भांगरभूंय | प्रतिनिधी
जाण्ट्यांक वायट वागणुके आड संवसारीक जागृताय दीस म्हणून 15 जून वेंचून काडिल्लो. आंतरराष्ट्रीय पांवड्यार जाण्ट्यां आडची वायट वागणूक आडावपाच्या नेटवर्कान. हो 2006 वर्सा सुरू केल्लो आनी 2011 वर्सा आपणायिल्ल्या थारावांत सार्वत्रिक सभेन ताका ‘संयुक्त राष्ट्रांचो दीस’ म्हूण मान्यताय दिली. ह्या थारावांत सगळ्या वांगडी राष्ट्रांक, संयुक्त राश्ट्रांच्या वेवस्थेच्यो संघटना आनी हेर आंतरराश्ट्रीय आनी प्रादेशिक संघटना तशेंच बिगर सरकारी संघटना आनी व्यक्ती सयत नागरी समाजाक हो दीस योग्य रितीन पाळपाक उलो मारलो.
जाण्ट्या लोकांच्या मानवी हक्कांचें उल्लंघन जावंक फावोना ही भावना हातूंत आसा.
संवसारीक भलायकी संघटने प्रमाण जाण्ट्यांच्या छळाची व्याख्या अशी करूं येता. “खंयच्याय संबंदां भितर घडपी एकूच, वा परत परत केल्ली मनस्ताप दिवपी कृती, वा योग्य कृतीचो उणाव जंय विस्वासाची अपेक्षा आसता आनी जी जाण्ट्या मनशाक हानी वा त्रास दिता.” जाण्ट्यांक त्रास दिवप शारिरीक, मानसीक वा भावनीक, लैंगीक आनी अर्थीक अत्याचार अशे वेगवेगळे प्रकार आसूं येतात. हेतून, बळयां वा नकळटें दुर्लक्ष केल्ल्याचोय परिणाम आसूं येता.
संवसारांतल्या जायत्या वाठारांनी जाण्ट्यांक त्रास दुर्लक्षितपणान वा प्रतिसाद नासतना चलता. हालींमेरेन ही गंभीर समाजीक समस्या लोकांच्या नदरेक लिपून आशिल्ली आनी ती चड करून खाजगी, घरांतली गजाल मानताले. आयज लेगीत जाण्ट्यांक वायट वागणूक, दुर्लक्षित जीण हे निशिध्द प्रकार चालूच आसतात, चड करून बहुतेक संवसारभरांतल्या समाजांनी ताका म्हत्व दिवंक ना आनी ताचे कडेन दुर्लक्ष केलां.
हालीं “हॅल्पेज” सारक्यो ह्या वाठारांत वावुरपी संघटना कार्यरत जाल्यात आनी जाण्ट्यांचो छळ हो भौशीक भलायकी आनी समाजीक म्हत्वाचो प्रस्न आसा अशें दाखोवपी पुरावे एकठांय जावपाक लागल्यात.
समस्येची व्याप्ती
12 उण्या आनी मध्यम उत्पन्नाच्या देशां सयत 28 देशांतल्या अभ्यासां वयल्यान उपलब्ध आशिल्ल्या सबळ पुराव्याचेर आदारीत 2017 वर्सा केल्ल्या अभ्यासा प्रमाण, फाटल्या वर्सा, 60 वर्सां आनी ताचे परस चड पिरायेच्या 15.7% लोकांचो कितें ना कितें छळ जाला. हो अदमास उणो आसपाची शक्यताय आसा, कारण जाण्ट्यांच्या छळाच्या 24 प्रकरणांतल्या फकत 1 प्रकरणाची म्हायती मेळटा अशें दिसून आयलां.
आतां आमच्या देशांत कायदो खर जाला तरी चडशे जाण्टे लोक चड करून वायट वागणूकेच्यो कागाळी कुटुंबाक, इश्टांक वा संबंधित अधिकाऱ्यांक कळोवंक भियेतात.
तरेकवार प्रकारचे अत्त्याचार, पिडापीड सोंसपी जाण्ट्या लोकांचो आंकडो अदमास: मानसीक छळ : ११.६% अर्थीक गळचेपी: ६.८% दुर्लक्ष: ४.२% शारिरीक अत्याचार: २.६% लैंगीक अत्याचार: ०.९% .
संवसारीक पांवड्यार जायत्या देशांनी पिराय वाडपी लोकसंख्या नेटानं वाढत आशिल्ल्यान आनी दुसरेवटेन संसाधनांच्या अडचणींक लागून तांच्यो गरजो पुरायपणान भागोवंक मेळनात. हांतल्यान जाण्ट्यांच्या छळवाद प्रकरणांचो आंकडो वाडपाचो हुसको वाडटा. 2050 वर्सा मेरेन 60 वर्सां आनी ताचे परस चड पिरायेच्या लोकांची संवसारीक लोकसंख्या दुपेटी परस चड जातली. 2015 वर्सा 90 कोटी आशिल्ली ती सुमार 2 अब्ज जातली असो अदमास आसा. आनी जाण्टे लोक चडशे उण्या आनी मध्यम उत्पन्नाच्या देशांनी रावतात.
जाण्ट्यांच्या छळ बळींचें प्रमाण स्थिर उरल्यार लोकसंख्या पिरायेच्या वाडट्या प्रमाणांत बळी पडपी लोकांचो आंकडो नेटान वाडटलो आनी 2050 मेरेन 32 कोटी जातलो.
आमच्या देशांत विभक्त कुटुंब पद्धतीक नेट आयिल्ल्यान जाण्ट्यांची आबाळ जाता. भलायकेच्या संसाधन व्यवस्थेक लागून जगपाची सरासरी पिराय वाडल्या. जांकां पेंशन मेळना वा गांठीक बचत ना तांकां जाण्टेंपण हें पुराय परावलंबी आनी त्राशिक थारता. आयच्या दिसा ह्या विशयाचेर गंभीरपणान विचार जावपाची आस्त धरुंया.
प्रकाश वा. कामत
9422443093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
