भांगरभूंय | प्रतिनिधी
खबरां संस्था
कोलंबोः अफगाणिस्तानाक एकेडे टॅस्ट मॅचीच्या पयल्या डावांत 198 धांवड्यांत आवट करून श्रीलंकेन आपल्या पयल्या डावांत 439 धांवड्यो करून 241 धांवड्यांची आघाडी मेळयली. अफगाणिस्तानान आपल्या दुसऱ्या डावांत तिसऱ्या दिसाचो खेळ सोपलो तेन्ना 1 आवट 199 धांवड्यो केल्यो. अजून ते 42 धांवड्यांनी फाटीं आसात.
अफगाणिस्तानाचो ओपनर इब्राहिम जादरान हाचो (101) नाबाद शेंकडो हे तिसऱ्या दिसाचे खाशेलेंपण आशिल्लें. रहमत शाह 46 धांवड्यांचेर नाबाद आसा
श्रीलंकेन आपलो पयलो डाव आयतारा 6 आवट 410 वयल्यान फुडें सुरू केलें पूण तातूंत 29 धांवड्यांची भर घाल म्हणसर ताचे चार गडी आवट जाले आनी डाव 439 धांवड्यांत सोपलो. समरविक्रमा (27) प्रभाज जयसूर्या (20 आनी असिथा फर्नाडो (0) रनआवट जालो. चमिका गुनासेकर 16 धांवड्याचेर दुखापतीक लागून खेळ सोडून परत आयलो. अफगाणिस्तानाचो 18 वर्सा पिरायेचो फास्ट बॉलर नवीज जादराना 4 विकेटी घेतल्यो. केस अहमद आनी निजात मसूदान दरेकी दोन विकेटी घेतल्यो.
इब्राहिम जादराना आपल्या टॅस्ट कारकिर्दींतलो पयलो शेंकडो केलो. तो आतां मेरेन 6 टॅस्ट मॅची खेळ्ळा. झादरानान नूर अली जादरान वांगडा अफगाणिस्तानाचो दुसऱ्या डावाची सुरवात केली. 106 धांवड्यांची सलामी दिल्या उपरांत नूर अलीक (47) असिथा फर्नांडोन एलबीडल्ल्यू केलें. ताणे 5 चौके मारले. अर्द शेंकडो करपाक ताका तीन धांवड्यो उण्यो पडल्यो. इब्राहिम जादरानान 217 बॉलांत 11 चौके मारून 101 धांवड्यो केल्यो. रहमत शाह 5 चौक्यांनी 48 धांवड्यो करून खेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
