भांगरभूंय | प्रतिनिधी
एकतरी दिसाळें विकत घेवचेंच. पूण इंटरनेटाचेर मेळपी 3-4 तरी दिसाळीं नेमान चाळचीं. सगल्यांच्यो वेबसायटी आसात.
सद्या धावे यत्तेचे विद्यार्थी प्रिलीम परिक्षा दितात. मागीर ते पयले पयले परिक्षेक तोंड दितले. परिक्षा दिवपाचें काम ते नोकरी लागसर वा शिकून जायसर करतले. आमचे जिणेंत आमी दरदिसा परिक्षा दित आसतात. फरक इतलोच की शालेय परिक्षेक आमकां मार्गदर्शन मेळटा, पूण जिणेचे परिक्षेंत परिक्षक, मार्गदर्शन मेळटाच अशें ना. ते परिक्षेक पेपर कसलो येत, तेंय कळना. शाळेचे परिक्षेंत कसलो पेपर आसता तें पयलींच खबर आसता. वेळ पसून आसता. मात जिणेचे परिक्षेंतलो अभ्यासक्रम आमकां खबर नासता, अचकीत मुखार परिक्षा उबी रावता. वेळूय नासता. हे विशीं खूब कितें सांगू येता. पूण सध्या आमकां शिक्षणीक परिक्षेक कशें सामकार वचपाक जाय. ते विशीं भोवमानादीक प्रधानमंत्री नरेंद्र मोदीजी हांणी आपल्या मन की बात कार्यावळींत सांगलां. तें सगल्यांक उपेगी थारतलें. ताचें तांणी पुस्तकूय काडलां. सगल्यांनी तें वाच्चें.
शाळा, म्हाविद्यालयांतल्या परिक्षां कडेन कशें पळोवपाचें? आदरणीय मोदीजींच्यो कार्यावळी जे नेमान आयकतात, ते विद्यार्थी सांगतात की जात्रेक वतना तुमचे भितर उत्साह आसता, तसोच परिक्षेत दवरित जाल्यार ताण येवचो ना, अशें जायतें मार्गदर्शन मोदीजींचे हे कार्यावळींतल्यान जाता. ताण येवचो न्हय, ताणा खातीर कोणे आत्महत्या करची न्हय, हे खातीर पालक, शिक्षकांनी यत्न करपाक जाय. ते खातीर सगल्यांत पयलीं विद्यार्थ्यांनी दिसाक देड वर तरी अभ्यास करपाक जाय. जितलो चड अभ्यास, उजळणी करतले तितलो तुमकां चड आत्मविस्वास येतलो.
सादी देख घेवया. ल्हान आसतना सगल्यांकूच काळखाचो भंय दिसता. भिरांत वचपाचो सादो प्रयोग म्हणल्यार आमी त्या काळखाची संवय करून घेवपाक जाय. मागीर भिरांत वता. कोरोनाक लागून सगल्याच शिक्षण संस्था, तज्ञांनी वेबसायटी तयार केल्यात. तातूंत आदले पेपर दिल्यात. म्हणटकच पेपर पुंजावपाचो त्रास ना. हे पेपर तुमी घडयाळाचेर टायम लावन सोडोवचे. म्हणटकच तुमकां तुमच्या वेगाची कल्पना येतली. इतलेंच न्हय, तर खंयच्या प्रस्नाक तुमी कितलो वेळ घेतलो, ताचोय अदमास येतलो. घरांत बसूनच ही डमी परिक्षा दिली जाल्यार तुमकां वेळेचें वेवस्थापन करपाक मेळटलें. आपशीच अभ्यासूय जातलो. परिक्षेची संवय जातली. हीच पद्दत तुमी सगल्याच परिक्षांक वापरूंक शकतात. शाळेंतल्या प्रत्येक परिक्षेक कसलो अभ्यासक्रम आसा, हें तुमकां खबर आसता. देखून तुमी बरी तयारी करपाक शकतात.
दरेके परिक्षेची शिक्षकांनीय तयारी करून घेवपाक जाय. ते घेतात. हाका लागून हांव म्हणटा, तुमी कसलेय परिक्षेंत पास जावपाक शकतात. इतलेंच न्हय, बरे गुण घेवपाक शकतात. तशेंच तुमी जाय जाल्यार अभ्यास करतना गायडांची मजत घेवपाक शकतात. पूण शाळांनी ती परवानगी नासता. सध्या सोशल मिडियाचेर कितलेशेच वर्ग चल्ल्यात ते दिसतात. युट्यूबाचेर वचून पळोवचें. तातूंतलो खंयचो बरो वर्ग आसा, ताचो तुमी लाव घेवं शकता. नेमकी कोणाची मजत घेवची, तें तुमी शिक्षकांक विचारूं शकतात. नाजाल्यार रिव्ह्यू वाचून तुमी थारावं शकतात. घरांतल्या कोणाक विचारूं शकतात. बरी शाळा खंयची हें कोण सांगू शकना, तशें बरो आॅनलायन वर्ग खंयचो, हें सांगप कठीण. तें जाचें ताणें थारावचें.
फक्त विद्यार्थीच न्हय, तर सगल्यांनीच गिन्यान अपडेट दवरूंक जाय. आयज पेपर वाचपी (बातम्यो, लेख, अग्रलेख, आयतार पुरवणी, कथा, कविता) वाचपी भुरगे, तरणाटे नेटान उणे जायत आसात. खूब हु्स्क्याची गजाल. विद्यार्थ्यांनी राष्ट्रीय, आंतरराष्ट्रीय आनी प्रादेशीक अशे विशयांचे वांटे घालून गिन्यान मेळोवचें. दिसाळें वाचल्यार हें सहज शक्य आसा. एकतरी दिसाळें विकत घेवचेंच. पूण इंटरनेटाचेर मेळपी 3-4 तरी दिसाळीं नेमान चाळचीं. सगल्यांच्यो वेबसायटी आसात. जमता तितलें लेख, बातम्यो वाच्च्यो. कोंकणी भाशेचेर शेक मेळोवपाचो आसल्यार भांगरभूंय दिसाळें, जाग, बिम्ब हीं नेमाळीं वाच्चीं. बरोवपाचो यत्न करचो. सद्दां वाचपाची संवय दवरपाक जाय. कारण ती म्हायती परिक्षेत, सर्तींनीं उपेगी पडटाच. व्यक्तीमत्व सुदारता. कांय गजाली वाचल्या उपरांत तांचीं नोंद दवरपाक जाय.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
