका भाटकारा कडल्यान व्हेल्ले. तें वाचतना तांचो दोळो लागलो. तेन्ना लायट नाशिल्ली. पॅत्राॅलाच्या दिव्यार वाचतना पुस्तक उज्यान लासलें. लिंकनान पुस्तकाच्या मोला इतलें काम करून ते रीण फारीक केले. हाचे वेल्यान तांचो वाचन मोग कितलो, तें कळटा. आयच्या संवसारांत जर तुमी वाचीनात जाल्यार फाटीं पडटले. वाचन तुमकां सर्तींत दवरता. व्हड वाचनालयां येवजण्यो, सर्ती दवरतात, पुस्तकांचे प्रदर्शन दवरतात.
पुस्तकांचे बरेच फायदे सांगू येतात. तुमचे उलोवप सुदारपाक मजत जाता. उलोवपा भितर विंगड विंगड विशय येवं शकतात. हाका लागून उलोवप आयपाक लोक आशेतले. आजच्या दिसा पुस्तकां संबंदीच्यो कार्यावळी जातात. वाचनालयानी हो दीस तरेकवार कार्यावळींनी आमी मनयतात. भारताचे मिसायल मॅन म्हणून वळखतात ते आदले राष्ट्रपती डॉ कलाम आसूं, आंबेडकर वा पनीकर ह्या व्हड मनशांनी वाचपा खातीर खूब त्रास घेतल्यात. गरीब आसू वा गिरेस्त, कोणूय वाचन करूं शकतात. आमचो मेंदू बरो उरपाक वाचन मजत करता. तांचो हो व्यायाम म्हणूं येता. वाचनमोगी शिक्षक तर वाचनाचो कार्यावळी म्हयनोभर लेगीत आयोजित करता. आतां कांय पुस्तक मोगी चर्चा, साहित्यिकाची भेट घडोवन हाडटात. हांचो हेत म्हणल्यार चडांतचड वाचक तयार जावचे.
ल्हान भुरग्यांक काण्यो आयकपाक आवडटात, हें काम बापूय, आवय हीं पुस्तकां वाचुनूच पुराय करतात. डॉ आंबेडकर सदांच सांगताले की शिक्षणान मनीस खरो स्वतंत्र्य जाता, हें आमकां वाचनांतल्यान कळता. आमचे शिक्षण पद्धतींतले दोष ते वाचन करताले म्हूण सांगूंक शकले. डॉ कलाम हांची ‘विंग्स ऑफ फायर’ ही आपजीण जरूर वाचात. आर्थर क्लर्क हो तांचो आवडटो लेखक. रवींद्रनाथ टागोर हांचें काव्य लेगीत तांकां आवडटालें. ते सदांच सांगताले, मनशाचें ध्येय जर पुराय जावपाक जाय तर वाचन करप गरजेचें. तें केल्यार म्हायती, ज्ञान मेळटाच, खेरीज तुमचो विकास लेगीत करूं येता. तांचो भर आशिल्लो तो चरित्र, आत्मचरित्राचेर. नेहरू- गांधी ह्या सारक्यांचीं पुस्तकां तांकां घडयतालीं. शिक्षक वाचनाचेर भर दियात अशें सदांच सांगीत आसतात, ताचें कारण हेंच.
आतां कांय पालक लेगीत वाचनांत रस घेवपाक लागल्यात. तांकां खबर आसा की ल्हान भुरग्यांची कल्पनाशक्त वाडपाक वाचन उपेगी पडटा. एक सांगपाक जाय ते म्हणल्यार वाचनाचे लाभ रोखडेच मेळटात अशें ना. ते कांय वर्सांनी तुमकां मेळूं शकतात. एका काळार वाचनाची सर्तूच लागताली. पूण संगणक, मोबायल आयले उपरांत हें सगळें बंद जालें. प्रत्येकाच्या हातांत मोबायल आयलो आनी पयलीं पुस्तकां ना जालीं, मागीर वाचपाचें विसरपाक लागले. ना म्हणल्यार मोबायलाचेर आयिल्ले संदेश, बातम्यो आमी वाचतात. मागीर त्यो खऱ्यो आसूं वा फट. ताचो वायट परिणाम दिसपाक लागला.
जसो म्होंवा मूस फुला फुलार भोंवन म्होंव लागीं करता तेच वरी बरो वाचपी लेगीत बरीं बरीं पुस्तकां वाचून तातूंतले गिन्यान वेंचित आसता.
म्हापश्यां आयज 23 एप्रीलाक पुस्तक दिसा निमतान बरींच वर्सां बंद आशिल्ली आतायद लायब्ररी उक्ती जाता. बार्देशांतले वाचन मोगी हे घडणुकेची वाट पळयताले. हें वाचनालय खूब आदलें. खेरीज तळमजल्यार आशिल्ल्या कारणांन सगळ्यांक बरें वापरून मेळटा.
आमच्या मेंदवाक वाचनाक लागून व्यायाम जाता. मनाक उर्बा मेळटा. एकाग्रता वाडपाक मजत जाता. वाचन तुमकां व्हड करूं शकता. जायते लाभ वाचनान जाता. खाशेली गजाल म्हणल्यार वाचन तुमका एकटेंपण जाणवपाक दिना. तेन्ना वाचनाक जरूर सुरवात करात. आयचो दीस हाचो उगडास करपा खातीर.
(आकाशवाणी पणजीच्या बरेंपणान)
रामदास केळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
