भांगरभूंय | प्रतिनिधी
पणजी : शेनवार, २० डिसेंबराक जावपी जिल्लो पंचायत वेंचणुके खातीरचो जाहीर प्रचार आयज सकाळीं ८ वराचेर सोंपलो. जिल्लो पंचायतीच्या वट्ट ५० मतदानसंघां खातीर शेनवारा ८ लाख ६९ हजार ३५६ मतदार मतदान करतले. दोनूय जिल्लो पंचायतींनी दादल्यां परस बायलां मतदारांचो आंकडो चड आसा. हाका लागून बायलां मतदारांचीं मतां निर्णायक थारतलीं. सोमारा २२ डिसेंबराक मतमेजणी जातली.
२०२७ वर्सा विधानसभा वेंचणूक जातली. ताचे पयलीं एप्रील २०२६ मेरेन फोंडें मतदारसंघांत पोटवेंचणूक जातली. जिल्लो पंचायत वेंचणुकेच्या निकालाचेर राजकी पक्ष तशेंच इत्सूक उमेदवार विधानसभा वेंचणुके खातीर रणनिती थारायतलें. हाका लागून जिल्लो पंचायत वेंचणुकेचे निकाल महत्वाचे थारतले. उत्तर गोंयांत २५ मतदारसंघां खातीर ४४०१९९ मतदार आसा. दक्षीण गोंयांतल्या २५ मतदारसंघां खातीर ४२९१५७ मतदार आसा. उत्तर गोंयांत मतदाना खातीर ६५८ जाल्यार दक्षीण गोंयांत मतदाना खातीर ६२६ मतदान केंद्रां आसात. मतपत्रिकेच्या आदारान जावपी जिल्लो पंचायत वेंचणुके खातीर सत्ताधारी भाजपा सयत विरोधी कॉंग्रेस, आप, आरजी हे पक्षांनी नेटान प्रचार केलो. मुख्यमंत्री डॉ. प्रमोद सावंत हांचे सयत प्रदेश भाजप अध्यक्ष दामू नायक हांणी गोंय पिंजून काडलें. मंत्री तशेंच आमदारांनी आपआपल्या मतदारसंघाच्या प्रचाराकडेन लक्ष केंद्रीत केलें. आपाचे राष्ट्रीय संयोजक अरविंंद केजरीवाल सोडले जाल्यार हेर पक्षांचे राष्ट्रीय फुडारी प्रचाराक येवंक नात. अरविंंद केजरीवाल हांणी मात तीन दिस आपाच्या उमेदवारां खातीर प्रचार केलो. जाहीर प्रचार सोंपिल्ल्यान वेंचणुकेतले उमेदवार आतां व्यक्तीगत प्रचाराचेर भर दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
