भांगरभूंय | प्रतिनिधी
खबरां संस्था
मुंबयः दिल्ली कॅपिटल्साक 7 विकेटींनी हारोवन बायलांच्या पयल्या प्रीमियर लीग क्रिकेट सर्तींत वस्ताद थारल्ल्या मुंबय इंडियन्स पंगडाचें कॅप्टन हरमनप्रीत कौरान जायत्या वर्सांचें सपन निमणे पुराय जालें अशी प्रतिक्रिया जैता उपरांत घेतिल्ल्या पत्रकार परिशदेंत दिली.
डब्ल्यूपीएल आमच्या सगल्यां खातीर एक सामको बरो अणभव आशिल्लो. आमी इतल्या वर्सां सावन ह्या खिणाची वाट पळयतालीं, आमच्या ड्रेसिंग रुमांतल्या दरेकलीन ताची खोस घेतली अशें ताणे सांगलें,
फायनलींत जैत मेळयले उपरांत आपलो वैयक्तीक अणभव शॅर करतना हरमनप्रीतान सांगलें “हें म्हजे खातीरूच न्हय जाल्यार आमच्या सगल्यां खातीर सामकें मैदानार गर्दी करपी चाहत्यां खातीरूय हें एक सपन पुराय जालां. लोक आमकां विचारताले की डब्ल्यूपीएल केन्ना जातलें. आयज तो दीस आयलां, ताका लागून म्हाका खूब अभिमान दिसता की आमचे टिमीन इतली बरी कामगिरी केली “
आपल्या पंगडातल्या खेळगडींची तुस्त करतना हरमनप्रीतान सांगलें की जेन्ना तुमची बॅटिंग लायन इतली लांब आसता तेन्ना तुमकां मैदानांत वचून ते स्वता सिद्ध करपाची गरज आसता. हाचेर आमी ड्रेसिंग रुमांत चर्चा करतालीं. दरेका खेळगडीन आपापली जापसालदारी बरे भशेन केली. जें आमी थारायल्लें तें मैदानार वचून करून दाखयलें.
फायनलींतले कामगिरी विशीं भाश्य करतना ताणे सांगले की आमच्या पंगडाच्या येसा फाटल्यान सकारात्मक दिश्टीकोन हो सगल्यांत व्हडलो घटक आसा. आमी जे पद्दतीन सुरवात केली ती विलक्षण आशिल्ली. आमी मात्शी भाग्यवान लेगीत आशिल्ली, कारण आमी भरपूर बॉल फूल टॉस घातले. मात सगलें आमचे वटेन गेलें, जें आमकां अपेक्षीत आशिल्लें तेंच निमाणे घडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
