भांगरभूंय | प्रतिनिधी
शून्यांतल्यान विश्व उबें करप, हें वाक्य सगल्यांनीच केन्ना ना केन्ना आयकलांच आसतलें. हाचो अर्थ गरिबींतल्यान कश्ट करून वयर सरप, सर्वांगी उदरगत करप. जायते लोक अशे वयर सरल्यात. खास करून वेवसाय, उद्देग, धंद्यांत. एक ते दोन पिळग्यो रातदीस घाम गळयतात आनी हे मेहनतीचें फळ फुडल्या पिळग्यांक मेळटा. तांणी तें तिगोवन दवरपाक जाय. वेवसाय, उद्देग वाडोवपाक जाय. अंबानी कुटुंब हाचें बरें उदाहरण. मात, घरच्यांनी जोडून दवरलां म्हूण कोणूय फोल्गां मारपाक गेलो जाल्यार ताचेर वायट काळ येवपाक वेळ लागना. कांय जाण दुसरो करता म्हूण स्वताय मुखार सरतात आनी अपेशी थारता. मागीर ते एकतर देश सोडून पळटात, देशांतूच नांव- गांव बदलून लिपून बसतात….. वा भयंकर पावल उखलतात. तें म्हणल्यार आत्महत्येचें. प्रत्येक गजालीचेर कितें तरी उपाय आसता. दरेक गजाल केन्ना ना केन्ना बदलता, राती फाटल्यान दीस येता, दुख्खा उपरांत सुखाचें ल्हार येताच, तेन्ना मनशान वायट खिणां वेळार स्वताक सांबाळूंक जाय, स्वताचेर नियंत्रण दवरपाक जाय. कुपा फाटल्यान सुर्य भायर सरता, तशी निर्शेवणेच्या ढगा फाटसून आशेचें किरण भायर सरता, हें कोणेंच विसरूंक फावना.
दोन दिसां पयलीं एका कुटुंबान आत्महत्या करपाचो धपको दिवपी घडणूक घडली. रिणाक लागून हें जालें, असो पुलिसांचो मुळावो अदमास. श्याम पाटील हांचें हें कुटुंब. तांची घरकान्न ज्योती आनी 12 वर्सांचो पूत दक्ष हांणी काळी न्हंय पुला वयल्यान उडी मारली, तर उपरांत श्याम हांणी कुंकळ्ळे येवन जीव दिलो. तांणी सोशल मिडियाचेर घाल्लो निमणो संदेश (आॅडियो) व्हायरल जाला. पुतान आनी बायलेन पुला वयल्यान उडकी मारून जीव दिला. आतां हांवूय आत्महत्या करतां. जालो आमचो शेवट. सोंपलो आमचो संवसार…. अशें ते म्हणटात. काळजाक घाय करपी हीं उतरां. ते वेर्णें उद्देगीक वसणुकेंत कामगार पुरवण करपाचें काम करताले. तांकां स्वताची कंपनी घालपाची आसली. ते खातीर तांणी 2 कोटींचें रीण काडिल्लें आनी तें फारीक करप शक्य जावंक नाशिल्ल्यान तांणी हें पावल उखल्लें आसूंक जाय, अशेंय पुलिसांक दिसता. रीण दिवपी तांकां सतायताले काय, जप्ती बी आयिल्ली काय, हाचेर पुलीस तपासा उपरांत उजवाड पडटलोच. पूण जालें तें वायट जालें. कुटुंबांक घेवन तांणी संवसार सोडूंक जायनाशिल्लो.
रिणांत बुडिल्ले खूब उद्देजक आसात. तांची मालमत्ता जप्तूय जाल्या. भांगर, फ्लॅट तारण दवरून खूब जाणांनी रीण काडलां. बँको मागीर जायराती दिवन तांचे मालमत्तेची पावणी करतात. थोड्यांक प्रामाणीकपणान मेहनत करुनय येश मेळना. रिणाच्या चक्रव्युहांतल्यान भायर सरपाचो मार्ग तांकां दिसना. ह्या वेळार सोयरे- धायरेय लागीं रावनात. मागीर काचाबूल जावन ते नाका जाल्लें पावलूय उखलतात वा खंबीरपणान मुखार येता तें स्विकारतात. ही दुसरी गजाल बरी. कोण रिणांत ना? अमिताभ बच्चना सारके खांपे अभिनेतेय रिणांत बुडिल्ले. कौन बनेगा करोडपती कार्यावळीन तांकां हात दिलो, हें सगलेच जाणांत. परिस्थिती मुखार खचून चलना. न्हंयेंत पेवपा सारकें हें. हातपांय हालयत रावल्यार मनीस तरता आनी कांय खिणांत ताका तड मेळटा. हाका दुसरीय बाजू आसा. कांय वेवसायीक एकदम व्हडलो हात घालतात. तांकां तें वजें पेलना. ते कोलमडून पडटात. हाथरुण पळोवन पांय पसरपाक जाय, अशी म्हण आसा, ती चुकीची न्हय. उद्देग ल्हवू ल्हवू वाडयत वचपी बेगीन येशस्वी जातात. आनीक एक प्रकारचे रिणकार आसतात. हे सदांच सुखी. संबंदीत सगल्यांक वाडी दवरतात आनी भरपूर रीण घेतात. सरकारी अनुदानां, सवलती घेतात. मागीर एक दीस साटली पोटली काखेंत मारून रातयां गायब जातात. उद्देगीक वसणुकांनी हें प्रकार चड पळोवंपाक मेळ्ळ्यात. सगल्यां राज्यांनी हांचीं रिणां. एके कडेन खंय तरी तें फारीक करप, हेर कडेन आंगठो दाखोवप. वेगवेगळ्या राज्यांनी सवलती खावन, हप्ते वांटून फिरता म्हणसर तांची जीण सोंपता.
गोंयांत कोण रिणांत आसात, तें फारीक करप तांकां शक्य आसा काय ना, रीण घेवपाक येता तेन्ना तांची अर्थीक परिस्थीती कशी आसा, हाचो नियाळ सरकारी यंत्रणेन घेवपाक जाय. रीण बुडोवप हो गुन्यांव. वेवसायिक, उद्देजकांनीय आपली ऐपत पळोवन तें घेवपाक जाय. तशें जाल्यार रिणकार उणे जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
