भांगरभूंय | प्रतिनिधी
गोंयांत जावं देशांत हेर कडेन खंयचोच भायलो मनीस थळाव्या गांवकारांचे वाटेक वचना, अशें म्हणटात. म्हणटकच गोंयांत वा खंयच्याय गांवांत आयिल्लो परप्रांतीय थंय दिसता ते जमनीचेर चिऱ्यांचें घर बांदपाचें धाडस करतलो, अशें दिसना. तशे आडवाद आसतले. पूण तें बांदकाम खोप वा शेडी सारकें. कालांतरान पत्र्यां फाटल्यान रातयां चिऱ्याचीं घरां उबीं जाल्यांत. ताका परप्रांतीयूच 100 टक्के जापसालदार आसात, अशें म्हणपूय धाडसाचें थारतलें. काल सांगोल्डाचीं कांय बांदकामां मोडून उडयलीं. कोमुनिदादीचे जमनी वयलीं हीं 22 बेकायदेशीर घरां मोडपाचो आदेश उच्च न्यायालयान दिल्लो. ते प्रमाण उत्तर गोंय कोमुनिदाद प्रशासकान हें काम हातांत घेतलां. अर्थांत ह्या कामाक घरधनयांनी खर विरोध केलो. हातूंतलीं कांय घरां गोंयकारांचींय आसात. हांगाच्या स घरांनी मात स्टे मेळयला.
कोमुनिदादीच्या सर्व्हे क्र. 81/1 जमनी वयल्या ह्या घरांचो वाद 2012 सावन चलता. म्हणल्यार एक तप उलगलें. थळाव्यां मदल्या कांय तरणाट्यांनी दिल्ले म्हायती प्रमाण हांगा तांचोच न्हय, तर तांच्या बापायचोय जल्म जाला. 40 ते 50 वर्सां वयर जालीं, अशें ते सांगतात. म्हणटकच 1984, 1974 सावन ते हांगा रावतात. हीं बांदकामां मोडपाचो आदेश उच्च न्यायालयान दिल्लो. तेन्ना हे घरधनी सर्वोच्च न्यायालयांत गेल्ले. पूण थंय उच्च न्यायालयाचो निर्णय कायम उरलो. मागीर तीं मोडपाचो आदेश आयलो. कांय जाणांच्या मतान घरधनयांक एक वर्स पयलीं घरां मोडपाचे आसात, हें सांगिल्लें खंय. तर ते म्हणटात, काल आमकां सामान पसून काडपाक दिवंक ना. बुलडोझर लावन घरां मोडपाक सुरवात जाली. घरां मोडपी पंगड, कोमुनिदाद प्रशासनाच्या मतान तांकां सामान भायर काडपाक वेळ दिल्लो. चडश्यांनी तें काडलेंय.
इतलीं वर्सां आमी हांगा रावले. आतां आमी खंय वचपाचें? आमी हांगाच खोप बांदून रावतले, अशें तिडकले घरधनी, तांचे भुरगे पत्रकारांक सांगताले. दरेका लोकप्रतिनिधींनी आमकां हीं घरां बांदतना विस्वासांत घेतले आनी आयज निमण्या खिणाक वाऱ्यार सोडले अशी भावना तांणी उक्तायल्या. आमकां हेर कडेन जागो दिवपाचें आस्वासन लोकप्रतिनिधींनी दिल्लें. तें तांणी पुराय करचें, अशीय तांची मागणी आसा. मजगतीं, ‘मनीसपणाच्या दृश्टीकोनांतल्यान ह्या लोकांचो विचार जावपाक जाय. ह्या लोकांक मुद्दाम लक्ष्य केल्यात. कांय लोकप्रतिनिधींच्या विरोधांत पसून न्यायालयाचे अशेच निर्देश आसात. मागीर ते कित्याक चालीक लागनात’, अशें आदल्या आमदारान म्हणलां. कोमुनिदादीच्या म्हणण्या प्रमाण, ‘तांकां घरां खाली करपाक फावसो वेळ दिल्लो. ही जमीन रान वाठारांत पडटा. पूण कांय लोकप्रतिनिधींनी लोकांक चुकीची दिशा दाखयत, हांगां घरां बांदपाक दिलीं. हीं सगलीं अतिक्रमण करून बांदिल्लीं घरां.’
दर्यादेग वाठारांतलीं तात्पुरतीं बांदकामां आनी 1991 वर्सा पयलींचीं घरां वाटावपाक सरकारान पर्यटन खात्या वतीन हालींच वटहुकूम काडपाचें थारायिल्लें. जांचे कडेन 1991 पयलींचें लायट, उदक कनेक्शन, घरपट्टी, वेवसाय परवानो आसा तांचीं बांदकामां मोडचे नात, अशें मुख्यमंत्र्यान म्हणिल्लें. कोमुनिदाद जमनीचेर भोवतेक घरां गोंयकारांचीं अशेंय वक्तव्य फाटीं आयिल्लें. ताका लागून कोमुनिदाद जमनींचेर बांदिल्लीं घरांय कायदेशीर करपाचो विचार आसा, अशें फाटीं जाहीर केल्लें. सांगोल्डेंचीं घरां हातूंत येतात काय? आतां लोकसभा वेंचणुकेचो प्रचार नेटान चल्ला. कांय राजकी पक्षांक परप्रांतीयांच्यो वस्ती गोंयांत नाकात. सांगोल्डा घडणुकेच्या सोशल मिडिया वयल्या व्हिडियोंचेर तश्यो बऱ्योच प्रतिक्रिया वाचूंक मेळटात. दुसरे वटेन एकगठ्ठो मतांचे आशेन राजकी फुडारीच अश्या बांदकामांक, झोपडपट्ट्यांक उर्बा दितात. तांकां लायट, उदकाचें कनेक्शन दितात…. आनी मागीर काल जालां तशें जालें काय सगलें आप, पाप परप्रांतीयांच्या माथ्यार.
खरें म्हणल्यार बेकायदेशीर बांदकामांक जे कोण उर्बा दितात, तांचेर कडक कारवाय जावंक जाय. मागीर तो कोणूय आसूं. दर्यादेग, कोमुनिदाद जमनी, सरकारी जमनींचेर कोणे अतिक्रमण केलां, पर्यावरणाचें लुकसाण केलां जाल्यार तांचे कडल्यान भरपाय घेयात, अशें न्यायालयान फाटीं म्हणिल्लें. सांगोल्ड्यांच न्हय, तर गोंयच्या प्रत्येक गांवांत बेकायदेशीर बांदकामां उबीं आसात. तीं मुळांत जावपाकूच दिवंक जायना. पेडण्यां तर कसलोच परवानो घेनासतना बांदकामां जाल्ल्याचें फाटीं उक्ताडार आयिल्लें. सरकार एक दीस सगलें कायदेशीर करतलो, हे आशेचेर सगलेच बेकायदेशीर बांदकाम करपी जगतात. सरकारान तीं अदींमदीं कायदेशीर केल्यांतूय बी. हाचे मुखार बेकायदेशीर बांदकामांच जावपाक दिवचीं न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
