भांगरभूंय | प्रतिनिधी
धोरणात्मक बदल करून भारताची आक्रमक भुमिका
भारताचे भुंयेर आतंकवादी हल्ले सोंसून घेवचे नात
केंद्र सरकाराचो म्हत्वाचो निर्णय
खबरां संस्था
नवी दिल्ली : पहलगाम आतंकवादी हल्ल्या उपरांत भारत आनी पाकिस्ताना मदले संबंद खूबच इबाडल्यात. भारतान ऑपरेशन सिंदूर चालीक लायले उपरांत पाकिस्तानान थेट सैन्याच्या तळांक लक्ष्य करपाचो यत्न केले उपरांत परिस्थिती हाता भायर गेल्या. हाचे उपरांत आतां भारतान खूब व्हड निर्णय घेतला. फुडारांतलो कसलोय आतंकवादी हल्लो भारता आड झूज समजतले, असो निर्णय घेतला. भारतान आतंकवादा आड खूब खर भुमिका घेतल्या. केंद्र सरकारांतल्या उच्च पांवड्या वयल्या सुत्रांनी ही म्हायती दिल्या. केंद्र सरकारान घेतिल्लो हो निर्णय खूब म्हत्वाचो आसा. भारतान आतंकवादा आडचे लडायेंत आपलें धोरण बदल्ल्याचें हें लक्षण आसा.
भारताक अशांत करपाच्या दिश्टीकोनांतल्यान पाकिस्तानांतल्यो आतंकवादी संघटणा जम्मू-काश्मीरांत सेगीत हल्ले घडोवन हाडटात. त्या हल्ल्यांक भारत वेळावेळार योग्य जाप दितात, तरीय आतंकवादी हल्लो बंद जायनात. ताका लागून भारतान हे संबंदांतली आपली भुमिका बदल्ल्या.
भारतान धोरणात्मक बदल करून आक्रमक भुमिका घेतल्या. फुडारांत आमचे जमनीर जाल्लो कसलोय आतंकवादी हल्लो आमी देशा आड झूज मानतले आनी ताका तेच तरेन जाप दितले, अशी भुमिका भारतान घेतल्या.
भारतान ऑपरेशन सिंदूर चालीक लावन पाकिस्तान आनी पाकव्याप्त काश्मीरांतले आतंकवाद्याचे 9 तळ उध्वस्त केले. ते उपरांत पाकिस्तानान जाप दितना भारताच्या सैनिकी तळांक लक्ष्य करपाचो यत्न केलो. हे फाटभुंयेर भारतान आतंकवादा आड खर निर्णय घेतला. तशी म्हायती केंद्रा कडल्यान आदीच दिल्या. कर्नल सोफिया कुरेशी विंग कमांडर व्योमिका सिंग आनी विदेश सचीव विक्रम मिस्री हांचे वांगडा सकाळीं घेतिल्ले पत्रकार परिशदेंत ही म्हत्वाची म्हायती दिली.
पाकिस्तानान पंजाबाचेर हाय स्पीड क्षेपणास्त्र सोडलें. तेच वांगडा श्रीनगर, अवंतीपुरा, उधमपुरांतल्या वैजकी संस्थांक लक्ष्य करपाचो यत्न केलो. भारता कडल्यान पाकिस्तानाक जश्याक तशी जाप दिली. पाकिस्तानान पंजाबांतल्या हवाई तळाक लक्ष्य करचे खातीर हाय स्पीड क्षेपणास्त्र सोडलें. मध्यान रातीर 1.40 मिण्टांचेर पाकिस्तानान ही आगळीक केली, अशी म्हायती कर्नल कुरेशी हांणी दिली.
भारत – पाकिस्ताना मदीं सीजफायर !
पाकिस्तानाच्या लश्करी अधिकाऱ्यांनी भारताच्या डीजीएमआय हांचे कडेन शेनवारा दनपारां 3.35 वरांचेर फोना वयल्यान चर्चा केली. दोगां मदीं दोनूय वटांनी फारपेट, जमनी वयली लश्करी कारवाय तशेंच हवाई आनी दर्यांतली कारवाय भारतीय वेळा प्रमाण शेनवारा सांजेच्या 5 वरां सावन बंद करपाचेर एकमत जालें. हे विशींची सुचोवणी दोनूय वटांनी दिल्या. 12 मेक दनपारां 12 वरांचेर दोनूय देशांचे डीजीएमओ चर्चा करतले, अशी म्हायती भारताचे विदेश सचीव विक्रम मिस्री हांणी दिल्या.
डोनाल्ड ट्रम्प
भारत आनी पाकिस्तानान युद्धविरामाचेर सहमती दाखयल्या. हो दावो अमेरिकेचे अध्यक्ष डोनाल्ड ट्रम्प हांणी केला. डोनाल्ड ट्रम्प हांणी म्हणलां, अमेरिकेचे मध्यस्थी खाला काल राती (शुक्रारा) जाल्ले दीर्घ चर्चे उपरांत, आपल्याक हें कळयतना खोस भोगता, भारत आनी पाकिस्तानान हल्ले तत्काळ आनी पुराय तरेन बंद करपाक सहमती दाखयल्या. दोनूय देशांनी समंजस निर्णय घेतिल्ले खातीर आपूण तांकां परबीं दितां.
इशाक डार
पाकिस्तान आनी भारत हांणी तत्काळ प्रभावीपणान युद्धबंदीचेर सहमती दाखयल्या. पाकिस्तानान सदांच आपल्या सार्वभोमत्वा कडेन आनी प्रादेशीक अखंडताये कडेन तडजोड करिनासतना ह्या प्रदेशांत शांतता आनी सुरक्षितते खातीर यत्न केल्यात, अशें पाकिस्तानाचे विदेश मंत्री इशाक डार हांणी सांगलें.
जश्याक तशी जाप दितले : संरक्षण मंत्रालय
भारत आनी पाकिस्तान हांचे मदीं युद्धविरामाची घोशणा जाले उपरांत संरक्षण मंत्रालयान शेनवारा सांजे वेळार पत्रकार परिशद घेतली. ह्या वेळार लश्कराची कर्मल सोफिया कुरेशी, हवाई दळाची विंग कमांडर व्योमिका सिंग आनी नौदळाचे कमांडर रघू आर नायर हाजीर आशिल्ले. संरक्षण मंत्रालयाची ब्रिफींग 9 मिण्टां चल्ली. तातूंत कर्नल सोफिया हांणी पाकिस्ताना कडल्यान पातळटात त्या चुकीच्या म्हायतीं विशीं म्हायती दिली. मजगतीं, कमांडर नायर हांणी सांगलें, भारतीय सैन्य पुराय तरेन सतर्क आनी तयार आसा. जर परतून हल्लो जालो जाल्यार आमी जश्याक तशी जाप दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
