भांगरभूंय | प्रतिनिधी
भारतांतल्या 35 टक्के भुरग्यांक कुपोशण
नवी दिल्ली, खबरां संस्था ः भारतांत दशकां सावन चलत आयिल्ल्या जातीय भेदभावाक लागून भुरग्यांचें कुपोशण वाडलां. सबसहारा आफ्रिकेपरस हें कुपोशणाचें प्रमाण आनीकय चड आसा अशें नव्या संशोधनांतल्यान दिसून आयलां. भारतांत कुपोशणाचें प्रमाण 35.7 टक्क्यांनी वाडलां. सबसहारा आनी आफ्रिकेंत संवसारांतल्या पांच वर्सां सकयल्या भुरग्यांमदीं 44 टक्के भुरगीं कुपोशित आसात. संवसारभरांतल्या सगळ्या कुपोशित भुरग्यांमदीं 70 टक्के भुरगीं ह्या दोन वाठारांनी मेळटात.
जेन्ना भुरग्यांची तांच्या पिराये प्रमाण अपेक्षीत उंचाय वाडना तेन्ना ताका कुपोशण अशें मानतात. पिराये प्रमाण उंचाय वाडूंक ना हें कुपोशणाचें स्पश्ट आनी गंभीर लक्षण.
संशोधकांनी अधिकृत आंकडेवारीचो उपेग करुन भारत आनी उपसहारा आफ्रिकेंतल्या 19 देशांतल्या कुपोशणाविशीं हीं म्हत्वाचीं निरिक्षणां नोंद केल्या. अधिकृत आंकडेवारी प्रमाण भारतांतल्या पांच वर्सां सकयल्या 13.7 कोटी भुरग्यां मदल्या 35 टक्क्यां परस चड भुरग्यांचें वजन उणें आसा. जाल्यार होच आंकडो संवसारीक पांवड्यार 22 टक्के आसा.
संशोधकांनी भारतांतल्या 6 समाजीक वंचित घटकांचोय अभ्यास केलो. हातूंत पयसुल्ल्या वाठारांनी रावपी आदिवासी आनी अस्पृश्य मानपी दलीत समाजाचो आस्पाव आसा. फकत ह्या दोन समाजांत सगळ्या कुपोशित भुरग्यांमदीं एक तृतियांशा परस चड भुरगीं आसात. आदिवासी सारक्या वंचित घटकांतल्या भुरग्यां मदीं कुपोशण जावपाची चड शक्यताय दिसता.
विशेश म्हणल्यार भारतांतल्या कथित उच्च जातीं लोकांमदीं कुपोशित भुरग्यांचें प्रमाण 27 टक्के आसा. उपसहारा आफ्रिकेंतल्या देशांपरस हें प्रमाण उणें आशिल्ल्याचेंय ह्या संशोधनांतल्यान दिसून आयलां. तशेंच वेगवेगळ्या जागतीक निकशां प्रमाण पळयल्यार चलयांची स्थिती चल्यां परस वायट आसा अशें दिसून आयलां.
2022 वर्साच्या एका अभ्यासा प्रमाण भलायकी आनी पुश्टीक आहार पुरवण, घरगुती जिणेची परिस्थिती आनी आवयच्या पांवड्यावेल्या घटकांत सुदारणा जाल्ल्यान भारतांतल्या चार राज्यांनी कुपोशणाचें प्रमाण उणें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
