भांगरभूंय | प्रतिनिधी
भाजप प्रदेशाध्यक्ष : कोर समितीचे बसकेंत जातली चर्चा
भांगरभूंय । प्रतिनिधी
पणजी : भंडारी समाजाच्या फुडाऱ्यां कडल्यान जावपी जातनिहाय जनगणने विशींचे मागणे संबंदांत भाजप कडल्यान लेगीत सकारात्कम प्रतिसाद मेळटा. पक्षाचे कोर समितीचे बसकेंत ह्या विशयाचेर चर्चा जातली, अशें प्रदेशाध्यक्ष दामू नायक हांणी शुक्रारा पत्रकारां कडेन उलयतना सांगलें.
फुडल्या काळांत गोंय सरकार निश्चीत जातनिहाय जनगणना करतलें, असो विस्वास केंद्रीय मंत्री श्रीपाद नायक हांणी उक्तायलो. मजगतीं, विरोधी पक्षांचे फुडारी येता ते विधानसभा अधिवेशनांत हे संबंदांत संघटीत तरेन खाजगी थाराव हाडपाचे तयारेंत आसात.
दयानंद मांद्रेंकार, दिलीप परुळेकार, किरण कांदोळकार ह्या सारके भंडारी समाजाचे फुडारी फाटल्या कांय म्हयन्यां सावन गोंयांत जातनिहाय जनगणना करपाची मागणी सरकारा कडेन करतात. कांय दिसां सावन ह्या फुडाऱ्यांनी विरोधी पक्षांच्या मुखेल्यांच्यो भेटी घेवन, हो विशय विधानसभेंत लावन धरपाची ते मागणी करतात. गोंय सरकारान ही मागणी मान्य केली ना जाल्यार आमीच जातनिहाय जनगणना करतले, अशी शिटकावणी तांणी सरकाराक दिल्या. हे फाटभुंयेर उलयतना प्रदेशाध्यक्ष दामू नायक हांणी सांगलें, आपल्या समाजाची जनगणना करची, अशी मागणी त्या समाजाच्या फुडाऱ्यां कडल्यान करप, हातूंत कसलीच चूक ना. आपूण भाजपाचो प्रदेशाध्यक्ष आशिल्ल्यान आपल्याक सगळेच समाज लागतात. ताका लागून भंडारी समाजाच्या फुडाऱ्यांनी केल्ले मागणे संबंदांत पक्षाचे कोर समितीचे फुडले बसकेंत चर्चा करतले. जातनिहाय जनगणना हो राज्य सरकाराचो विशय आसा. अशे विशय चर्चेनूच सुटावे जातात, अशें तांणी सांगलें.
सरकाराचो विरोध ना : श्रीपाद नायक
जातनिहाय जनगणनेक सरकारान केन्नाच विरोध करूंक ना. भंजारी समाजांतल्या फुडाऱ्यांची ही मागणी राज्य सरकार निश्चीत पुराय करतलें. आपूण लेगीत हे संबंदांत सरकारा कडेन चर्चा करतलों, अशी हमी केंद्रीय मंत्री श्रीपाद नायक हांणी दिली. गोंय सरकारान बेगिनांत बेगीन जातनिहाय जनगणना केली जाल्यार फुडल्या काळांत खूबशे प्रस्न सुटावे जातले, अशें तांणी सांगलें.
जातनिहाय जनगणनेची मागणी योग्यूच : युरी
भंडारी समाजाची जातनिहाय जनगणनेची मागणी योग्यूच आसा. हे संबंदांत आमी सगळे विरोधी पक्ष येता त्या विधानसभा अधिवेशनांत खाजगी थाराव हाडपाच्या यत्नांत आसा, अशी म्हायती विरोधी पक्ष पुडारी युरी आलेमांव हांणी पत्रकारां कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
