भांगरभूंय | प्रतिनिधी
मडगांव, प्रतिनिधी ः बाणावले दर्यादेगेर मोडिल्ल्या नुस्तेमारी जाळ्यांत आडकल्ल्या कांसवाच्या पिलांक नुस्तेकार पेले फर्नांडीस आनी ताच्या वांगड्यांनी सोडयले आनी परतून दर्यांत सोडले.
पेले फर्नांडीस बिरेस्तारा सकाळीं 6 वरांचे सुमाराक नुस्तेंमारी करपाक दर्यादेगेर आयिल्लो. त्या वेळार कांय रस्ताद सुणीं भोंकतना दिसली आनी त्याच वाठारांत कावळेय भोंवतना ताका दिसले. देखून ताणे थंय वचून पळयले तेन्ना ताका नुस्तेमारी करपा खातीर वापरिल्ल्या मोडिल्ल्या जाळ्यांत आडकून उरिल्लीं कांसवाचीं पिलां दिसली. उपरांत ताणें त्या कांसवाच्या पिलांक सुणे आनी कावळ्यां पसून सोडयले आनी तांकां दर्यांत परतून सोडले. ही म्हायती पेले हांणी दिली.
पर्यावरणाची राखण करपा खातीर सगल्यांनी यत्न करपाची गरज आसा अशेंय पेले हांणी सांगलें. बाणावलीचे दर्यादेगेर जाळ्यांत मेळिल्ली कांसवाची पिलां दुर्मिळ ऑलिव्ह रिडले कांसवाची आशिल्ल्याचें दिसून आयलें. सुमार ११ कांसवाच्या पिलांक जाळ्यांतल्यान सोडयले आनी बोटीन तांकां खोल उदकांत व्हरून पेले फर्नांडीस आनी ताच्या वांगड्यांनी सोडले आनी जीवदान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
