भांगरभूंय | प्रतिनिधी
पणजीः राज्यांत जायतो तेंप पड्डून आशिल्ल्या 5 लाख क्युबीक मिटर कोयराचो विलो गोंय घन कोयर वेवस्थापन मंडळान लायला. फक्त राज्यांचे दोन डंपानी बरोच काळ पड्डून उरिल्लो कोयर सांठोवन उरला ताचो बेगिनांत बेगीन विलो लावपा खातीर थळावे पालिकेन सहकार्य करचे, अशें गोंय घन कोयर वेवस्थापन म्हामंडळाचे अध्यक्ष अंकीत यादव हांणी सांगलें.
गोंय घन कोयर वेवस्थापन म्हामंडळ आयज तांणी घेतिल्ल्या उपक्रमाचेर वेबीनार घडोवन हाडटले. हे विशीं म्हायती दिवपा खातीर अंकीत यादव हांणी पर्वरी पं. दिनदयाल उपाध्याय भवनांत पत्रकार परिशद घेतिल्ली.
ह्या वेळार उलयतना यादव हांणी बरोच तेंप पडून आशिल्ल्या कोयराच्या विल्याचो नियाळ दिलो.
वर्स 2019 सावन आमी पड्डून आशिल्ल्या कोयराचो विलो लावपाचें काम दोन पांवड्यार हातांत घेतिल्लें. राज्याचे 11 डपांत हो कोयर पडून आशिल्लो. तातुंतल्या 5 लाख क्युबीक मिटर इतल्या कोयराचो आमी विलो लायला. फकत वास्को सडार आनी म्हापश्यां डंपात पड्डून आशिल्ल्या कोयराचो विलो लावपाचो उरला. तशेंच हेर डंपानी हें काम पुराय जाला, अशीं म्हायती यादव हांणी दिली.
स्वंयपूर्ण गोंय उपक्रमा खाला गोंय घन कोयर वेवस्थापन म्हामंडळान हातांत घेतिल्ली उत्कृष्ट पद्दती आनी उपक्रम हाचेर वेबीनार घडोवन हाडटले. ह्या वेबीनाराचें प्रसारण आयज मुख्यमंत्रांचें अधिकृत निवासस्थान आल्तिनो जातले. ह्या वेबीनारांत व्हड प्रमाणांत लोकांनी वांटेकार जावचे, असो उलो यादव हांणी मारला.
सुरवेक आमी म्हामंडळान तयार केल्लो व्हीडीयो प्रदर्शीत करतले. तातूंत म्हामंडळाचे घन कोयर प्रक्रिया प्रकल्पांत बांदकाम, घातक, बायोमेडीकल कोयर कशे पद्दतीन हाताळटात आनी नव्या कोयर प्रक्रिया प्लांटा विशीं म्हायती दितले. तशेंच ह्या कोयराचो विलो लावपाचे प्रक्रियेचेर उजवाड घालून म्हामंडळान मुखार दवरिल्लीं ध्येयां हाची म्हायती दितले, अशें यादव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
