भांगरभूंय | प्रतिनिधी
जाती आदारीत लोकमेजणीचो मुद्दो पावसाळी अधिवेशनांत उपस्थीत करतलों: सरदेसाय
पणजी: राज्यातल्या भंडारी तशेंच ओबीसी समाज जाती आदारीत लोकमेजणेची मागणी करीत आसात. सरकार हे मागणे कडेन आडनदर करता. सरकारान जाती आदारीत लोकमेजणी सुरू करपा विशीं निर्णय घेतलो ना जाल्यार पावसाळी अधिवेशनांत दरेक दिसा हो मुद्दो उपस्थीत करतलों अशें आमदार विजय सरदेसाय हांणी सांगलें.
शुक्रारा तांणी पत्रकारां कडेन संवाद सादलो. ह्या वेळार किरण कांदोळकार आनी दयानंद मांद्रेंकार हाजीर आशिल्ले.
सरदेसाय हांणी म्हणलें, गोंयांत 2011 उपरांत लोकमेजणी जाल्ली ना. तशें पळोवंक गेल्यार दर धा वर्सांनी लोकमेजणी जावप गरजेची आसा. संविधाना प्रमाण जाती आदारीत लोकमेजणी करूं येता. अशी मेजणी गोंयांत जायत जाल्यार भंडारी आनी हेर समाजांक तांची प्रत्यक्ष संख्या समजुपाक मजत जातली. हाका लागून गोंयांत खंयच्या समाजाचे कितले लोक आसात. खंयच्या हुद्यार खंयच्या समाजाचे लोक आसात ही म्हायती मेळटली.
सरदेसाय हांणी मुखार म्हणलें, भंडारी आनी हेर ओबीसी समाजाची टक्केवारी चड आसा. हो दावो सिद्ध करपा खातीर अधिकृत जाती आदारीत लोकमेजणी जावप गरजेची आसा. आमी ह्या समाजांतल्या लोकां मदीं हे विशीं जागृताय करतले. जाती आदारीत लोकमेजणी जायत जाल्यार तांकां कसले फायदे जातले हें समजावन सांगतले. सद्याच्या काळांत डेटा वा म्हायीत ही म्हत्वाची आसता. ताका लागून अशी लोकमेजणी जावप गरजेची आसा.
किरण कांदोळकार हांणी म्हणलें, आमच्या मतान सद्या राज्यांतल्या भंडारी आनी ओबीसी समाजाच्या टक्केवारीची आंकडेवारी उपलब्ध आसा ती चुकीची आसा. राज्यांत हिंदू आनी क्रिस्तांव मेळून सुमार 23 ओबीसी जाती आसात. हांची लोकसंख्या नक्कीच 50 ते 60 टक्क्यां मेरेन पावूंक शकता. हे विशीं आमी सरकाराक निवेदन दिलां. तांणी निर्णय घेतलो ना. आमी स्वताच्या समाजाची जाती आदारीत लोकमेजणी करपाचें थारायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
