जिणेंतलें जीपीएस तत्व

भांगरभूंय | प्रतिनिधी

हातांतल्यान सुटून गेल्ली संद आमकां घडये एका व्हड चुकींतल्यान वाटावंक शकता. हे खीण सुरवेक त्रास दिवपी दिसले तरी आमच्या खऱ्या उद्देशा वटेन, जीपीएस यंत्रणे भशेन मार्गदर्शन करतात.

मनशाच्या जिणेचें वर्णन म्हळ्यार एक प्रवास जो वेगळ्या वेगळ्या आडमेळ्यांनी आनी आव्हानांनी भरिल्लो. अनपेक्षीत वळणां आनी अनवळखी वाटो आमचे जिणेंत जायते खेपे आमकां मेळटात. ह्या कठीण मार्गांत, जीपीएस यंत्रणे भशेन जिणेचें एक तत्व आमच्या जिविताक मार्गदर्शन आणी दुरुस्ती करता तशेंच जीण अदीक बरे तरेन समजून घेवपाक एक बळगें दिता. जशें जीपीएस आमच्या हालचालींचो नियाळ घेत आसता, आनी नियोजीत मार्गांतल्यो आडखळी वळखून आमकां परतून मार्गाचेर हाडपा खातीर वाटेची मेजणी करता ते भशेन जिवितांत लेगीत जायते लोक, अणभव, मुल्यां आनी हेर अश्यो कितल्योश्योच गजाली आमच्या जिणेंतल्या भितरल्या आनी भायल्या नेव्हिगेशन यंत्रणे सारके काम करतात. जेन्ना आमी चुकीचे निर्णय घेतात, आडमेळीं येतात वा नकारात्मकतायेक तोंड दितात तेन्ना हीं मार्गदर्शक तत्वां आमचो मार्ग परतून एकठांय करपाक आनी नव्यान स्पश्टतायेन आमच्या मोखी कडेन वचपाक मजत करतात.
जेन्ना आमी प्रवास करतना जीपीएस सुरू करतात तेन्ना वाट चलतना एखादें वळण वा मार्ग चुकिल्ले खातीर ही पद्दत आमकां चूक थारायना. जाल्यार ती आमकां धीर धरून परतून मार्गार हाडपाक मजत करता. आमचे जिवीत लेगीत अशेंच काम करता. आमचे जिणेंत चुकी अपरिहार्य आसतात. मात चूक केली म्हूण तो कितें अंत न्हय. दर एक अपेस, निराशा वा अनपेक्षीत आडमेळीं म्हळ्यार आपलो मार्ग नव्यान चिंतपाची, विचार करपाची आनी परतून यत्न करपाची संद जाता. जिविताची फेररचणूक ही अणभवांतल्यान शिकून घेतिल्ल्या धड्याच्या रुपांत येता. ह्यो दुरुस्त्यो केन्ना केन्ना कठीण आसल्यो तरी आमची मोखीची भावना घट करतात आनी काळा प्रमाण बुदवंतकाय वाडपाक आदार करतात. जिवितांत येवपी हे अणभव म्हळ्यार एके तरेचें जीपीएस.
आमचे भोंवतणचे लोक म्हळ्यार लेगीत एक जीपीएस. कुटुंबांतले वांगडी, इश्ट, मार्गदर्शक, शिक्षक आनी अनवळखी मनीस लेगीत कांय वेळार मार्गदर्शक शक्ती म्हूण काम करतात. तांचे सल्ले, आदार आनी प्रामाणीक प्रतिसाद आमकां भावनीक, वैयक्तीक आनी वेवसायीक आव्हानां फुडो करपाक मजत करता. जशे तरेन जीपीएस मुखार येवपी आडमेळीं विशीं आनी धोक्या विशीं आदींच म्हायती दिता, तेच प्रमाण आमच्या संभाव्य चुकीचे निवडी विशीं वा आमच्या ध्येयां सावन आमी पयस वचपाच्या आमच्या एखाद्या पावला विशीं, खऱ्या मनान काळजी घेवपी आमचे लोक आमकां शिटकावणी दितात. तांची उपस्थिती आमकां गोंदळाच्या खिणांनी स्पश्टताय दिता आनी तांचें प्रोत्साहन आमचे जिवीत सुदारून आमचो आत्मविस्वास परतून मेळोवपाक मजत करता. जायते फावटीं, मनशाच्या रुपांतलें हें ‘जीपीएस सिग्नल’ आमकां परतून स्वताक सोदून काडपाक मजत करता.
जीपीएस तत्वाचो आनीक एक म्हत्वाचो घटक म्हळ्यार आमचो स्वताचो भितरलो आवाज. आमचे अंतर्ज्ञान वा आमचो विवेक. गाडयेंतलो जीपीएस शांतपणान वाहन निर्देशीत करता तेच तरेन आमची भितरली मार्गदर्शन पद्दत आमकां सतत दिशा दाखयता. जेन्ना आमी ताचे कडेन आडनदर करतात तेन्ना आमी ताण दिवपी वा कठीण मार्गाचेर पावतात. पूण जेन्ना आमी आमचीं मुल्यां आनी भितरल्या बुद्धी कडेन परतून जोडटात त्या खिणाक, जिवीत आमकां मुखार वचपाक एक नवो मार्ग दिता. आमचे हें अंतर्गत नेव्हिगेशन आमची जीण अदीक घटमूट करपाक मजत करता.
जीपीएस तंत्रज्ञानाक शक्त दिवपी उपग्रहां भशेन श्रद्धा, आशा आनी लवचीकपण ह्यो गजाली ह्या उपग्रहां भशेन काम करता. अदृश्य आसलें तरी जिणेच्या काळखांतल्या टप्प्यांत लेगीत मुखार वचपाक जाय आशिल्ली तांक आनी दिका ते आमकां दितात. जेन्ना हातांतल्यो गजाली सुटून वचपाक लागतात तेन्ना नवो मार्ग उक्तो जातलो अशें मानपाक आशा आमकां आदार करता. आडमेळीं तात्पुरत्यो आसात हाची खात्री श्रद्धा आमकां दिता. परत परत अपेस आसून लेगीत चलप चालूच दवरपाचें धाडस लवचीकपण आमकां दिता. हे भितरले गूण भायल्यो अडचणी काडून उडयना पूण आमी केन्नाच तातूंत अडकून उरचे नात हाची खात्री दितात. जीपीएस जे तरेन रस्त्यार जावपी बदलां कडेन जुळोवन घेता तसोच आमचो मानसीक नकासो परतून जाग्यार हाडपाक ह्यो अंतर्गत शक्ती आमकां बळगें दितात.
अनपेक्षीत घडणुको (सकारात्मक आनी नकारात्मक दोनूय) लेगीत जायते खेपे, जिणेंत कितें तरी बरें घडटले हाची सुलूस दितात. एखादें दार बंद जाल्लें आसलें तरी लेगीत ते अर्थपूर्ण थारूं येता. एखादें नोकरेचें जावपी लुकसाण आमकां आमच्या आवडीच्या करियरा कडेन वळपाची दिशा दाखयता. हातांतल्यान सुटून गेल्ली संद आमकां घडये एका व्हड चुकींतल्यान वाटावंक शकता. हे खीण सुरवेक त्रास दिवपी दिसले तरी आमच्या खऱ्या उद्देशा वटेन, जीपीएस यंत्रणे भशेन मार्गदर्शन करतात. काळा वांगडा, आमकां जायते फावटीं लक्षांत येता की आमी समजताले तो मार्ग चुकीचो आशिल्लो आनी प्रत्यक्षांत आमी जे वाटेर चलत आयले तोच आमचो खरो मार्ग आशिल्लो.
जिणेंतलें जीपीएस तत्व आमकां हें लेगीत शिकयता की एखादे चुकीचें वळण घेतले वा चुकून हेर खंयच्या तरी मार्गार पावले म्हूण भियेवपाचें कारण ना. जशें जीपीएस आमकां दर चुकीच्या कृतीचेर मार्गदर्शन करता तशें जिवीत लेगीत नवे मार्ग, नवी संद दिवप केन्नाच बंद करिना. जेन्ना आमी ही मानसीकताय आपणायतात तेन्ना जीण अदीक अर्थपूर्ण जाता. जिणेंतले दरेक पावल उद्देश पूर्ण थारता. आमच्या जिवितांत जीपीएस यंत्रणेचे पडबींब वेगळ्या वेगळ्या तरांनी आसा. आमी जो मेरेन प्रक्रियेचेर विस्वास दवरतले आनी चुकीतल्यान शिकपाक तयार आसतले तो मेरेन, कितल्योय वाटो चुकल्यो तरी आमी शिकत रावतले, वाट सोदीत रावतले.

डॉ. चिन्मय मधू घैसास
9823728640