भांगरभूंय | प्रतिनिधी
समाज कल्याण मंत्री सुभाष फळदेसाय हांची म्हायती
पणजीः आधार सिडींग ही प्रक्रिया केंद्रान सक्तीची केल्या. देखून दयानंद समाजीक सुरक्षा येवजणेचो लाव घेवपी जाण्ट्यां लोकांक आमी सूट दिवपाक शकनात. जाण्ट्यां लोकांचे आधार सिडींग करून घेवपा खातीर आमी खाशेले कर्मचारी नोंद केल्यात अशी म्हायती समाज कल्याण मंत्री सुभाष फळदेसाय हांणी दिली.
शुन्य वरा वेळार दयानंद समाजीक सुरक्षा येवजेणे खातीर आधार सिडींग करपाक जाण्ट्यां लोकांची व्यथा सभाघरांत मांडली.
हे येवजणे खातीर समाज कल्याण खात्यान आधार कार्ड सिडींग सक्तीचे केलां. ही प्रक्रिया करूंक ना जाल्यार तांचो लाव बंद करपाची शिटकावणी सरकारान दिल्या. पूण 70 वर्सा पिराये वयल्या जाण्ट्यां लोकांक भायर सरून हे आधार कार्ड सिडींग करप शक्य ना. काय जाण्ट्यांच्या बोटांचें फिंगर प्रिंट केल्यात देखून ही प्रक्रिया जायना. सरकारान ही आधार सिडींग सक्ती भायरावची अशी मागणी रेजिनाल्ड हांणी केली.
हे विशीं जाप दितना समाज कल्याण मंत्री सुभाष फळदेसाय हांणी सांगलें, आधार सिडींग हें केंद्र सरकारान सक्तीचें केलां देखून आधार सिडींग आमकां रद्द करपाक मेळना.
70 वर्सा पिराये वेल्या जाण्ट्यां लोकांक जावपी त्रास हाची आमकां जाणविकाय आसा. देखून आधार सिडींग प्रक्रियेंत आमी तीन म्हयन्याची मुजत वाड दिल्या. तशेंच जाण्ट्यां लोकांच्या घरा वचून ही प्रक्रिया करपा खातीर आमी खाशेले फिल्म कामगार नेमल्यात. जांकां भायर सरप शक्य ना ते घरा वचून आधार सिडींग करतले अशें मंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
