भांगरभूंय | प्रतिनिधी
जात ही एक कल्पना, ती मनाची एक अवस्था, अशें संविधानाचे शिल्पकार डाॅ. बाबासाहेब आंबेडकर म्हणटात, तर अध्यात्मीक गुरू परमहंस योगानंद सांगतात, ‘जात, पंथ, वर्ग, रंग, लिंग वा वंश ह्या सगल्या पूर्वग्रहां कडेन आडनदर करून स्वामी भावपणाच्या नेमाचें पालन करतात. आत्म्या कडेन पुरायेन एकात्म जावप हेंच तांचें ध्येय.’ दुसरे कडेन प्रधानमंत्री नरेंद्र मोदी म्हणटात, ‘सगल्या धर्म, समुदायांक समान अधिकार आसात आनी तांकां पूर्ण संरक्षण मेळटलें, हें पळोवप म्हजी जापसालदारकी. म्हजें सरकार जात, पंथ आनी धर्माचेर आदारीत कसलोच भेदभाव सोंसून घेवचें ना वा स्विकारचेंय ना.’ आमच्या भारतांत जात, धर्म, पंथ पाळप, प्रार्थना करप हाका संविधानान मेकळीक दिल्या. तरीय प्रत्येकान आपली जात, धर्म घराच्या हुंबऱ्या भितर दवरपाक जाय, भायर पावल दवरलें काय आमी सगले भारतीय, सर्वधर्मसभभाव पाळपी!! मात हें जाताच अशें ना. बऱ्याच लोकांचो धर्माभिमान भौशीक जाग्यांचेरुय जागो जाता. थोडे एकमेकांच्या धर्माक किंकोत करतात. उक्तेपणी दुस्वासूय करतात. समाजाक, भौसाक बादा येवची ना, अशीं धर्माचीं प्रतिकां, चिन्नां आंगार बाळगुपी कांय जाणांक अपमान, धमकी सोंसची पडटा. मागीर समाजांत कारण नासतना तणाव जावन भौशीक मालमत्तेचें लुकसाण जाता. निश्पापांचो जीव वता. उरिल्ल्यांक मानसीक त्रास. सरकारान हाचे आड खर उपाय घेवंक जाय. फुडाराक कोणांक धर्मा वयल्यान दुसऱ्यांक उणाक लेखपाचें धाडस जावंक फावना!!
कर्नाटकांत सध्या धर्मीक भावना दुखयिल्ल्याच्या आरोपा वयल्यान बोवाळ चल्ला. प्राचार्या सयत दोगांक निलंबीतूय केल्यात. सरकारी पांवड्याचेर चवकशी चलता. शिवमोगा आनी बिदर जिल्ह्यांत सीईटी परिक्षे वेळार वर्गांत भितर घेतना कांय विद्यार्थ्यांच्या जानव्यांक सुरक्षा रक्षकांनी हरकत घेतली आनी तीं काडपाक लायलीं. ताचें सीसीटीव्ही फुटेज आसा. आनीक एके जातीच्या. विद्यार्थ्यांक धातूचें कडें काडपाक लायलें, असोय आरोप जाला. सीईटी परिक्षे वेळार दोन जिल्ह्यांनी हे प्रकार घडिल्ल्यान तसो सरकारी यंत्रणेन आदेश बी दिल्लो काय असो दुबाव येता. मेटल डिटेक्टर बी घेवन सुरक्षा रक्षक विद्यार्थ्यांक तपासतना दिसतात. बिदरांत पार्थ राव ह्या विद्यार्थ्याचें जानवें कापून तें भायर उडयलें. शिवमोगांत तीन विद्यार्थ्यांक जानवें काडपाक लायलें. दोगांनी काडलें. न्हयकार दिल्ल्याक भितर घेवंक ना. ताका सीईटीक परत बसपाक दितात काय नात, तो आतां म्हत्वाचो प्रस्न. काॅलेजीच्या प्रशासनान धांवपळ करून सुरक्षा रक्षकांक धर्माच्या आदाराचेर भेदभाव करचो न्हय, अशी शिटकावणी दिली आनी विद्यार्थ्याक परिक्षेक बसपाक दिलें. हातूंत आमचे काॅलेजीचो हात ना, आमी ही इमारत कर्नाटक परिक्षा प्राधिकरणाक परिक्षा घेवपाक दिल्या, अशेंय तांणी सांगलें. सध्या ब्राह्मण महासंघ तिडकला. शिक्षणमंत्री म्हणटात, आमी कडक कारवाय करतले.
कर्नाटकांत फेब्रुवारी 2022 त काॅलेजींत बुरखो घालून आयिल्ले मुस्कान खान हे चलयेक एके संघटनेन सतायिल्ली. तेन्ना हें प्रकरण गाजिल्लें. कांय शाळांनी चलयांक तिकली लावपाक दिनात, कांकणां घालपाक दिनात, हिजाब घालपाक दिनात, हाताक दोरो बांदपाक दिनात अश्यो जायत्यो कागाळी येत आसतात. हातूंतल्यो कितल्यो खऱ्यो, कितल्यो फट, कितल्यो अर्दवट म्हायतीचेर आदारित आसतात, तें कळना. हालींच्या वर्सांनी सामान्य लोकांक भ्रमित करपाचे, तांची दिशाभूल करपाचे धुर्त प्रकार सोशल मिडियाक लागून बरेच वाडल्यात. इतले, की खरी घडणूक पसून फट दिसपाक लागता. तातूंत आतां एआय व्हिडियो चालू जाल्यात. विमानतळांचेर तपासणेच्या नांवा खाला अभिनेत्यांक कपडे काडपाक लायल्यात. पगडी सोडोवपाक सांगल्या. आतां कांय देशांनी तर बुरखो, पगडेचेर बंदीच आसा खंय! सुरक्षेच्या कारणा वयल्यान कांय वेळार धर्मीक प्रतिकां, मुस्तायकी तपासतात. पूण शिक्षणाच्या मळारुय धर्मीक चिन्नांक हरकत घेवप, हें योग्य म्हणपाक मेळचें ना.
तिकली, टिळो, कानांतलीं, हिजाब, स्कलकॅप (तकिया), कांकणां, दोरो ह्या वस्तूंक हरकत घेवंक ना, म्हूण व्हडलो गुन्यांव घडचो ना. विद्यार्थी ह्यो वस्तू वापरून काॅपी बी करतात, अशें कोणाक दिसता काय? जानवें हें सुताचें. तें भायल्यान दिसताच अशेंय ना. मागीर तें काडपाक लावपाची वा बेधडक कापून उडोवपाची गरज नाशिल्ली. बरें, हरकत घेतना, मुखार कितें जातलें, हाचो दुबाव येना?? सोशल मिडियाच्या जमान्यांत तरी खंयचीच गजाल लिपून उरना. बोवाळ, मारामारी, भौशीक मालमत्तेचें लुकसाण जावं येता. माफी मागची पडूं येता. बंदखण जावं येता. कोण हल्लो करपाक शकता धर्मीक तणाव जावं येता. पूण कोणाक कांय पडिल्लें ना. जो तो धर्मीक अहंकाराच्या नेटार मनाक येता तें करता. नकळटां घडटा तें वेगळें. कर्नाटकांतले घडणुकेचो राजकी फायदो घेवपाचो यत्न जावं येता. ताचे पयलीं सरकाराक हस्तक्षेप करचो पडटलो.
समाज मुळांत संवेदनशील (आनी असंवेदनशीलूय) जावपाक लागला. आपली भावना केन्ना एकदां दुखावतली आनी आपूण निशेध करपाक रस्त्यार देंवतलो, हाची वाटूच पळयत कांय जाण बसल्यात, असो दुबाव येवंक लागला. दरेकल्यान आपली विचारसरणी आंगात केळोवची, पूण दुसऱ्यांची विचारसरणी तुच्छ लेखपाचो यत्न करचो न्हय. कारण समाजीक एकचाराक वेर वचूं येता.आनी शिक्षण मळ धर्मा पसून पयसूच दवरूंया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
