भांगरभूंय | प्रतिनिधी
भारतांतल्या लोकसंख्ये विशीं युएनएफपीएची म्हत्वाचीं निरिक्षणां
नवी दिल्ली, खबरां संस्था ः भारतांतली जाणट्यांची लोकसंख्या 2050 मेरेन दुपेटीन वाडपाची शक्यताय आसा अशें मत युनायटेड नेशन्स पॉप्युलेशन फंडाच्या (UNFPA) भारतांतली मुखेली एंड्रिया वोजनार हांणी मांडले. खबरां एजन्सी पीटीआयक दिल्ले मुलाखतींत तांणी भारताची सध्याची परिस्थिती, लोकसंख्या आनी हे लोकसंख्येचो फुडाराचो मार्ग अशा वेगवेगळ्या विशयांचेर आपले विचार मांडल्यांत. हातूंत भारतातले तरणाटे लोकसंख्या, जाणट्यांची लोकसंख्या, शारीकरण, स्थलांतर, हवामान बदल अशा वेगवेगळ्या विशयांक स्पर्श करून तांणी म्हत्वाचीं निरिक्षणां मांडली.
शिक्षण, भलायकी, घरनिर्माण हातूंत चड गुंतवणूक करपाची गरज
वोजनार हांणी सांगलें, भारतातली जाणट्यांची लोकसंख्या 2050 मेरेन दुपेटीन वाडुये. म्हणल्यार 34 कोटी 60 लाख जावपाचो अदमास आसा. ताका लागून भलायकी, घरनिर्माण आनी पेन्शनांत चड गुंतवणूक करप गरजेचें आसा. खास करून एकटी रावपी आनी गरीब जाण्ट्यां बायलांक ह्या तरतुदींची चड गरज आसा.
सध्या भारतांत 10 ते 19 वर्सां पिराय गटांतल्यान तरणाट्यांचो आंकडो 25 कोटी 20 लाख इतलो व्हड आसा. तांच्या बऱ्या भलायके खातीर आनी शिक्षणा खातीर गुंतवणूक करपाक आतांच सुरवात करपाची गरज आसा. नोकरी प्रशिक्षण, रोजगार निर्मिती आनी लैंगिक समानताय हाडची पडटली. हाका लागून तरणाट्यांची लोकसंख्याय वाडटली आनी हाका लागून शाश्वत उदरगतीक मजत जातली अशें वोजनार हांणी सांगलें. 2050 मेरेन भारताची 50 टक्के लोकसंख्या शारी वाठारांनी आसतली असो अदमास वोजनर हांणी उक्तायलां. तशेंच खोपींची जावपी वाड, वायु प्रदुशण आनी हवामान बदल ह्या सारक्या समस्यांचे वेवस्थापन करपा खातीर स्मार्ट सिटी, घटमूट मुळावी बांदावळ आनी परवडपी घरां तयार करप गरजेचें आसा अशेंय तांणी सांगलें.
बायलांच्या समस्यांचेर चड लक्ष दिवपाची गरज
हे मुलाखतींत वोजनर हांणी बायलांचे सुरक्षे विशीं चड विचार करपाची गरज उक्तायली. एकंदर जिणेचो दर्जो सुदारपा खातीर आनी लैंगिक समानताय हाडपा खातीर भलायकी सेवा, शिक्षण आनी रोजगाराचेर चड लक्ष केंद्रीत करपाची गरज आसा. देशांतल्या अंतर्गत आनी भायल्या स्थलांतराचें वेवस्थापन करपा खातीर नियोजन करपाची गरज आसा. हवामान बदलाचो परिणाम बायलांच्या प्रजनन भलायकेचेर जावं येता. ताका लागून गुरवारपण येवप कठीण जाता, गुरवारपणाचे प्रक्रियेंत आजखळ निर्माण जाता. लैंगीक समानताय आनी शाश्वत उदरगती खातीर ह्या संस्यांचेर उपाय काडप म्हत्वाचें आसा अशेंय वोजनार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
