भांगरभूंय | प्रतिनिधी
निसर्गाच्या चक्रांत ऋतू बदलत उरतात. शिंयाची कडकडीत थंडी, गिमाची उमकळ आनी पावसाचो ओलावो अणभवता आसतनाच शेवटाक वसंताचें आगमन जाता. वसंत म्हळ्यार नवें जिवन, नवो उत्साह आनी नव्या सुरवतीचो काळ. झाडांक नवी पालवी फुट्टा, फुलांचो परमळ दरवळटा आनी सगली सृश्ट रंगांनी नट्टा. हो बदल फक्त सैमा पुरतोच मर्यादीत आसना, तो मानवी जिवनाकूय लागू जाता. जिवनांतूय केन्ना काळोख, केन्ना संघर्श, तर केन्ना उमेदीचे खीण येतात. पूण दरेक कठीण टप्प्या उपरांत एक वसंत येताच जो परिवर्तनाचो आनी नव्या आशेचो संदेश दिता.
जिवनाक ऋतुंची उपमा दितात. भुरगेपण म्हळ्यार फुलपी वसंत, तरणाटेपण म्हळ्यार झगझगीत गिम्म, जाण्टेपण म्हळ्यार थीर शरद, आनी म्हातारपण म्हळ्यार शांत हिवो. पूण ह्या दरेका टप्प्यार वसंताचें आसप खूब गरजेचें आसा. कारण वसंत हो फक्त पिराये कडेन संबंदीत नासून तो काळजाच्या मना कडेन संबंदीत आसा. ज्या खिणाक मनीस निराशे भायर येवन नव्या आशेन फुडें वचपाचा निर्णय घेता, त्याच खिणाक ताच्या जिवनांत वसंत सुरू जाता.
जिवनांत दरेकल्या अडचणींक फुडो करचो पडटा. अपेस, अर्थीक अडचणी, नात्यांतलो तणाव, भलायकेच्यो समस्या हें सगले जणू हिव्या सारकें थंड आनी कठीण आसता. ह्या काळांत मन खचता, आत्मविस्वास उणो जाता. पूण होच काळ आमकां घटमूट करता. जशीं झाडां हिव्यांत पानगळ सोंसतात, तशींच मनशां लेगीत कठीण प्रसंग सोंसतात. आनी जेन्ना नव्यो संदी, नवे विचार आनी सकारात्मक बदल येतात, तेन्ना जिवनांत वसंत फुलता.
हो वसंत (ऋतू) अचकीत येना. तो कश्ट, संयम आनी आत्मविस्वास हांचोच परिणाम आसता. अपेसांतल्यान शिकप, चुकी मान्य करप आनी स्वताक सुदारपाचो प्रयत्न करप ह्याच प्रक्रियेंतल्यान बदल घडटा.
वसंत म्हळ्यार मनांतलो बदल. नकारात्मकताय, भंय आनी असुरक्षीतताय फाटीं सोडून सकारात्मकताय आपणावप म्हळ्यारच जिणेंतलो वसंत. जेन्ना आपूण स्वताचेर विस्वास दवरतात, तेन्ना पळोवपाची नदर बदलता. समस्या आडखळ दिसनात, तर त्यो शिकपाची एक संद अशें दिसता. मनांतल्या बदला खातीर आत्मचिंतन गरजेचें आसता. आपल्या गुण-दोशांची वळख जाली की सुदारपाची प्रक्रिया सुरू जाता. जशें झाड आपलीं पोरणीं पानां झडयता, तशेंच आमीय पोरण्यो वायट संवयो सोडून नव्यो बऱ्यो संवयो आपणावंक जाय.
जिवितांतलो वसंत फक्त वैयक्तीक उदरगती पुरतोच मर्यादीत आसना. तो नात्यांनीय फुलता. केन्ना केन्ना गैरसमजाक लागून नात्यांनी पयसुल्लेपण येता. कडूसाण आनी अहंकार हाका लागून संबंद तुटपाच्या हुमऱ्यार येतात. पूण संवाद, समज आनी क्षमाशीलता ह्या गुणांक लागून नात्यांनी परत वसंत येवंक शकता. ज्या नात्यांनी मोग, मान आनी विश्वास आसता, तीं नातीं चड घट जातात. वसंतांतल्या फुलां भशेन नात्यांनीय सोबीतकाय आनी सुगंध निर्माण जाता.
विद्यार्थ्यांच्या जिवितांत वसंत म्हळ्यार जैताचो काळ. खर कश्ट, सातत्य आनी योग्य मार्गदर्शनाक लागून जेन्ना जैत मेळटा, तेन्ना आत्मविश्वास वाडटा. हो आत्मविश्वास फुडल्या वाटचाली खातीर प्रेरणा दिता. करियरांत बदल गरजेचो आसता. नवीं कौशल्ल्यां आत्मसात करप, बदलते परिस्थिती कडेन जुळोवन घेवप आनी नव्यो संदी स्विकारप हीं सगलीं परिवर्तनाचीं लक्षणां आसात. जो मनीस बदल स्विकारता, ताच्याच जिवितांत जैताचो वसंत फुलता.
(वसंत) ऋतू आमकां निसर्गांतल्यान प्रेरणा दिता. झाडांक नवी पालवी येता, फुलां फुलतात, सुकणीं घोंटेर बांदतात ही सगली प्रक्रिया पुनर्जल्माची आसा. सैम आमकां शिकयता की दरेक शेवटा उपरांत एक नवी सुरवात आसता.
जर सैम दर वर्सा नव्यान फुलूंक शकता, जाल्यार मनीस कित्याक ना? अपेस आयलें तरी परतून यत्न करप, निरशेवणी आयली तरी उमेद सांबाळप आनी थांब नासताना फुडें वचप हीच जिणेंतल्या वसंत ऋतूची शिकवण.
बदला खातीर सकारात्मक नदर गरजेची आसा. परिस्थिती सदांच आमच्या मना सारखी आसना, पूण आमची प्रतिक्रिया आमच्या हातांत आसता. जर आपूण दरेक परिस्थिती कडेन शिकपाचे नदरेन पळयत जाल्यार ती आमचे खातीर एक संद जाता.
वसंत म्हळ्यार उमेद. जसो सकाळचो सूर्य काळोख पयस करता, तशेंच सकारात्मक विचार मनांतलो भंय आनी दुबाव पयस करतात.
जिवितांतलो वसंत तिगोवन दवरपा खातीर शारिरीक आनी मानसीक भलायकी म्हत्वाची आसता. नेमान व्यायाम, संतुलीत आहार, ध्यान आनी फावो तो विसव हाका लागून मन प्रसन्न उरता. मन शांत आसलें जाल्यार बदल सहजपणान आपणावंक येतात.
जिवितांतलो वसंत आनी बदल हे एकमेकां कडेन घट्ट जोडिल्ले आसात. वसंत आमाकां सांगता की बदल हो सैमाचो नेम आसा. अडचणींक भियेवं नाकात, कारण ताचे उपरांतच नव्या आशेची फांतोड जाता.
दर एका मनशाच्या जिवितांत एक वसंत आसता जो ताका नवे उमेदीन, नव्या विश्वासान आनी नवे दिकेन फुडें वचपाक प्रेरणा दिता. मनांत आसा, कृतींत सातत्य आनी विचारांत सकारात्मकता आसली, जाल्यार तर एक दीस वसंत ऋतू भशेन थारूंक शकता.
जिवितांतलो वसंत सांबाळप, बदल आपणावप आनी खोशयेन फुडें वचत रावप हीच ह्या ऋतूची खरी शिकवण आसा.
प्रमिला प्रसाद फळदेसाय
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
