भांगरभूंय | प्रतिनिधी
मडगांव : जमीन हडप प्रकरणां ही नोटरींच्या सहभागा खेरीत शक्य ना. जमीन हडप प्रकरणांत न्यायाधीश जाधव आयोगाच्या अहवालांत नांवां आशिल्ल्या नोटरींचेर कायदेशीर कारवाय करतले. तांची सेवा बडतर्फ करतले, अशें कायदो मंत्री अालेक्स सिक्वेरा हांणी सांगलें.
दक्षीण गोंय जिल्होधिकारी कार्यालयांत मंत्री आलेक्स सिक्वेरा हांणी लोकांची भेट घेवन तांच्यो समस्या जाणून घेतल्यो. ते उपरांत उलयतना मंत्री सिक्वेरा हांणी सांगलें, म्युटेशन प्रक्रिये विशीं कागाळी, पेन्शन संदर्भांत कागाळी लोकांनी सांगल्यो. तशेंच म्हामार्गा खातीर जागा गेल्ल्यांक पुनर्वसना खातीर बांदकाम खात्या कडल्यान अजून भूंयखंड मेळूंक नात तशेंच लुकसाण भरपाय लेगीत मेळूंक नाशिल्ल्याचो कागाळी कांय नागरिकांनी केल्यात. कांय जाणांनी उदकाची समस्या मांडल्या. ज्या प्रस्नांचेर बेगोबेग उपाय येवजण करप शक्य आसा, तांचेर सुचोवण्यो केल्यात.
नोटरी विशीं उलयतना सिक्वेरा हांणी सांगलें, आपले कडेन कितल्या नोटरींचो जमीन हडप करपांत हात आसा, ते विशीं आंकडो ना. राज्य सरकारा कडल्यान जमीन हडप प्रकरणांत चवकशे खातीर न्या. जाधव आयोगाच्या अहवालांत कांय जाणांची नांवां आसात. तांचो संदर्भ दिवन ह्या वकिलांक बेकायदो प्रक्रिया करप ना आनी एकामेकांच्या सहकार्यान कामां करूंयात अशें आवाहन केलां. ह्या अहवालाचो अापूण खोलायेन अभ्यास करूंक ना. पूण नोटरी हांच्या सहभागा खेरीत जमीन हडप प्रकरणां जावप शक्य ना. तशेंच जाधव आयोगाच्या अहवालांत जांची नांवां आसात तांची सेवा बडतर्फ करतले अशें तांणी सांगलें.
मजगतीं, साळ न्हंयेंत घाणयारे उदक सोडटात. देड वर्सां पयलीं हो प्रस्न मार्गाक लावपाचें आस्वासन दिल्लें. पूण पुराय जावंक ना. तशेंच नुस्तेमारी सयत शेती वेवसायाक आडखळ जाता अशें नागरिकांनी सांगलें. ताचेर फुडल्या म्हयन्यांत हो प्रस्न सोडोवपाचें आस्वासन तांणी दिलें. हे संदर्भांत प्राधिकरणाच्या वेवस्थापकीय संचालका सयत बसका घेतले आनी हाचेर निश्चीत उपाय काडटले, अशें तांणी सांगलें.
मजगतीं, बोरी पुलाची भूंयसंपादन प्रक्रिया पुराय जाल्या. पुलाचो आराखडो तयार केला. निविदा प्रक्रियेक सुवात जाल्या. लोटलींतल्या कांय थळाव्या नागरिकांनी हरीत लवादांत धांव घेतल्या. हरीत लवादान अहवाल सादर करपाक भौशीक बांदकाम विभागाक वेळ दिला. हरीत लवादाचो निर्णय हाचे विरोधांत आसल्यार सरकाराक परतून विचार करचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
