भांगरभूंय | प्रतिनिधी
पर्यटन म्हणल्यार फक्त हेडप न्हय, तर तो संस्कृतायेचो संवाद. स्वताचे आनी त्या थळाव्या प्रदेशाचे. खंयच्याय प्रांतांत वतना थंयची पर्यटन थळां, भाशा, रावपाची वेवस्था, प्रवास, खरेदीचे जागे, हवामान, खाणां- जेवणां हांची म्हायती आसची. इतिहास, भुगोलाचोय गरजे पुरतो तरी अभ्यास आसल्यार बरो. हें सहज शक्य आसा. कारण सोशल मिडिया, इंटरनेट वॅबसायटी!! वळखीच्या पर्यटकां कडल्यान म्हायती घेतल्यार दुदांत साकर. आयकल्ले म्हायतीच्या भांडवलार बरेच पर्यटक पयस- पयस वतात आनी मागीर नाका जाल्लें करून त्रास, मनस्ताप बळयां आंगार ओडून घेतात!
गोंयां वचून सोरो, ड्रग्स, मसाज आनी हेर ‘स्पेशल’ सेवांचो उपभोग घेना तो येंडो. नाच, रेव पार्टी, नायट टुरिझम करिना तो बाप्पा शिवराक. गोंयांत आंगार उण्यांत उणे कपडे दवरपाक जाय, नाजाल्यार ती काकूबाई. अशे जायते गैरसमज पर्यटकांनी करून घेतल्यात. खावपाक, पिवपाक, मजा करपाक आयिल्ल्यान तांणी जाय तशें वागचें, पूण कायद्याक धरून. हेरांक (आनी स्वताक पसून) त्रास जायत अशें कितेंच करचें न्हय. हालींच वागातोरा बनारसच्या एका कुटुंबाक बावंन्सरां कडल्यान मार पडलो, अशी कागाळ पुलिशेंत नोंद जाल्या, तर नायट क्लबाचो वेवस्थापक म्हणटा, तें कुटुंबच मस्ती करतालें. आतां कोण खरो, कोण फट हें पुलिसांनी सोदून काडपाचें. पुराय सीसीटीव्ही फुटेज आसा. थोडी व्हायरलूय जाल्या.
हे घडणुकेचेर आमदार मायकल लोबो हांणी प्रतिक्रिया दिल्या. हाॅटेल, शॅक्स, क्लब कर्मचाऱ्यांनी पर्यटक कितलोय सोरो पियेल्लो आसलो तरी ताका हात लावचो न्हय. कायदो हातांत घेनासतना ताचे वागणुकेची कागाळ पुलिसां कडेन करची, असो सल्लो तांणी दिला. तांणी सांगलां तें खरें, पूण तें कर्मचाऱ्यांक पटपाक नाका? वाटे वयली कदेल कुशीक काडली म्हूण दर्यावेळेर एका थळाव्या तरणाट्याक जीव व्हगडावचो पडला. मारामारी तर सदचीच आसतली. सगल्यो खबरो, व्हिडियो येताच अशें ना. चडश्या प्रकारांनी भायले लोक घुस्पल्ले दिसतात. कारण दर खेपे हिंदी वा इंग्लीश भाशा कानार पडटा. दर्यादेगां वयल्या वेवसायांनी कितले गोंयकार आसात, ताचो एकदां नियाळ घेवपाक जाय.
पर्यटकांनीय गोंयांत येवन मस्ती करपाक जायना. इल्लें कुट्ट केलें काय वागाच्यो मिशयोय ओडीन दिसता ही गजाल खरी. पूण तांणी स्वताचेर नियंत्रण दवरपाक नाका? पर्यटन खात्यानूय गोंयांतलो पर्यटन वेवसाय, थळां, गैरसमज आनी हेर म्हायती विशीं देशभर जागृताय करुंक फावो. सोशल मिडियाचो घसघसो रातदीस व्हांवतनाय कांय पर्यटक ‘गांवढळ’, ‘बेशिस्त’ कशे वागतात, तेंच कळना. दर्यादेगां वयल्या वेवसायिकांक बावंन्सर कित्याक दवरचे पडटात, ताचे फाटलीं कारणां सोदपाचो आतां वेळ आयला. बावंन्सरां बदला कायदेशीर मार्गान थारावीक रक्कम घेवन वेवसायिकांक खाशेली पुलीस सुरक्षा वेवस्था दिवप शक्य ना? पुलीस गणभेसांत आसतात, म्हणटकच पर्यटकांक थोडी तरी शिस्त लागतली. इराणांतल्या ‘गश्त ए इर्शाद’ सारको नैतीक पुलिसांचो एखादो पंगड तयार करून पर्यटकांचेर नदर दवरूं येता. अर्थांत अतिरेक जावचो न्हय, व्हॅलेंटायन दिसा कांय संघटणां कडल्यान जाता तसो!!
पर्यटकांनी थळाव्यो परंपरा, मुस्तायकी, धर्मीक थळां, भाशा हांचे विशीं आदर दवरपाक जाय. फोटो, व्हिडियो काडपाक परवानगी घेवची. मेळत थंय कोयर करचो न्हय. रेश्पेदान वागचें. थळाव्यां कडेन (टॅक्सीकार, हाॅटेलकार आनी हेर) नमळायेन वागचें. कारण तुमी सोयरे म्हूण थंय गेल्ले आसता. थळाव्यांनीय हो नेम पाळपाक जाय. थळावे संस्कृतायेची टिंगल, फकांडां करचीं न्हय. मजा करची, पूण धुमशेणां, सांवार नाका. थळावे अस्वस्थ जातले अशें तर कांयच नाका. पर्यटक हो देवा सारको आसता, ताणें सैताना सारकें कित्याक वागपाक जाय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
